.jpg)
លោក Bill Gates ក្នុងកម្មវិធីសន្ទនាមួយកាលពីសប្តាហ៍មុន។ រូបថត AFP
ក្រុងវ៉ាស៊ីនតោនៈ មហាសេដ្ឋីជាតិអាមេរិក លោក Bill Gates បានឲ្យដឹងថា លោកបានចំណាយលើការបង់ពន្ធជាង ១០ ពាន់លានដុល្លារក្នុងមួយជីវិតរបស់លោក តែមហាសេដ្ឋីពាន់លានជាច្រើនរូបដូចរូបលោកដែរនោះ គួរតែបង់ពន្ធ «ច្រើន» ថែមទៀត ដោយសារពួកគេទទួលបានផលប្រយោជន៍ពីប្រព័ន្ធពន្ធ។
សហស្ថាបនិកក្រុមហ៊ុន Microsoft និងជាបុរសមានទ្រព្យសម្បត្តិច្រើនជាងគេទីពីរក្នុងពិភពលោក បន្ទាប់ពីលោក Jeff Bezos ស្ថាបនិកក្រុមហ៊ុន Amazon បានរិះគន់ចំពោះកំណែទម្រង់ពន្ធនៅសហរដ្ឋអាមេរិកនាពេលថ្មីៗនេះ ដែលបានកាត់បន្ថយពន្ធលើប្រាក់ចំណេញរបស់ក្រុមហ៊ុន និងបានកាត់បន្ថយពន្ធចំពោះបុគ្គលដែលមានប្រាក់ចំណូលខ្ពស់។
លោកបានឲ្យដឹងក្នុងបទសម្ភាសមួយ កាលពីថ្ងៃអាទិត្យ ជាមួយនឹងស្ថានីយទូរទស្សន៍ CNN ថា៖ «ខ្ញុំបានបង់ពន្ធច្រើនជាង ១០ពាន់លានដុល្លារ ច្រើនជាងអ្នកផ្សេងទៀត តែរដ្ឋាភិបាលគប្បីតម្រូវឲ្យមនុស្សដែលឋិតក្នុងស្ថានភាពដូចរូបខ្ញុំ បង់ពន្ធកាន់តែច្រើនផងដែរ»។
លោកបានឲ្យដឹងថា កំណែទម្រង់ពន្ធដែលត្រូវបានអនុម័តកាលពីខែធ្នូនេះ ផ្តល់ប្រយោជន៍ដល់ក្រុមអ្នកមានទ្រព្យសម្បត្តិច្រើន បើទោះជាគណបក្សសាធារណរដ្ឋអះអាងថា វានឹងជួយប្រជាជនដែលមានប្រាក់ចំណូលមធ្យម និងអ្នកធ្វើការងារតូចតាចក្តី។
លោកថ្លែងថា៖ «អ្នកដែលមានទ្រព្យសម្បត្តិកាន់តែច្រើន ទំនងជាទទួលបានអត្ថប្រយោជន៍ច្រើនជាងអ្នកដែលមានប្រាក់ចំណូលមធ្យម ឬអ្នកដែលមានជីវភាពក្រីក្រ។ ដូច្នេះហើយ វាផ្ទុយពីនិន្នាការទូទៅដែលអ្នកចង់ឃើញ នោះគឺសំណាញ់សុវត្ថិភាពសង្គម កំពុងតែរឹងមាំកាន់តែខ្លាំង និងអ្នកដែលមានទ្រព្យសម្បត្តិច្រើន កំពុងបង់ពន្ធកាន់តែច្រើន»។
ដោយ ១ ភាគ ៦ នៃប្រជាជនអាមេរិកកំពុងរស់នៅក្នុងអ្វីដែល លោកចាត់ទុកថា ជាស្ថានភាពដ៏ «គួរឲ្យខកចិត្ត» នោះ លោកមានប្រសាសន៍ថា ក្រុមអ្នកបង្កើតគោលនយោបាយអាមេរិក ចាំបាច់ត្រូវពិចារណាលើវិសមភាពដែលកំពុងកើនឡើង និងសួរថា «ហេតុអ្វីបានជាយើងមិនអាចធ្វើការងារបានកាន់តែប្រសើរសម្រាប់ប្រជាជនទាំងនោះ?»៕ AFP/BP
