ក្រុងម៉ិកស៊ីកូៈ លោកប្រធានាធិបតីអាមេរិក ដូណាល់ ត្រាំ និងសមភាគីម៉ិកស៊ិករបស់លោកគឺលោក Enrique Pena Nieto បានព្រមព្រៀងលើកកម្ពស់កិច្ចសហប្រតិបត្តិការស្តីពីសន្តិសុខ ពាណិជ្ជកម្ម និងការធ្វើអន្តោប្រវេសន៍ តាមរយៈការជជែកពិភាក្សាតាមទូរស័ព្ទដៃកាលពីថ្ងៃអង្គារ។ នេះបើយោងតាមការប្រកាសរបស់ប្រទេសទាំង ២។
ភាពតានតឹងរវាងប្រទេសទាំង ២ បានកើនឡើង ដោយសារវោហារស័ព្ទប្រឆាំងនឹងម៉ិកស៊ិករបស់លោក ត្រាំ តែសញ្ញានាពេលថ្មីៗនេះបង្ហាញថា មេដឹកនាំទាំង ២ កំពុងព្យាយាមបន្ថយភាពតានតឹងនេះ។ កាលពីសប្តាហ៍មុនសេតវិមានបានឲ្យដឹងថា ប្រធានាធិបតីទាំង ២ កំពុងពិចារណាពីការរៀបចំកិច្ចប្រជុំមួយ។
យ៉ាងនេះក្តីពុំមានការបញ្ជាក់ពីកិច្ចប្រជុំណាមួយក្នុងសេចក្តីថ្លែងកាណ៍នៅថ្ងៃអង្គារនោះទេ។
សេតវិមានបានបន្តឲ្យដឹងថា៖ «លោកប្រធានាធិបតី ត្រាំ បានបញ្ជាក់ពីការប្តេជ្ញាចិត្តរបស់លោក ដើម្បីបង្កើនកិច្ចសហប្រតិបត្តិការរវាងសហរដ្ឋអាមេរិក និងប្រទេសម៉ិកស៊ិកស្តីពីសន្តិសុខ ពាណិជ្ជកម្ម និងការធ្វើអន្តោប្រវេសន៍»។
ការិយាល័យរបស់លោក Pena Nieto បានចេញសេចក្តីថ្លែងការណ៍ស្រដៀងគ្នានេះមួយផងដែរ៕ BP