Search form

Login - Register | FOLLOW US ON

Logo of Phnom Penh Post newspaper Phnom Penh Post - ផលិតកម្ម​ស្ករ ស​ កម្ពុជា​ នៅ​ទាប​ក្នុង​ទីផ្សារ​

Content image - Phnom Penh Post
កសិករ​កំពុង​ពិនិត្យ​មើល​ដើម​អំពៅ​របស់​ខ្លួន​ដែល​ដាំ​ជា​លក្ខណៈ​គ្រួសារ​។ ហេង ជីវ័ន

ផលិតកម្ម​ស្ករ ស​ កម្ពុជា​ នៅ​ទាប​ក្នុង​ទីផ្សារ​

ភ្នំពេញៈ ក្រុមហ៊ុន​ផលិត​ស្ករស​ធំៗ​ចំនួន ​៥​ របស់​កម្ពុជា​ នាំចេញ​ស្ករស​បានតែ​ ៤ ​ភាគរយ​ប៉ុណ្ណោះ​នៃ​សមត្ថភាព​ចម្រាញ់​ក្នុង​ផែនការ​ទៅ​ទីផ្សារ​អន្តរជាតិ​កាលពី​ឆ្នាំមុន ឬ​ស្មើនឹង​ចំនួន​ ៨០ ០០០​ តោន​។ នេះ​បើ​តាម​របាយការណ៍​របស់​ក្រសួង​ឧស្សាហកម្ម និង​សិប្បកម្ម​។​

​មន្ដ្រី​រដ្ឋាភិបាល​បាន​ឲ្យ​ដឹងថា វិស័យនេះ​នៅ​តែ​មាន​ឱកាស​ច្រើន​សម្រាប់​កំណើន ដោយ​សារ​តែ​ក្រុមហ៊ុន​ស្ករស​កំពុង​ជំរុញ​ការ​ផលិត​ឲ្យ​កាន់​តែ​ខ្ពស់​។

​យោងតាម​ទិន្នន័យ​នៅក្នុង​របាយការណ៍​ប្រចាំឆ្នាំ​ដែល​មិនទាន់​ចេញផ្សាយ​របស់​ក្រសួង​ឧស្សាហកម្ម និង​សិប្បកម្ម ផ្ទៃដី​ជិត ​១០​ ម៉ឺន​ហិកតា​ត្រូវបាន​លៃ​ទុក​សម្រាប់​ការដាំដុះ​អំពៅ​ជាមួយនឹង​សមត្ថភាព​គ្រោង​ទុក​នៃ​ការ​ចម្រាញ់​ស្ករស​ ១,៨​ លាន​តោន​ក្នុង​មួយឆ្នាំ​។

ប៉ុន្តែ​មានតែ​ផ្ទៃដី​មួយ​ចំណែក​តូច​ប៉ុណ្ណោះ ដែល​ត្រូវបាន​ដាំ​ដុះ​ដោយ​ក្រុមហ៊ុន​ទាំង​ ៥​ នៅពេល​បច្ចុប្បន្ន ក្នុងនោះ​មាន​ក្រុមហ៊ុន Rui Feng និង​ក្រុមហ៊ុន​បុត្រ​សម្ព័ន្ធ​ទាំង​ ៤ ​របស់​ខ្លួន ក្រុមហ៊ុន Kamadhenu Ventures (Cambodia) Ltd ក្រុម​ហ៊ុន Phnom Penh Sugar Co Ltd ក្រុមហ៊ុន Yellow Field International Ltd និង​ក្រុមហ៊ុន Koh Kong Sugar Industry Co Ltd ។​

​របាយការណ៍​នេះ​បាន​បញ្ជាក់​ថា គម្រោង​មាន​តម្លៃ​ ១,៥ ​ពាន់​លាន​ដុល្លារ​របស់​ក្រុមហ៊ុន Rui Feng អាច​នឹង​រក​ប្រាក់​ចំណេញ​បាន​ ១៨០​ លាន​ដុល្លារ​ក្នុង​មួយ​ឆ្នាំ ប្រសិន​បើ​ក្រុមហ៊ុន​នេះ​ដំណើរការ​តាម​ផែនការ​។

លោក អ៊ុំ សុថា អ្នក​នាំ​ពាក្យ​ក្រសួង​ឧស្សាហកម្ម និង​សិប្បកម្ម បាន​ឲ្យ​ដឹង​ថា រោងចក្រ​ចម្រាញ់​ស្ករ​អំពៅ​ជា​ច្រើន​នៅ​តែ​កំពុង​ដំណើរ​ការ​ក្នុង​ការ​ពង្រីក​ការ​ប្រមូល​ផល​របស់​ពួកគេ​ដើម្បី​អាច​នាំ​ចេញ​ឲ្យ​កាន់​តែ​ច្រើន​ទៅ​ទីផ្សារ​អន្តរជាតិ​។

លោក​ថ្លែង​ថា​៖ «​ចំនួន​ស្ករស​ចម្រាញ់​ដែល​បាន​នាំ​ចេញ​នៅ​តែ​មាន​ចំនួន​ទាប ហើយ​រោងចក្រ​នានា​ត្រូវ​ការ​ពេលវេលា​ក្នុងការ​ពង្រីក​ការ​ដាំ​ដុះ និង​ការ​បញ្ជា​ទិញ​ដែល​មាន​សុវត្ថិភាព ក្នុង​ការ​បង្កើន​ការផលិត​សម្រាប់​ការ​នាំ​ចេញ​»។

