Search form

Login - Register | FOLLOW US ON

Logo of Phnom Penh Post newspaper Phnom Penh Post - រដ្ឋាភិបាល​ចេញ​កម្មវិធី​ពិសេស​ដើម្បី​ស្ថិរភាព​តម្លៃ​ស្រូវ

រូបភាព​ស្តីពី​កសិករ​ក្នុង​ខេត្ត​បាត់ដំបង​កំពុង​ចាក់​ស្រូវ​ដែល​ទើប​ប្រមូលផល​រួច​កាល​ពី​ឆ្នាំ​ទៅ។
រូបភាព​ស្តីពី​កសិករ​ក្នុង​ខេត្ត​បាត់ដំបង​កំពុង​ចាក់​ស្រូវ​ដែល​ទើប​ប្រមូលផល​រួច​កាល​ពី​ឆ្នាំ​ទៅ។ ហេង ជីវ័ន

រដ្ឋាភិបាល​ចេញ​កម្មវិធី​ពិសេស​ដើម្បី​ស្ថិរភាព​តម្លៃ​ស្រូវ

ភ្នំពេញៈ រដ្ឋាភិបាល​បញ្ចេញ​ឥណទាន​ដើម្បី​ជួយ​ទប់ទល់​នឹង​ការ​ធ្លាក់​ចុះ​តម្លៃ​ស្រូវ​កសិករ​ដែល​កំពុង​ចម្រូងចម្រាស​បន្ទាប់​ពី​តម្លៃ​ស្រូវ​បាន​ធ្លាក់​ចុះ​ដែល​មិន​អាច​ឲ្យ​កសិករ​ទ្រាំទ្រ​បាន។

រដ្ឋាភិបាល​បាន​ប្រកាស​កាលពី​ថ្ងៃ​សុក្រ​នូវ​ទឹកប្រាក់ ២៧ លាន​ដុល្លារ​ដែល​ជា​មូលនិធិ​ពិសេស​ដើម្បី​ផ្តល់​ជា​កម្ចី​ដល់​រោង​ម៉ាស៊ីន​កិនស្រូវ​ដែល​ខ្វះ​ទុន​យក​ទៅ​ទិញ​ស្រូវ​ពី​កសិករ​ដើម្បី​ទប់ទល់​នឹង​ការ​ធ្លាក់​ចុះ​តម្លៃ។

លោក​នាយក​រដ្ឋមន្ត្រី ហ៊ុន សែន តាមរយៈ​ទំព័រ​ហ្វេសប៊ុក​របស់​លោក​បាន​លើក​ឡើង​ថា៖ «ក្នុង​រយៈពេល​ពីរ​បី​ថ្ងៃ​កន្លង​មក​នេះ​ខ្ញុំ​បាន​បញ្ជា​ឲ្យ​ក្រសួង​សេដ្ឋកិច្ច និង​ហិរញ្ញវត្ថុ និង​ស្ថាប័ន​ពាក់ព័ន្ធ​ត្រូវ​ស្វែងរក​ដំណោះស្រាយ​ដល់​បញ្ហា​នេះ»។

កាលពី​ល្ងាច​ថ្ងៃ​សុក្រ​ក្រសួង​សេដ្ឋកិច្ច និង​ហិរញ្ញវត្ថុ​បាន​ប្រកាស​ពី​ការ​បញ្ចេញ​មូលនិធិ​ដែល​បញ្ជាក់​ថា​កម្មវិធី​ពិសេស​របស់​រដ្ឋាភិបាល ២៧ លាន​ដុល្លារ​ហើយ​នឹង​ត្រូវ​ផ្ដល់​ដល់​រោង​ម៉ាស៊ីន​កិនស្រូវ​ដែល​កំពុង​ជួប​ការ​ពិបាក​ដែល​ខ្វះ​ទុន​ដើម្បី​ទិញ​ស្រូវ​ពី​កសិករ។

កង្វះ​ទុន​បាន​បង្ខំ​ឲ្យ​កសិករ​នៅ​តាម​បណ្តា​ខេត្ត​លក់​ស្រូវ​ក្នុង​តម្លៃ​ទាប​បំផុត។ ក្រសួង​សេដ្ឋកិច្ច​បាន​ឲ្យ​ដឹង​ថា​តម្លៃ​ស្រូវ​ក្រអូប​បាន​ធ្លាក់​ចុះ​ខ្លាំង​ពី ៩៩៥ ០០០ រៀល​ក្នុង​មួយ​តោន (២៤០ ដុល្លារ) មក​នៅ​ត្រឹម ៧៧០ ០០០ រៀល (១៩២ ដុល្លារ) នៅ​ចន្លោះ​ពាក់​កណ្ដាល​ខែ​សីហា និង​កាល​ពី​សប្ដាហ៍​មុន។

