.jpg)
បាងកកៈ បុគ្គលិកថៃកំពុងស្វែងរកភាពបត់បែនបន្ថែមទៀតនៅក្នុងកន្លែងការងារដើម្បីសម្រេចបានតុល្យភាពការងារ និងការរស់នៅឲ្យកាន់តែប្រសើរឡើង។ នេះបើយោងតាមការសិក្សានាពេលថ្មីៗដោយក្រុមហ៊ុនស្រាវជ្រាវទីកន្លែងធ្វើការងារប្រកបដោយភាពច្នៃប្រឌិត Spaces មានមូលដ្ឋាននៅទីក្រុងអាំស្ទែដាំ ប្រទេសហូឡង់។
អ្នកស្រាវជ្រាវបានសម្ភាសបុគ្គលិកក្រុមហ៊ុនជាង ១០០ នាក់នៅក្នុងប្រទេសថៃ ដើម្បីយល់ដឹងឲ្យកាន់តែប្រសើរពីកត្តាជំរុញនៅពីក្រោយកំណើនតម្រូវការសម្រាប់ភាពបត់បែននៅកន្លែងធ្វើការងារបានរកឃើញថា បុគ្គលិកជាងពាក់កណ្ដាល (៥៨ ភាគរយ) ក្នុងចំណោមបុគ្គលិកទាំងនោះដែលស្ទង់មតិបាននិយាយថាពួកគេបានរំពឹងពីតម្រូវការភាពបត់បែនដើម្បីបន្តការរីកចម្រើនពេញមួយឆ្នាំ ២០១៨។
ការរកឃើញផ្សេងទៀតរួមមានកំណើនដ៏ធំក្នុងចំនួនអ្នកប្រឹក្សាយោបល់ (២៧ ភាគរយ) និងអ្នកប្រកបមុខរបរសេរី (៣១ ភាគរយ) ដែលធ្វើការងារនៅតាមឧស្សាហកម្មផ្សេងៗគ្នាដោយម្នាក់ក្នុងចំណោមបុគ្គលិកក្រុមហ៊ុន ៥ នាក់ថ្លែងថាពួកគេបានកត់សម្គាល់កំណើនកម្មករក្រៅម៉ោងកាលពីឆ្នាំមុន។
ហេតុផលកំណើនចាប់ពីកម្មករធម្មតាដែលចង់សម្រេចបានតុល្យភាពការងារ និងការរស់នៅកាន់តែប្រសើរ និងចំណាយពេលវេលាកាន់តែច្រើនជាមួយមនុស្សជាទីស្រឡាញ់ ឬការធ្វើសកម្មភាពសម្រាកលម្ហែកាយ ចំពោះម្ដាយដែលត្រឡប់ទៅធ្វើការងារ និងការដោះស្រាយតម្រូវការគ្រួសារ។ អ្នកចូលរួមប្រហែល ៧ ភាគរយបានថ្លែងថា ពួកគេបានអង្កេតកំណើនកម្មករជាច្រើនដែលបន្តធ្វើការងារលើសពីអាយុចូលនិវត្តន៍។
លោកស្រី Noelle Coak នាយកប្រចាំប្រទេសទទួលបន្ទុកប្រទេសថៃ កោះតៃវ៉ាន់ និងកូរ៉េខាងត្បូងបានថ្លែងថា៖ «ការផ្លាស់ប្តូរផ្សេងគ្នានេះនៅក្នុងទម្លាប់ធ្វើការងាររបស់ប្រជាជនថៃអាចរួមចំណែកដ៏ធំដល់តម្រូវការផ្លាស់ប្តូរកម្លាំងពលកម្មពិភពលោក»។
លោកស្រីថ្លែងថា៖ «បុគ្គលិកក្រុមហ៊ុនកាន់តែច្រើនមានការរំពឹងទុកខ្ពស់ពីសេរីភាព និងភាពបត់បែនដ៏ធំ ដែលពិតជាកត្តារួមចំណែកមួយដល់ភាពពេញនិយមនៃភាពបត់បែននៅក្នុងការងារ»។
លោកស្រីបានបន្តថា៖ «មនុស្សគ្រប់ជំនាន់ស្វែងរកតុល្យភាពជីវិតការងារដ៏ប្រសើរ ប៉ុន្តែវាជាមនុស្សដែលធំពេញវ័យក្នុងសតវត្សរ៍ទី ២១ របស់ប្រទេសថៃ ដែលភាគច្រើនបានទាមទារវាពីថៅកែរបស់ពួកគេ។ ទីផ្សារការងារនៅថ្ងៃនេះដែលបង្កើតតុល្យភាពការងារ និងការរស់នៅសម្រាប់មនុស្សដែលធំពេញវ័យក្នុងសតវត្សរ៍ទី ២១ គឺជាអត្ថប្រយោជន៍ប្រកួតប្រជែងគួរឲ្យចាប់អារម្មណ៍ដែលបាននាំឲ្យមានតម្រូវការកាន់តែធំសម្រាប់ទីកន្លែងធ្វើការងាររួម។
លោកស្រីថ្លែងថា៖ «មនុស្សដែលធំពេញវ័យក្នុងសតវត្សរ៍ទី ២១ ទម្លាប់នឹងការភ្ជាប់ទំនាក់ទំនងគ្រប់ពេលវេលា ដូច្នេះវាមិនមែនជាការភ្ញាក់ផ្អើលនោះទេ ដែលពួកគេកំពុងស្វែងរកជម្រើសលើកទឹកចិត្តកាន់តែច្រើន នៅពេលធ្វើការងារដូចជាបន្ទប់ការងារសម្រាប់ពាណិជ្ជកម្ម ទីកន្លែងការងាររួម ការិយាល័យរយៈពេលខ្លី ឬមជ្ឈមណ្ឌលហៅទូរស័ព្ទចូលសុំការប្រឹក្សាយោបល់។ តម្រូវការរបស់បុគ្គលិកកំពុងផ្លាស់ប្តូរ ហើយក្រុមហ៊ុនរបស់ប្រទេសថៃត្រូវតែវិវឌ្ឍជាបណ្ដើរៗ»៕LA