ខណៈ​ថៃ ដែល​ជា​ប្រទេស​ផលិត​ស្ករស​ឈាន​មុខ​គេ​ទី​ពីរ​របស់​ពិភពលោក បន្ទាប់​ពី​ប្រេស៊ីល បាន​ប្រកាស​ថា ខ្លួន​នឹង​បញ្ឈប់​ការ​ឧបត្ថម្ភ​ធន​សម្រាប់​កសិករ​ដាំ​ដុះ​អំពៅ​ត្រឹម​ចុង​ឆ្នាំ​នេះ បន្ទាប់​ពី​ជម្លោះ​ដ៏​ស្មុគស្មាញ​ជាមួយ WTO លើ​ការ​បារម្ភ​ការ​កេង​ប្រវ័ញ្ច​តម្លៃ​លើ​ពិភពលោក លោក អ៊ុំ សុថា ឲ្យ​ដឹង​ថា ការ​បញ្ឈប់​ការ​ឧបត្ថម្ភ​ធន​នេះ​នឹង​មិន​ធ្វើ​ឲ្យ​ក្រុមហ៊ុន​ផលិត​កម្ពុជា​អាច​គ្រប់គ្រង​ទីផ្សារ​គេ​បាន​ទេ​។

លោក​បន្ត​ថា​៖ «​ការ​សម្រេច​ចិត្ត​របស់​ថៃ មិន​មាន​ន័យ​ថា ក្រុមហ៊ុន​ផលិត​របស់​យើង នឹង​មាន​ឱកាស​ដណ្តើម​ទីផ្សារ​របស់​ពួក​គេ​នោះ​ទេ​»​។ លោក​បន្ត​ថា​៖ «​បើ​យើង​ចង់​ប្រើប្រាស់​ទីផ្សារ​របស់​ពួក​គេ យើង​ត្រូវ​តែ​បង្កើន​ស្ដង់ដារ​គុណភាព​ផ្ទាល់​របស់​យើង​ជា​មុន​សិន​»​។

ប៉ុន្តែ លោក សុខ វណ្ណា អនុ​ប្រធាន​នាយកដ្ឋាន​ដំណាំ​ឧស្សាហកម្ម នៅ​ក្រសួង​កសិកម្ម បាន​ឲ្យ​ដឹង​ថា ការ​បញ្ឈប់​ការ​ឧបត្ថម្ភ​ធន​របស់​ថៃ​អាចជួយ​ឲ្យ​មាន​តុល្យភាព​ដល់​ភាព​ស្មើភាព​ក្នុង​តំបន់​។

លោក​បញ្ជាក់ថា​៖ «​ប្រសិនបើ​យើង​មានការ​ប្រកួតប្រជែង​ស្មើភាព​នៅលើ​ទីផ្សារ បរិមាណ​ផល​អំពៅ​របស់​យើង​នឹងមាន​លទ្ធភាព​កាន់​តែ​ច្រើន​ចូលដល់​ទីផ្សារ​នេះ ហើយ​តម្លៃនឹង​កើន​ឡើង​»​។

យោង​តាម​តួលេខ​បាន​ពី​ក្រសួង​កសិកម្ម អំពៅ​ត្រូវ​បាន​ប្រមូល​ផល​លើ​ផ្ទៃដី ១៨ ២៨៨ ហិកតា​ប៉ុណ្ណោះ​កាលពី​ឆ្នាំ​មុន បើ​ធៀប​នឹង ១៩ ៥១៤ ហិកតា​កាលពី​ឆ្នាំ​២០១៥​។

លោក វណ្ណា បាន​បញ្ជាក់​ថា​៖ «​កសិករ​បាន​ផ្លាស់​ប្តូរ​ទៅ​ដាំ​ដុះ​ដំឡូង ដែល​ងាយស្រួល​ដាំ​ដុះ​និង​ប្រមូល​ផល​»​។ លោក​បន្ថែមថា អំពៅ​ស្ទើរតែ​ជា​ដំណាំ​កសិកម្ម​ផ្ដាច់​មុខ​ដែល​គ្រប់គ្រង​ដោយ​ក្រុមហ៊ុន​កសិកម្ម​ធំៗ​។

លោក ម៉ី កល្យាណ ទីប្រឹក្សា​ជាន់​ខ្ពស់​នៅ​ឧត្តម​ក្រុម​ប្រឹក្សា​សេដ្ឋកិច្ចជាតិ (SNEC)​ បាន​ឲ្យ​ដឹង​ថា ក្រុមហ៊ុន​ផលិត​ស្ករស​នឹង​ចាំបាច់​ត្រូវ​បង្កើន​ការ​នាំ​ចេញ​ដើម្បី​បន្ត​អាជីវ​កម្មនេះ​។

លោក​ថ្លែងថា​៖ «​ប្រសិន​បើ​ការវិនិយោគ​ដំណើរការ​យឺត​នៅ​បន្ត វិស័យ​ស្ករស​នឹងមិន​រីកចម្រើន​នោះ​ទេ ហើយ​យើង​នឹង​បាត់បង់​ឱកាស​ចំណាយ​លើដី និង​កម្លាំង​ពលកម្ម​»​។

លោក​បន្ត​ថា​៖ «​ល្បឿន​យឺត​នៃ​ការ​នាំ​ចេញ​ជា​បញ្ហា​ធ្ងន់ធ្ងរ និង​អាច​ឈាន​ដល់​ការ​ក្ស័យធន​»៕ LA

0

Comments

Please, login or register to post a comment