យោង​តាម​ការ​ប្រកាស​របស់​ក្រសួង​សេដ្ឋកិច្ច​ក្នុង​ចំនួន ២៧ លាន​ដុល្លារ​នេះ​ធនាគារ​អភិវឌ្ឍន៍​ជនបទ (RDB) នឹង​ផ្ដល់ ៧ លាន​ដុល្លារ​ខណៈ​ទឹកប្រាក់ ២០ លាន​ដុល្លារ​បាន​ពី​ថវិកា​របស់​រដ្ឋាភិបាល។

រដ្ឋាភិបាល​រំពឹង​ថា​មូលនិធិ​នេះ​នឹង​អាច​ទិញ​ស្រូវ​បាន​ប្រមាណ ៩០ ០០០ តោន​ដែល​នឹង​អាច​ឲ្យ​តម្លៃ​ស្រូវ​ក្រអូប​លើស​ពី ៩៤ ម៉ឺន​រៀល (២៣៧ ដុល្លារ) ក្នុង​មួយ​តោន។

ការ​បញ្ចេញ​ថវិកា​របស់​រដ្ឋាភិបាល​នេះ​មិនមែន​ជា​ការ​អន្តរាគមន៍​តម្លៃ ឬ​ជួយ​ផ្ទាល់​ដល់​កសិករ​នោះ​ដោយសារ​មូលនិធិ​នេះ​ត្រូវ​បាន​ផ្តល់​ឲ្យ​វិស័យ​ឯកជន​ក្នុង​រូបភាព​កម្ចី​ដើម្បី​ឲ្យ​រោង​ម៉ាស៊ីន​កិនស្រូវ​មាន​ទុន​ទិញ​ស្រូវ​ពី​កសិករ។

រដ្ឋាភិបាល​ថៃ​របស់​លោកស្រី យីងឡាក់ ដើម្បី​ទាញ​យក​ប្រជាប្រិយភាព​ខាង​នយោបាយ​បាន​ចូល​អន្តរាគមន៍​ទីផ្សារ​ដោយ​រដ្ឋាភិបាល​ទទួល​ទិញ​ស្រូវ​ពី​កសិករ​លើស​ទីផ្សារ​ហួស​ហេតុ​ដែល​ទីបំផុត​នាំ​ឲ្យ​កើត​មាន​បញ្ហា។

ប៉ុន្តែ​បើ​គេ​មិន​គិត​ពី​នយោបាយ​វិញ​រដ្ឋាភិបាល​គួរ​តែ​ប្រមូល​ទិញ​ស្រូវ​ពី​កសិករ​ដោយ​ផ្ទាល់​ដូចគ្នា​នេះ​ក្នុង​តម្លៃ​សមរម្យ។ បើ​ទោះបី​យ៉ាង​នេះ​ក្តី​រដ្ឋាភិបាល​កម្ពុជា​ខ្លួន​ឯង​មក​ដល់​ពេល​នេះ​មិន​មាន​ឃ្លាំង​ស្តុក​ និង​សម្ងួត​ស្រូវ​ដើម្បី​ទទួល​ភារៈ​នេះ​នៅ​ឡើយ​ទេ។

តាម​ការ​ប្រកាស​របស់​ក្រសួង​សេដ្ឋកិច្ច​បាន​បញ្ជាក់​ថា RDB នឹង​ផ្ដល់​កម្ចី​នេះ​ដល់​រោង​ម៉ាស៊ីន​កិនស្រូវ​ដោយ​ដាក់​ស្ដុក​ស្រូវ​ជា​វត្ថុ​បញ្ចាំ​ និង​បាន​ស្នើ​ឲ្យ​រោង​ម៉ាស៊ីន​កិនស្រូវ​វិនិយោគ​ក្នុង​ការ​បង្កើន​សមត្ថភាព​ឃ្លាំង​របស់​ពួកគេ។

