.jpg)
ផលិតផលត្រីធូណាកំប៉ុងម៉ាក Petit Navire របស់ក្រុមហ៊ុន Thai Union Group ដាក់លក់នៅផ្សារទំនើបក្នុងប្រទេសបារាំង។ រូបថត អង្គការ Greenpeace
ក្រុងបាងកកៈ ក្រុមហ៊ុន Thai Union Group (TU) ដែលជាក្រុមហ៊ុននាំចេញត្រីធូណាកំប៉ុង និងក្លាសេធំជាងគេក្នុងពិភពលោក កាលពីថ្ងៃអង្គារ បានរាយការណ៍ប្រាក់ចំណេញសុទ្ធនៅឆ្នាំសារពើពន្ធ ២០១៧ ចំនួន ៦ ពាន់លានបាត (ប្រហែល ១៩០ លានដុល្លារ) កើនឡើង ១៤,៦ ភាគរយ ដែលត្រូវបានជំរុញដោយការលក់ខ្ពស់បំផុត។
ក្រុមហ៊ុន TU បានឲ្យដឹងថា ការលក់ជារួមប្រចាំឆ្នាំបានកើនឡើងដល់ ១៣៦,៥៣ ពាន់លានបាត កើនឡើង ១,៦ ភាគរយ។
ប្រាក់ចំណេញដុលមានចំនួន ១៨,១៤ ពាន់លានបាត ខណៈអនុបាតប្រាក់ចំណេញដុល (Gross profit margin) ដែលជាការវាស់វែងអត្រាប្រាក់ចំណេញ ក្នុងប្រាក់ចំណេញដុល១ដុល្លារនោះ មាន ១៣,៣ ភាគរយ (ក្នុងមួយដុល្លារ ចំណេញបាន ១៣ សេន) ដែលធ្លាក់ចុះពី ១៤,៨ ភាគរយនៅឆ្នាំសារពើពន្ធ ២០១៦។
តម្លៃត្រីធូណាខ្ពស់បានរួមចំណែកដល់ការធ្លាក់ចុះអនុបាតប្រាក់ចំណេញ ដែលការធ្លាក់ចុះនេះមួយផ្នែកត្រូវបានប៉ះប៉ូវមកវិញដោយការគ្រប់គ្រងអត្រាការប្រាក់បរទេសដោយប្រុងប្រយ័ត្ន និងការគ្រប់គ្រងការចំណាយដ៏តឹងរឹង។
លោក Thiraphong Chansiri នាយកប្រតិបត្តិក្រុមហ៊ុន TU បានថ្លែងថា៖ «ទោះបីជាអស្ថិរភាពទីផ្សារ និងតម្លៃវត្ថុធាតុដើមកាន់តែខ្ពស់ក៏ដោយ ក៏ប្រាក់ចំណេញរបស់យើងបានរក្សាភាពរឹងមាំកាលពីឆ្នាំ ២០១៧»។
លោកបន្តថា៖ «សម្ពាធតម្លៃវត្ថុធាតុដើមកំពុងមានភាពធូរស្រាលដោយសារតែតម្លៃត្រីធូណាបានចាប់ផ្ដើមធ្លាក់ចាប់តាំងពីត្រីមាសទី ៤ ឆ្នាំ ២០១៧ មក»។
ក្នុងឆ្នាំ ២០១៧ ការលក់នៅអាមេរិកខាងជើង បានបន្តដើរតួនាទីដ៏សំខាន់នៅក្នុងប្រាក់ចំណូលរបស់ក្រុមហ៊ុន ដែលមាន ៤០ ភាគរយនៃការលក់សរុប ខណៈដែលអឺរ៉ុបបានរួមចំណែក ៣២ ភាគរយ។ ទីផ្សារក្នុងស្រុករបស់ប្រទេសថៃបានកើនឡើងដល់ ១០ ភាគរយនៃការលក់សរុប ហើយការលក់នៅប្រទេសជប៉ុនមានចំនួន ៦ ភាគរយ។
ការរួមចំណែកការលក់ទីផ្សារសំខាន់ៗ កាលពីឆ្នាំមុនពី បានផ្លាស់ប្តូរបន្តិចបន្តួច ដោយងាកទៅរកទីផ្សារក្នុងស្រុក និង ទីផ្សារកំពុងអភិវឌ្ឍន៍ខ្លាំងមួយ ដែលផ្នែកដោយសារតែកិច្ចខិតខំប្រឹងប្រែងដ៏ខ្លាំងរបស់ក្រុមហ៊ុន ដើម្បីចូលទៅក្នុងទីផ្សារកំពុងអភិវឌ្ឍន៍ខ្លាំង ជាពិសេសប្រទេសចិន៕ Bangkok Post/LA
