ក្រុងកូវ៉ែតៈ រដ្ឋាភិបាល មូលនិធិពិភពលោក អង្គការនានាព្រមទាំងក្រុមវិនិយោគិនកាលពីថ្ងៃពុធបានសន្យាផ្តល់ជំនួយឥណទាន និងការវិនិយោគរាប់ពាន់លានដុល្លារសម្រាប់ការស្តារប្រទេសអ៊ីរ៉ាក់ឡើងវិញ ដែលប្រទេសមួយនេះបានដើរថយក្រោយដោយសារសង្គ្រាមរយៈពេល ៣ ឆ្នាំប្រឆាំងនឹងក្រុមប្រទេសអ៊ិស្លាម។
ម្ចាស់ជំនួយបានសន្យាផ្តល់ជំនួយចំនួន ៣០ ពាន់លានដុល្លារនៅថ្ងៃចុងក្រោយនៃសន្និសីទអន្តរជាតិ។ នេះបើយោងតាមប្រទេសកូវ៉ែតដែលធ្វើជាម្ចាស់ផ្ទះរៀបចំសន្និសីទអន្តរជាតិមួយនេះ។
លោក Sabah al-Khaled Al-Sabah រដ្ឋមន្ត្រីក្រសួងការបរទេសកូវ៉ែតបានឲ្យដឹងថា៖ «ការសន្យារបស់សហគមន៍អន្តរជាតិនៅសន្និសីទនេះគឺច្បាស់លាស់»។ លោកបានបន្តឲ្យដឹងថា៖ «ប្រទេសចំនួន ៧៦ មូលនិធិអន្តរជាតិជាច្រើន និងអង្គការពិភពលោកព្រមទាំងវិនិយោគិនរាប់រយនាក់បានធ្វើការសន្យាផ្តល់ជំនួយស្តារប្រទេសនេះឡើងវិញ»។
រដ្ឋាភិបាលក្រុងបាដាដបានឲ្យដឹងថា ខ្លួនត្រូវការថវិកាចំនួនជិត ៩០ ពាន់លានដុល្លារ ដើម្បីស្តារប្រទេសឡើងវិញ បន្ទាប់ពីសង្គ្រាមដ៏ស្វិតស្វាញជាមួយនឹងក្រុមជ្រុលនិយមរដ្ឋអ៊ិស្លាម (IS) ដែលបានបំផ្លាញផ្ទះសំបែង សាលារៀន មន្ទីរពេទ្យ និងហេដ្ឋារចនាសម្ព័ន្ធសេដ្ឋកិច្ច ដោយបានបង្ខំឲ្យប្រជាជនរាប់លាននាក់ចាកចេញពីទីលំនៅ។
ម្ចាស់ជំនួយធំៗមានចក្រភពអង់គ្លេស និងតួកគី បើទោះជាប្រទេសនីមួយៗមានចែងលក្ខខណ្ឌផ្ទាល់របស់ខ្លួនក្តី។
ចក្រភពអង់គ្លេសបានឲ្យដឹងថា ខ្លួននឹងផ្តល់ឥណទានសម្រាប់ការនាំចេញរបស់ប្រទេសអ៊ីរ៉ាក់រហូតដល់ចំនួន ១ ពាន់លានដុល្លារក្នុងមួយឆ្នាំក្នុងរយៈពេលមួយទសវត្សរ៍។
លោក Mevlut Cavusoglu រដ្ឋមន្ត្រីក្រសួងការបរទេសតួកគីឲ្យដឹងថា ប្រទេសរបស់លោកនឹងផ្តល់ឥណទាន និងការវិនិយោគ ៥ ពាន់លានដុល្លារ ដោយពុំបានបញ្ជាក់ពីព័ត៌មានលម្អិតនោះទេ។
លោក Rex Tillerson រដ្ឋមន្ត្រីក្រសួងការបរទេសអាមេរិកបានឲ្យដឹងកាលពីថ្ងៃអង្គារថាធនាគារ Export-Import Bank of the United States នឹងចុះហត្ថលេខាលើអនុស្សរណៈយោគយល់តម្លៃ ៣ ពាន់លានដុល្លារជាមួយរដ្ឋាភិបាលក្រុងបាដាដ ដែល «នឹងបង្កើតដំណាក់កាលមួយសម្រាប់កិច្ចសហប្រតិបត្តិការនាពេលអនាគតនៅតាមវិស័យសំខាន់ៗនៃសេដ្ឋកិច្ចរបស់ប្រទេសអ៊ីរ៉ាក់ រួមទាំងវិស័យប្រេង និងឧស្ម័ន គមនាគមន៍ និងទំនិញរ៉ែមួយចំនួន»។
ក្រុមប្រទេសក្នុងតំបន់ឈូងសមុទ្រពែរ្ស៍ ដែលដឹកនាំដោយប្រទេសកូវ៉ែត ជាម្ចាស់ផ្ទះនៃសន្និសីទបានសន្យាផ្តល់ជំនួយគិតជាទឹកប្រាក់ចំនួន ៥ ពាន់លានដុល្លារតាមរយៈការវិនិយោគ ឥណទាន និងហិរញ្ញប្បទានសម្រាប់ការនាំចេញ។
អនុរដ្ឋមន្ត្រីក្រសួងការបរទេសអ៊ីរ៉ាក់បានឲ្យដឹងថា រដ្ឋាភិបាលក្រុងតេអេរ៉ង់នឹងចូលរួមចំណែកចំពោះកិច្ចខិតខំប្រឹងប្រែងរក្សាស្ថិរភាពតាមរយៈវិស័យឯកជន ដោយពុំបានប្រកាសពីការប្តេជ្ញាផ្តល់ជំនួយហិរញ្ញវត្ថុណាមួយ។
ប្រទេសអ៊ីរ៉ាក់បានឲ្យដឹងថា ផែនការកសាងប្រទេសឡើងវិញក្នុងរយៈពេល ១០ ឆ្នាំនេះនឹងចំណាយអស់ថវិកា ៨៨,២ ពាន់លានដុល្លារ ដែលក្នុងចំណោមនោះនឹងត្រូវការថវិកា ២២ ពាន់លានដុល្លារភ្លាមៗ។
លោក Ibrahim al-Jaafari រដ្ឋមន្ត្រីក្រសួងការបរទេសអ៊ីរ៉ាក់បានប្រាប់ទីភ្នាក់ងារព័ត៌មាន AFP នៅពេលបិទសន្និសីទនេះថា៖ «យើងសង្ឃឹមថានឹងទទួលបានជំនួយបន្ថែមទៀត»។
លោកបានបន្តឲ្យដឹងទៀតថា៖ «យើងមិនខកចិត្តនោះទេ តែជំនួយនេះមានចំនួនតិចជាងការរំពឹងទុក»។
កាលពីថ្ងៃពុធ ធនាគារពិភពលោក (WB) បានឲ្យដឹងថា វិស័យឯកជននឹងដើរតួនាទីនាំមុខគេក្នុងការស្តារប្រទេសអ៊ីរ៉ាក់ឡើងវិញ «ប្រកបដោយជោគជ័យ»៕ BP