កាលពី​ថ្ងៃ​សុក្រ​ធនាគារ​ជាតិ​នៃ​កម្ពុជា (NBC) ក៏បាន​រៀបចំ​កិច្ចប្រជុំ​ជាមួយ​សមាគម​ធនាគារ​នៅ​ក្នុង​ប្រទេស​កម្ពុជា (ABC) និង​សមាគម​មីក្រូហិរញ្ញវត្ថុ​កម្ពុជា (CMA) ផង​ដែរ​ដើម្បី​ជំរុញ​ឲ្យ​មាន​ការ​ផ្តល់​កម្ចី​ក្នុង​អត្រា​ការប្រាក់​ទាប​ជាមួយ​នឹង​ផែនការ​សង​ត្រឡប់​ដោយ​មាន​ភាព​បទបែន។

បន្ទាប់​មក ABC និង CMA បាន​ចេញ​សេចក្ដី​ប្រកាស​រួម​មួយ​ដោយ​បញ្ជាក់​ថា​កម្ចី​នេះ​នឹង​មិន​ «ពឹង​តែ​លើ​ទ្រព្យ​សកម្ម​សម្រាប់​បញ្ចាំ​នោះ​ទេ»។

សេចក្ដី​ប្រកាស​ព័ត៌មាន​បន្ត​ថា៖ «ផ្អែក​លើ​អ្នក​ជំនាញ​ជា​សមាជិក​របស់​យើង​នៅ​ក្នុង​វិស័យ​នេះ​ការ​ផ្តល់​កម្ចី​ដល់​កសិកម្ម​ផ្អែក​លើ​អាជីវកម្ម​ដែល​បង្ហាញ​ពី​ភាព​ខ្លាំង​ផ្នែក​ហិរញ្ញវត្ថុ លំហូរ​សាច់​ប្រាក់ ប្រវត្តិ​នៃ​ការ​សង»។

សេចក្ដី​ប្រកាស​ព័ត៌មាន​ឲ្យ​ដឹង​ថា៖ «ការ​យក​ចិត្ត​ទុក​ដាក់​ពេលវេលា​ដ៏លំបាក​នេះ​សមាជិក ABC និង CMA នឹង​បន្ត​ផ្ដល់​កម្ចី​ដល់​កសិករ រោងម៉ាស៊ីន​កិនស្រូវ និង​ពាណិជ្ជករ​ដែល​មាន​លក្ខណ​សម្បត្តិ​គ្រប់គ្រាន់​ដើម្បី​គាំទ្រ​ដល់​អាជីវកម្ម​របស់​ពួកគេ»។

លោក ផុន ណារី អគ្គនាយក​រោង​ម៉ាស៊ីន​កិន​ស្រូវ Heng Huch Rice Mill នៅ​ខេត្ត​បាត់ដំបង​បាន​ឲ្យ​ដឹង​ថា​ក្រុមហ៊ុន​លោក​នឹង​ដាក់​ពាក្យ​សុំ​មូលនិធិ​ប្រហែល ១០០ ០០០ ដុល្លារ។

បច្ចុប្បន្ន​របស់​លោក​មាន​ស្តុក​ស្រូវ​ប្រហែល ៥០០ តោន។

លោក​ថ្លែង​ថា៖ «យើង​កំពុង​រង់ចាំ​កម្ចី​ទាំង​នេះ​អស់​រយៈពេល​យូរ​មក​ហើយ។ យើង​ដូចជា​ត្រី​ដែល​កំពុង​រង់ចាំ​ចំណី​អ៊ីចឹង។ ខ្ញុំ​សង្ឃឹម​ថា​នឹង​ទទួល​បាន​កម្ចី​នេះ​ក្នុង​ពេល​ឆាប់ៗ​ដើម្បី​យើង​អាច​រស់​ឡើង​វិញ​បាន»។

លោក សុង សារ៉ន អគ្គនាយក​ក្រុមហ៊ុន អេមរុ រ៉ាយស៍ ស្វាគមន៍​ដល់​ការ​ប្ដេជ្ញា​ចិត្ត​របស់​រដ្ឋាភិបាល។ លោក​បាន​បញ្ជាក់​ថា៖ «រោង​ម៉ាស៊ីន​កិន​ស្រូវ​បាន​និង​កំពុង​រង់ចាំ​ការ​ប្រកាស​នេះ​អស់​រយៈពេល​យូរ​មក​ហើយ»។

