ភ្នំពេញៈ អ្នកនៅក្នុងឧស្សាហកម្មស្រូវអង្ករកម្ពុជា មានជំនឿថា ការប្រើឈ្មោះ «ម្លិះអង្គរ» ជាយីហោអង្ករក្រអូបប្រណីតរបស់កម្ពុជាសម្រាប់ការនាំចេញទៅទីផ្សារអន្តរជាតិនឹងជំរុញការនាំចេញកាន់តែខ្លាំងឡើង ខណៈសហព័ន្ធស្រូវអង្ករកម្ពុជា (CRF) ជំរុញឲ្យអ្នកពាក់ព័ន្ធធ្វើការរួមគ្នាដើម្បីលើកកម្ពស់ឧស្សាហកម្មនេះ។
ការលើកឡើងនេះ ធ្វើឡើងក្នុងវេទិកាស្រូវអង្ករកម្ពុជាលើកទី ៦ រយៈពេល ២ ថ្ងៃ ដែលបានរៀបចំឡើង កាលពីថ្ងៃចន្ទនៅទីក្រុងភ្នំពេញ។
វេទិកានេះ ធ្វើឡើងក្នុងគោលបំណងក្នុងការចែករំលែកទស្សនៈ និងបទពិសោធក្នុងចំណោមក្រុមជំនាញ និងភាគីពាក់ព័ន្ធផ្សេងទៀត ដើម្បីដោះស្រាយបញ្ហាប្រឈមនៅក្នុងវិស័យស្រូវអង្ករ។
ព្រឹត្តិការណ៍នេះមានការចូលរួមពីមន្ត្រីរដ្ឋាភិបាល ក្រុមហ៊ុននាំចេញអង្ករ វិស័យឯកជន និងសហករណ៍កសិករ ។
លោក សុខ ពុទ្ធីវុធ ប្រធានសហព័ន្ធស្រូវអង្ករកម្ពុជាបានថ្លែងថា យីហោអង្ករនេះមានសារៈសំខាន់ខ្លាំងណាស់ក្នុងការចូលទៅទីផ្សារប្រកបដោយស្ថិរភាព និងការអភិវឌ្ឍប្រកបដោយនិរន្តរភាពរបស់វិស័យស្រូវអង្ករកម្ពុជា។
លោកថ្លែងថា៖ «យីហោអង្ករមានសារៈសំខាន់សម្រាប់ការទៅដល់ទីផ្សារប្រកបដោយស្ថិរភាព យីហោនេះនឹងបិទភ្ជាប់នឹងបាវអង្កររបស់ក្រុមហ៊ុននាំចេញនីមួយៗដែលធានាគុណភាព និងប្រភពដើមរបស់អង្ករតម្លៃខ្ពស់ និងអង្ករក្រអូបមកពីប្រទេសកម្ពុជាសម្រាប់អតិថិជនអន្តរជាតិ»។
លោកថ្លែងថា៖ «យើងចាប់ផ្ដើមយុទ្ធនាការ ឬការលើកកម្ពស់រួមគ្នា ដោយផ្អែកលើយីហោអង្ករ ម្លិះអង្គរ តែមួយគត់ យីហោនេះនឹងចាប់ផ្ដើមអនុវត្តនៅឆ្នាំនេះ»។
លោកបន្ថែមថា យីហោនេះនឹងបង្កើនទំនុកចិត្តទីផ្សារ និងបង្កើនការនាំចេញអង្កររបស់កម្ពុជា។
លោកថ្លែងថា៖ «ជំហានបន្ទាប់យើងនឹងសហការជាមួយបណ្ដាញទីផ្សារផ្សេងទៀតដើម្បីកំណត់ស្ដង់ដារ និងនីតិវិធី ដើម្បីធានាគុណភាពសម្រាប់ទីផ្សារអន្តរជាតិ ខ្ញុំជឿជាក់ថា ការនាំចេញអង្ករយើងនឹងកើនឡើង»។
