ភ្នំពេញៈ បរិមាណផលត្រីសម្រាប់ធ្វើប្រហុកឬផ្អកក្នុងរដូវនេសាទឆ្នាំនេះ នឹងមានកម្រិតខ្ពស់ជាងឆ្នាំមុន បន្ទាប់ពីរដូវត្រីត្រូវលើកដំបូងបានបញ្ចប់។ នេះបើតាមការព្យាកររបស់មន្ត្រីជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទកាលពីម្សិលមិញ។
លោក ណៅ ធួក រដ្ឋលេខាធិការក្រសួងកសិកម្មបានថ្លែងថា ក្នុងរដូវត្រីត្រូវលើកដំបូង បរិមាណផលត្រីមានច្រើនជាង កាលពីឆ្នាំមុន ដោយសារតែកម្រិតទឹកខ្ពស់ជាងកាលពីឆ្នាំមុនកម្ពស់ ១,៥ ម៉ែត្រ។
លោកមានប្រសាសន៍ថា៖ «ខណៈផុតរដូវត្រីត្រូវលើកដំបូង វាបង្ហាញដល់ពួកយើងនូវបរិមាណផលល្អជាងកាលពីឆ្នាំមុន។ វាបំពេញតម្រូវការត្រីក្នុងការធ្វើប្រហុក ឬផ្អក ឬទឹកត្រី»។
លោកបន្ថែមថា កាលពីឆ្នាំមុន បរិមាណផលត្រីមានប្រហែល ១០ ០០០តោន ហើយឆ្នាំនេះ នឹងទទួលបានពី ១៥ ០០០ ដល់ ២០ ០០០ តោន ខណៈត្រីមានតម្លៃចាប់ពី ១ ០០០ រៀល ដល់ ២ ០០០រៀល ក្នុងមួយគីឡូក្រាម ដែលអាស្រ័យតាមទំហំត្រី។
លោក ធួក បានថ្លែងថា ដាយចំនួន ៦០ ត្រូវបានដំឡើងតាមបណ្ដោយបឹងទន្លេសាប មួយចំនួនក្នុងចំណោមដាយទាំងនេះបានជួលឲ្យវិស័យឯកជន ដែលទទួលបានប្រាក់ប្រហែល ៥សែនដុល្លារក្នុងមួយឆ្នាំ។
រដូវត្រីត្រូវលើកដំបូងបានចាប់ផ្តើមពីថ្ងៃទី ២២ ដល់ ២៧ ខែធ្នូ ឆ្នាំនេះ ខណៈដែលរដូវត្រីត្រូវលើកទីពីរនឹងចាប់ផ្ដើមចាប់ពីថ្ងៃទី ២១ ដល់ថ្ងៃទី ២៦ ខែមករា។
លោក ឈិន ចាន់សា ម្ចាស់ដាយលេខ ១៤A នៅតាមបណ្ដោយបឹងទន្លេសាប ស្ថិតក្នុងខណ្ ឌឫស្សីកែវ បានថ្លែងថា លោកទទួលផលត្រីបានប្រហែល ៨០ តោនក្នុងអំឡុងរដូវត្រីត្រូវដំបូងនេះ ដែលលោកបានលក់ឲ្យឈ្មួញក្នុងតម្លៃចាប់ពី ១ ៤០០រៀលក្នុងមួយគីឡូក្រាមដែលអាចផ្តល់ប្រាក់ចំណេញដល់រូបគាត់ប្រហែលពី ២ ០០០ ដល់ ៣ ០០០ ដុល្លារក្នុងមួយរដូវ។
លោកថ្លែងថា លោកទទួលបានត្រីច្រើនជាងពីឆ្នាំមុន ប៉ុន្តែវាគ្រាន់តែជាផ្នែកតូចនោះទេ ដោយសារតែមានអ្នកនេសាទខុសច្បាប់ច្រើន។
លោកបានថ្លែងថា៖ «ប្រសិនបើរដ្ឋាភិបាលចាត់វិធានការកាន់តែច្រើនក្នុងការលុបបំបាត់អ្នកនេសាទខុសច្បាប់ ចំណែកផលត្រីនេះនឹងផ្ដល់ប្រាក់ចំណេញកាន់តែច្រើនក្នុងរដូវនេះ»។
លោកបន្ថែមថា លោករំពឹងថានឹងទទួលបានត្រីកាន់តែច្រើនសម្រាប់ការចាប់ត្រីលើកក្រោយ។
ការចាប់ត្រីក៏ប្រឈមនឹងបញ្ហាមួយចំនួនក្នុងអំឡុងរដូវត្រីត្រូវនេះដែរ។
លោក ផែ វ៉ាន់ ម្ចាស់ដាយលេខ១២ នៅតាមបណ្ដោយបឹងទន្លេសាបនៅស្រុកពញាឮបានថ្លែងថា ក្នុងអំឡុងរដូវត្រីត្រូវនេះលោកប្រមូលបានបរិមាណផលតិចប្រហែល ៦០តោន ដោយសារតែខ្យល់ព្យុះតិចតួច និងភ្លៀង។
លោកបានមានប្រសាសន៍ថា៖ «ខ្ញុំសង្ឃឹមថានៅរដូវត្រីត្រូវលើកក្រោយ លោកនឹងទទួលបានផលដល់ ១០០ តោន»៕ LA