ប៉ុន្តែ​លោក​បញ្ជាក់​ថា​កម្ចី​នេះ​នឹង​គ្របដណ្ដប់​លើ​ចំណែក​នៃ​ទុន​ដែល​ត្រូវ​ការ​ដោយ​រោងម៉ាស៊ីន​កិន​ស្រូវ​ប៉ុណ្ណោះ​ដើម្បី​ទិញ​ស្រូវ​ពី​កសិករ​នៅ​ក្នុង​តម្លៃ​សមរម្យ។ យោង​តាម​លោក សារ៉ន ការ​ប្រមូល​ស្រូវ​សរុប​ចាប់​ពី​ខែ​សីហា​ដល់​ខែ​ធ្នូ​ជាធម្មតា​មាន​ចំនួន ១ លាន​តោន និង​ថា​មូលនិធិ​នេះ​នឹង​មាន​ចំនួន​ប្រហែល ១០ ភាគរយ​នៃ​ទុន​ត្រូវការ​ប៉ុណ្ណោះ។

លោក​បន្ថែម​ថា​គេ​ត្រូវការ ៥០ លាន​ដុល្លារ​បន្ថែម​ដើម្បី​ធានា​ឲ្យ​ប្រាកដ​ថា​តម្លៃ​បាន​រក្សា​ស្ថិរភាព និង​បាន​ជំរុញ​ឲ្យ​គ្រឹះស្ថាន​ហិរញ្ញវត្ថុ​ត្រូវ​បង្កើន​ការ​ផ្ដល់​កម្ចី និង​បន្ធូរបន្ថយ​ការ​រឹតបន្តឹង។

លោក​បន្ត​ថា៖ «បញ្ហា​របស់​វិស័យ​ស្រូវ​អង្ករ​អាច​ត្រូវ​បាន​ដោះស្រាយ​បាន​នៅ​ពេល​យើង​សហការ​ទាំង​អស់​គ្នា»។

លោក​បន្ថែម​ថា​នេះ​ជា​គំនិត​ផ្ដួចផ្ដើម​ជា​សាធារណៈ​ហើយ​ថា​រដ្ឋាភិបាល​គួរ​តែ​បន្ត​ដាក់​សម្ពាធ​លើ​គ្រឹះស្ថាន​ហិរញ្ញវត្ថុ។

លោក​បញ្ជាក់​ថា៖ «ខ្ញុំ​នៅ​តែ​អំពាវនាវ​ដល់​ធនាគារ​ត្រូវ​បន្ត​ផ្ដល់​កម្ចី​ដល់​រោង​ម៉ាស៊ីន​កិនស្រូវ។ នៅ​ពេល​រោង​ម៉ាស៊ីន​កិន​ស្រូវ​មាន​មូលនិធិ​នេះ​ពួកគេ​អាច​ទិញ​ស្រូវ​បាន​ច្រើន​ពី​កសិករ​ដែល​ធ្វើ​ឲ្យ​វិស័យ​នេះ​កាន់​តែ​មាន​ស្ថិរភាព»។

លោក អ៊ិន ចាន់នី ប្រធាន​អគ្គនាយក​ធនាគារ​អេស៊ីលីដា​បាន​ឲ្យ​ដឹង​ថា​ធនាគារ​លោក​នៅ​តែ​កំពុង​ពង្រីក​ផលបត្រ​ផ្ដល់​កម្ចី​ដល់​វិស័យ​កសិកម្ម។ លោក​បន្ត​ថា​ធនាគារ​នេះ​បាន​បង្កើន​ចំនួន​កម្ចី​ដែល​បាន​ផ្ដល់​ដល់​រោង​ម៉ាស៊ីន​កិន​ស្រូវ​នីតិបុគ្គល​ពី​ ៣០០ កាល​ពី​ឆ្នាំ​មុន ដល់ ៤០៥ ត្រឹម​ចុង​ខែ​សីហា​ឆ្នាំ​នេះ។

ក្នុង​ចំណោម​ទឹកប្រាក់ ២,៦៧ ពាន់​លាន​ដុល្លារ​ដែល​ធនាគារ​អេស៊ីលីដា​បាន​ផ្តល់​ជា​កម្ចី​លោក ចាន់នី បាន​ឲ្យ​ដឹង​ថា​ទឹកប្រាក់ ៥០០ លាន​ដុល្លារ​កំពុង​ស្ថិត​ក្នុង​វិស័យ​កសិកម្ម​ជា​តួលេខ​មួយ​ដែល​លោក​បាន​ជឿជាក់​ថា​មាន​ប្រហែល ៤០ ភាគរយ។

លោក​បាន​បញ្ជាក់​ថា៖ «យើង​តែងតែ​រៀបចំ​ផែនការ​ក្នុង​ការ​ពង្រីក​កម្ចី​សម្រាប់​វិស័យ​កសិកម្ម​រួម​ទាំង​ស្រូវ»៕ LA

0

Comments

Please, login or register to post a comment