ភ្នំពេញៈ ពាណិជ្ជកម្មទ្វេភាគីរវាងកម្ពុជា និង វៀតណាម បានកើនឡើងជិត ៣០ ភាគរយ កាលពីឆ្នាំមុន ធៀបនឹង ឆ្នាំ ២០១៦។ នេះបើយោងតាមការចុះផ្សាយដោយសារព័ត៌មានរដ្ឋរបស់វៀតណាម ខណៈទិន្នន័យពីរដ្ឋាភិបាលកម្ពុជានៅមិនទាន់មាននៅឡើយទេ សូម្បីតែទិន្នន័យឆមាសទី ១។
ទិន្នន័យពីអគ្គនាយកដ្ឋានពន្ធគយវៀតណាម បានបង្ហាញថា ពាណិជ្ជកម្មកម្ពុជា វៀតណាម កាលពីឆ្នាំ ២០១៧ សម្រេចបាន ៣,៨ ពាន់លានដុល្លារ កើនឡើង ២៩,៧ ភាគរយ ធៀបនឹងឆ្នាំ ២០១៦។ នេះបើតាមសេចក្តីរាយការណ៍។
របាយការណ៍បង្ហាញថា ក្នុងចំណោមការនាំចេញសរុប វៀតណាមបាននាំចូលមកកម្ពុជាមានតម្លៃ ២,៧៧ ពាន់លានដុល្លារ កើនឡើង ២៦ ភាគរយ ធៀបនឹងឆ្នាំ ២០១៦ ខណៈការនាំចេញរបស់កម្ពុជាទៅវៀតណាម មាន ១ ពាន់លានដុល្លារ កើនឡើង ៤ ភាគរយ។
លោក សៀង ថាយ អ្នកនាំពាក្យក្រសួងពាណិជ្ជកម្មកម្ពុជា បានប្រាប់ភ្នំពេញ ប៉ុស្តិ៍កាលពីថ្ងៃចន្ទថា ទិន្នន័យពាណិជ្ជកម្មកម្ពុជាជាមួយបណ្ដាប្រទេសផ្សេងទៀតស្ថិតក្រោមការងាររបស់អគ្គនាយកដ្ឋានគយ និងរដ្ឋករ របស់ក្រសួងសេដ្ឋកិច្ច និងហិរញ្ញវត្ថុ។
លោក ថាយ បន្តថា មកដល់ពេលនេះ ក្រសួងពាណិជ្ជកម្មទើបតែបានទទួលបានទន្នន័យពាណិជ្ជកម្មរយៈពេល ៣ ខែដំបូងនៃ ឆ្នាំ ២០១៧ ប៉ុណ្ណោះ ។
អគ្គនាយកដ្ឋានគយ និងរដ្ឋករកម្ពុជាមិនបានតែងតាំងនរណាម្នាក់ធ្វើជាអ្នកនាំពាក្យនោះទេ។
ភ្នំពេញ ប៉ុស្តិ៍ មិនអាចទាក់ទង លោក គុន ញឹម អគ្គនាយកនៃអគ្គនាយកដ្ឋានគយ និងរដ្ឋករ បានទេនៅថ្ងៃនេះ។