.jpg)
ឡូហ្គោរបស់ក្រុមហ៊ុន Facebook នៅលើអេក្រង់បង្ហាញពីតម្លៃភាគហ៊ុនក្នុងផ្សារហ៊ុន NASDAQ នាពេលកន្លងមក។ រូបថត AFP
ក្រុងវ៉ាស៊ីនតោនៈ តម្លៃភាគហ៊ុនរបស់ក្រុមហ៊ុន Facebook បានធ្លាក់ចុះកាលពីថ្ងៃចន្ទ ដោយសារបណ្តាញព័ត៌មានសង្គមឈានមុខគេមួយនេះ ត្រូវបានទទួលរងគ្រោះ ដោយសារការរិះគន់ទំាងក្នុង និង ក្រៅប្រទេស ជុំវិញការបង្ហើបឲ្យដឹងថា ក្រុមហ៊ុន Cambridge Analytica ដែលធ្វើការងារឲ្យយុទ្ធនាការប្រធានាធិបតី របស់លោក ដូណាល់ ត្រាំ បានចូលលួច និង ប្រើប្រាស់ទិន្នន័យមិនត្រឹមត្រូវរបស់អ្នកប្រើប្រាស់ ៥០ លាននាក់របស់ក្រុមហ៊ុន Facebook។
ការអំពាវនាវឲ្យមានការស៊ើបអង្កេតបានធ្វើឡើងដោយមន្ត្រី អឺរ៉ុប និង អាមេរិក បន្ទាប់ពីក្រុមហ៊ុន Facebook បានឆ្លើយតបនឹងសេចក្តីរាយការណ៍អំពីការប្រើប្រាស់ទិន្នន័យមិនត្រឹមត្រូវរបស់ខ្លួនតាមរយៈផ្អាកគណនីរបស់ក្រុមហ៊ុន Cambridge Analytica ដែលជាក្រុមហ៊ុនចក្រភពអង់គ្លេស ដែលត្រូវបានជួលឲ្យធ្វើការក្នុងយុទ្ធនាការបោះឆ្នោតឆ្នាំ ២០១៦ របស់លោក ត្រាំ។
លោកស្រី Amy Klobuchar ព្រឹទ្ធសភាមកពីគណបក្សប្រជាធិបតេយ្យ និងលោក John Kennedy មកពីគណបក្សសាធារណរដ្ឋ បានអំពាវនាវឲ្យលោក Mark Zuckerberg អគ្គនាយកក្រុមហ៊ុន Facebook រួមទាំងអគ្គនាយកក្រុមហ៊ុន Google និងអគ្គនាយកក្រុម Twitter បង្ហាញខ្លួននៅចំពោះមុខសភា។
សមាជិកសភាទាំងពីរនេះបានថ្លែងថា៖ «ក្រុមហ៊ុនទាំងនេះ កាន់កាប់ទិន្នន័យផ្ទាល់ខ្លួនយ៉ាងច្រើនដែលមិនធ្លាប់មានពីមុន» និងថា កង្វះការត្រួតពិនិត្យ «បង្កើនក្តីបារម្ភផ្នែកសុចរិតភាពនៃការបោះឆ្នោតរបស់អាមេរិក ព្រមទាំងសិទ្ធិឯកជនផងដែរ»។
ក្រុមហ៊ុន Cambridge Analytica បានបដិសេធចំពោះការចោទថាបានប្រើប្រាស់មិនត្រឹមត្រូវនូវទិន្នន័យរបស់ក្រុមហ៊ុន Facebook សម្រាប់យុទ្ធនាការបោះឆ្នោតរបស់លោក ត្រាំ។
ទន្ទឹមនឹងនេះក្រុមហ៊ុន Facebook បានឲ្យដឹងថា ខ្លួនបានជួលក្រុមហ៊ុនវិទ្យាសាស្ដ្រឌីជីថលមួយឲ្យមកពិនិត្យមើលថា តើការលេចធ្លាយទិន្នន័យនេះបានកើតឡើងដោយរបៀបណា និងដើម្បីធានាថា រាល់ទិន្នន័យណាមួយដែលប្រមូលបានត្រូវបានបំផ្លាញចោល។
តម្លៃភាគហ៊ុនក្រុមហ៊ុន Facebook បានធ្លាក់ចុះ ៦,៨ ភាគរយនៅពេលបិទការជួញដូរនៅផ្សារហ៊ុន Nasdaq ដោយសារការបារម្ភអំពីសម្ពាធបទប្បញ្ញត្តិថ្មីដែលអាចប៉ះពាល់ដល់គំរូអាជីវកម្មរបស់ក្រុមហ៊ុននេះ។
តម្លៃភាគហ៊ុននេះបានធ្លាក់ចុះមួយភាគរយទៀតមកនៅត្រឹម ១៧០ ដុល្លារក្នុងការជួញដូរនៅក្រៅម៉ោងផ្សារហ៊ុន៕ AFP/LA
