ក្រុងយ៉ាំងហ្គោនៈ ការមកដល់របស់ភ្ញៀវទេសចរនៅប្រទេសមីយ៉ាន់ម៉ាបានកើនឡើង ១៨ ភាគរយកាលពីឆ្នាំមុនដល់ចំនួន ៣,៤៤ លាននាក់ បើទោះជាមានការរិះគន់របស់អន្តរជាតិទៅលើការប្រព្រឹត្តចំពោះប្រជាជនមូស្លីមរ៉ូហ៊ីងយ៉ារបស់ប្រទេសនេះយ៉ាងណាក្តី។
ក្រសួងសណ្ឋាគារ និងទេសចរណ៍មីយ៉ាន់ម៉ាបានឲ្យដឹងថា ខ្លួនរំពឹងថានឹងទទួលបានភ្ញៀវទេសចរប្រមាណ ៣,៥ លាននាក់កាលពីឆ្នាំមុន បន្ទាប់ពីចំនួនភ្ញៀវទេសចរបានធ្លាក់ចុះមកនៅត្រឹម ២,៩ លាននាក់នៅឆ្នាំ ២០១៦ ពីចំនួន ៤,៧ លាននាក់ក្នុងឆ្នាំ ២០១៥។
លោក U Myint Htwe អគ្គនាយករងនៃក្រសួងទេសចរណ៍មីយ៉ាន់ម៉ាបានឲ្យដឹងក្នុងបទសម្ភាសមួយថា៖ «ខ្ញុំយល់ថា តួលេខនេះបានកើនឡើងដោយសារយើងបានរៀបចំព្រឹត្តិការណ៍ផ្សព្វផ្សាយជាច្រើន ហើយរដ្ឋាភិបាលបានអនុញ្ញាតឲ្យភ្ញៀវទេសចរធ្វើដំណើរនៅតំបន់ដែលបានរឹតបន្តឹងនាពេលកន្លងមក»។
ប៉ុន្តែទិន្នន័យដែលអាចជឿជាក់បាននៅប្រទេសមីយ៉ាន់ម៉ាអាចនឹងពិបាករកបានណាស់។ កាលពីខែធ្នូ គុណភាពនៃស្ថិតិធនាគាររបស់ប្រទេសនេះទទួលរងមន្ទិលសង្ស័យពីធនាគារពិភពលោក។
ជនជាតិមូស្លីមរ៉ូហ៊ីងយ៉ាប្រមាណ ៧០ ម៉ឺននាក់បានភៀសខ្លួនចេញពីរដ្ឋរ៉ាក់ឃីនទៅកាន់បង់ក្លាដែសដែលជាប្រទេសជិតខាងរបស់មីយ៉ាន់ម៉ា គិតចាប់តាំងពីខែសីហាឆ្នាំមុន នៅពេលដែលក្រុមយោធារបស់ក្រុមប្រដាប់អាវុធ Arakan Rohingya Salvation Army បានវាយប្រហារលើនគរបាលចំនួន ២៥ នាក់ និងមូលដ្ឋានយោធាមួយចំនួនដោយបានធ្វើឲ្យមន្ត្រីរក្សាសន្តិសុខជាច្រើនរូបបាត់បង់ជីវិត។
ក្រុមយោធាបានឆ្លើយតបវិញតាមរយៈយុទ្ធនាការ «ប្រតិបត្តិការបោសសម្អាត» ដោយមានសេចក្តីរាយការណ៍មួយចំនួនថា កងកម្លាំងរក្សាសន្តិសុខ និងក្រុមកាន់សាសនាព្រះពុទ្ធបានវាយប្រហារដោយរើសអើងទៅលើជនជាតិរ៉ូហ៊ីងយ៉ា និងដុតបំផ្លាញភូមិពួកគេ។
លោក Myint Htwe ថ្លែងថា៖ «យើងរំពឹងថានៅឆ្នាំ ២០១៧ មានភ្ញៀវទេសចរចំនួន ៣,៥ លាននាក់ តែយើងទទួលបានភ្ញៀវទេសចរតែ ៣,៤៤ លាននាក់ប៉ុណ្ណោះ ដោយសារគ្រោះមហន្តរាយធម្មជាតិ និងជំងឺផ្តាសាយ H1N1»។ លោកបានបន្តថា ផលប៉ះពាល់នៃជម្លោះនៅតំបន់ភាគខាងជើងនៃរដ្ឋរ៉ាក់ឃីនមានតិចតួច ដោយសាររដ្ឋនោះមិនមែនជាទិសដៅទេសចរណ៍សំខាន់នោះទេ។
លោកបានបន្តឲ្យដឹងទៀតថា៖ «យើងរំពឹងថានឹងមានភ្ញៀវទេសចរច្រើនជាង ៣,៤៤ លាននាក់ក្នុងឆ្នាំនេះ»។
នៅឆ្នាំ ២០១៥ ក្រុមប្រឹក្សាធ្វើដំណើរ និងទេសចរណ៍ពិភពលោក (WTTC) បានព្យាករថា វិស័យធ្វើដំណើរ និងទេសចរណ៍របស់មីយ៉ាន់ម៉ានឹងកើនឡើង ៨,៤ ភាគរយនៅឆ្នាំ ២០២៥ ដែលនឹងក្លាយជាកត្តាចូលរួមចំណែកទី ១ ចំពោះ ផ.ស.ស របស់ប្រទេសនេះ។
របាយការណ៍នៅឆ្នាំ ២០១៣ ស្តីពីប្រទេសមីយ៉ាន់ម៉ារបស់វិទ្យាស្ថាន McKinsey Global Institute បានព្យាករថា វិស័យទេសចរណ៍អាចចូលរួមចំណែក ១៤,១ ពាន់លានដុល្លារដល់សេដ្ឋកិច្ចមីយ៉ាន់ម៉ានៅឆ្នាំ ២០៣០ និងផ្តល់ការងារដល់ប្រជាជនចំនួនប្រមាណ ២,៣ លាននាក់។
លោក Enrico Cesenni នាយកប្រតិបត្តិក្រុមហ៊ុន Myanmar Strategic Holdings ដែលបានវិនិយោគក្នុងវិស័យសណ្ឋាគារ និងទេសចរណ៍នៅប្រទេសនេះថ្លែងថា៖ «វិស័យទេសចរណ៍ក្នុងឆ្នាំ ២០១៧ ពិតជារងនូវផលប៉ះពាល់ក្នុងទីផ្សារទូទៅ ជាពិសេសទាក់ទងនឹងភ្ញៀវទេសចរមកពីតំបន់អឺរ៉ុប»៕ BP