ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ នឹងដាក់ជូនរបាយការណ៍ស្ដីពីបញ្ហាប្រឈមនៅក្នុងវិស័យកសិកម្មទៅកាន់លោកនាយករដ្ឋមន្ដ្រី ហ៊ុន សែន ដើម្បីចាត់វិធានការបន្ថែមទៀតសម្រាប់វិស័យឯកជន និងកសិករ ដើម្បីឲ្យទទួលបានទីផ្សារ និងមានលទ្ធភាពប្រកួតប្រជែងជាមួយទីផ្សារជិតខាង។ នេះបើយោងតាមលោករដ្ឋមន្ដ្រី វេង សាខុន។
ថ្លែងក្នុងវេទិកាកសិកម្មប្រចាំឆ្នាំដែលបានរៀបចំឡើងដោយក្រសួងកសិកម្ម ដើម្បីពិភាក្សាពីបញ្ហាប្រឈមក្នុងវិស័យនេះជាមួយវិស័យឯកជន និងកសិករ លោករដ្ឋមន្ដ្រីបានថ្លែងថា ប្រទេសកម្ពុជា មានសក្ដានុពលក្នុងការបង្កើនការផលិតផ្នែកកសិកម្ម ប៉ុន្តែវិស័យនេះនៅតែប្រឈមបញ្ហាច្រើន។
លោកថ្លែងថា ក្នុងចំណោមបញ្ហាប្រឈមទាំងនេះ ផលិតភាពទាប កង្វះប្រព័ន្ធធារាសាស្ដ្រ តម្លៃហេដ្ឋារចនាសម្ព័ន្ធខ្ពស់ បច្ចេកវិទ្យានិងបច្ចេកទេសកសិកម្មនៅមានកម្រិត លទ្ធភាពទទួលបានហិរញ្ញវត្ថុមិនល្អ និងតម្លៃអគ្គិសនី គឺជាបញ្ហាចាំបាច់ដែលត្រូវដោះស្រាយ។
លោកមានប្រសាសន៍ថា៖ «បញ្ហាសំខាន់គឺថ្លៃដើម និងទីផ្សារ របៀបចូលទៅកាន់ទីផ្សារ។ យើងត្រូវតែស្វែងរកវិនិយោគិន ដើម្បីធ្វើការងារជាមួយវិស័យកសិកម្មដ៏មានសក្ដានុពលរបស់យើង»។
លោករដ្ឋមន្ត្រីបានឲ្យដឹងទៀតថា រដ្ឋាភិបាលកំពុងធ្វើការងារដើម្បីកាត់បន្ថយថ្លៃដើមផលិតកម្មដែលមានកម្រិតខ្ពស់ តម្លៃអគ្គិសនី និងការដឹកជញ្ជូន។
លោកបានបន្ថែមថា រដ្ឋាភិបាលមានផែនការអភិវឌ្ឍកំពង់ផែសមុទ្រជ្រៅថ្មីសម្រាប់ផលិតផលកសិកម្ម ពង្រីកព្រលានយន្តហោះ បន្ទាបតម្លៃអគ្គិសនីមកនៅត្រឹម ៤៨០ រៀលក្នុងមួយគីឡូវ៉ាត់ម៉ោងសម្រាប់សហគ្រាសធុនតូច និងមធ្យម (SME) បើទោះជាតម្លៃនេះនៅតែខ្ពស់ជាងបណ្ដាប្រទេសជិតខាងក៏ដោយ។
លើសពីនេះទៀត សហគ្រាសធុនតូច និងមធ្យមនៅមិនទាន់មាន ចំណេះដឹង និងជំនាញ និងបណ្តាញទីផ្សារគ្រប់គ្រាន់នៅឡើយ ដោយលោករដ្ឋមន្ត្រីជំរុញឲ្យសហគ្រាសទាំងនេះសហការជាមួយវិនិយោគិន ដើម្បីបង្កើនសមត្ថភាពផលិត និងដើម្បីទទួលបានទីផ្សារ។
លោកបន្តថា៖ «ទោះបីជាយើងមិនអាចដោះស្រាយអ្វីៗបានភ្លាមៗក៏ដោយ ប៉ុន្តែយើងត្រូវតែព្យាយាមធ្វើឲ្យបានខ្លាំងបំផុតទៅតាមជំហានៗ»។
ការចិញ្ចឹមជ្រូកគឺជាវិស័យមួយដែលកសិករជួបប្រទះបញ្ហាខ្លាំង។
លោក ជេត ភិរម្យ អនុប្រធានសមាគមអ្នកចិញ្ចឹមសត្វកម្ពុជា( Clra) បានថ្លែងថា សូម្បីតែរដ្ឋាភិបាលក៏មិនអាចចាត់វិធានការបានភ្លាមៗនោះទេលើបញ្ហាប្រឈមក្នុងវិស័យចិញ្ចឹមជ្រូក តែលោកសង្ឃឹមថានឹងមានការគ្រប់គ្រងការនាំចូលជ្រូកខុសច្បាប់ ដើម្បីកសិករចិញ្ចឹមជ្រូកក្នុងស្រុក។
លោកបន្ថែមថា កសិករចិញ្ចឹមសត្វជ្រូកកំពុងប្រឈមនឹងការប្រកួតប្រជែងជាមួយជ្រូកដែលនាំចូល។ លោកបន្តថា វាពិបាកក្នុងការបញ្ឈប់ការនាំចូល ប៉ុន្តែយ៉ាងហោចណាស់រដ្ឋាភិបាលគួរគ្រប់គ្រងគុណភាពរបស់ជ្រូកនាំចូល និងការនាំចូលខុសច្បាប់។
លោកថ្លែងថា៖ «ទោះបីជាលទ្ធផលនៃកិច្ចប្រជុំនេះមិនទាន់ពេញចិត្ត និងបញ្ហានៅតែមានដដែលក្តី ប៉ុន្តែយ៉ាងហោចណាស់យើងលើកឡើងបញ្ហារបស់យើង ហើយសង្ឃឹមថា នឹងស្វែងរកដំណោះស្រាយក្នុងពេលឆាប់ៗ»។
លោក លឹម ហេង អនុប្រធានសភាពាណិជ្ជកម្មកម្ពុជា ដែលចូលរួមក្នុងវេទិកានេះបានថ្លែងថា បញ្ហាសំខាន់សម្រាប់វិស័យនេះគឺថ្លៃដើមផលិតដែលមិនអាចប្រកួតប្រជែងជាមួយផលិតផលនាំចូលបានទេ។
លោកមានប្រសាសន៍ថា៖ «ក្រសួងកសិកម្ម និងវិស័យឯកជនត្រូវតែសហការគ្នាយ៉ាងជិតស្និទ្ធ ដើម្បីបង្កើនល្បឿនការផលិតឲ្យដល់កម្រិតខ្ពស់ និងកាត់បន្ថយតម្លៃអគ្គិសនី ឬការលើកលែងពន្ធ ដើម្បីប្រកួតប្រជែងជាមួយផលិតផលនាំចូល»៕ LA