បើទោះបីយ៉ាងនេះក្តី ដើម្បីធានាការអភិវឌ្ឍប្រកបដោយស្ថិរភាពរបស់វិស័យស្រូវអង្ករ សហព័ន្ធស្រូវអង្ករកម្ពុជា នឹងផ្ដោតលើការពង្រឹងលើការគ្រប់គ្រងផ្ទៃក្នុង ជាពិសេសធ្វើការងារជាមួយកសិករ ដើម្បីបង្ហាញពីការធ្វើទំនើបកម្មកសិករក្នុងការកាត់បន្ថយតម្លៃផលិត និងលើកកម្ពស់ផលិតភាព។ នេះបើតាមលោក សុខ ពុទ្ធីវុធ។
លោកស្រី ឃី មុនី អ្នកគ្រប់គ្រងទូទៅនៅក្រុមហ៊ុន AMRU Rice (Cambodia) Co.,Ltd ស្វាគមន៍ការសម្រេចយក យីហោនេះ ខណៈបញ្ហានេះត្រូវបានរង់ចាំអស់រយៈពេលជាច្រើនឆ្នាំមកហើយ។
លោកស្រីថ្លែងថា៖ «បើគ្មានការកំណត់ជាក់លាក់នៃអង្កររបស់យើងទេ យើងនឹងមិនទទួលបានកម្រិតជាក់លាក់ណាមួយសម្រាប់គុណភាពអង្ករនោះទេ»។
លោកស្រីបន្តថា៖ «ឈ្មោះនេះនឹងបញ្ឈប់ជម្លោះទាំងអស់ និងការច្រឡំឈ្មោះជាមួយប្រទេសជិតខាង»។
តាមលោក សុខ ពុទ្ធីវុធ ការធ្វើទំនើបកម្មវិស័យស្រូវអង្ករកម្ពុជា គឺឲ្យស្របទៅនឹងនិន្នាការទីផ្សារពិភពលោក ទាំងសមត្ថភាពប្រកួតប្រជែងខាងតម្លៃ កំណើនផលិតភាព និងការលើកកម្ពស់ការនាំចេញ។
លោកថ្លែងថា៖ «យើងចាប់ផ្ដើមបង្កើនការយល់ដឹងពីទំនើបកម្ម ពង្រឹងសហករណ៍ និងបណ្ដាញកសិកម្ម ដើម្បីទទួលបានមូលនិធិដើម្បីសម្រេចបានប្រព័ន្ធទំនើបកម្ម»។
សហព័ន្ធស្រូវអង្ករកម្ពុជា នឹងសហការជាមួយអ្នកបច្ចេកទេសមកពីប្រទេសអូស្ដ្រាលី ព្រមទាំងក្រសួងពាណិជ្ជកម្ម និងក្រសួងកសិកម្មដើម្បីលើកកម្ពស់ការធ្វើទំនើបកម្មកសិកម្ម។
ទាក់ទងនឹងកិច្ចព្រមព្រៀងជាមួយប្រទេសបង់ក្លាដែស លោក ពុទ្ធីវុធ បានបញ្ជាក់ថា បញ្ហាសំខាន់ជាប់ទាក់ទងនឹងតម្លៃ និងពេលវេលានៃការចែកចាយ។ ទោះបីយ៉ាងនេះក្តីលោកនៅតែរំពឹងថា កម្ពុជានឹងអាចនាំចេញអង្ករទៅប្រទេសបង់ក្លាដែសនៅឆ្នាំនេះ។
ប្រភេទអង្ករ ដែលត្រូវបានដាក់បញ្ចូលជាអង្ករក្រអូបប្រណីតដែលនឹងត្រូវបិទយីហោ «ម្លិះអង្គរ» នេះរួមមាន អង្ករផ្ការំដេង អង្ករផ្ការំដួល ផ្ការមៀត និងអង្ករសុម៉ាលី។
លោក នីល សុភាព ប្រធានសហព័ន្ធអង្គការអភិវឌ្ឍន៍កសិករកម្ពុជា ដែលចូលរួមវេទិកាស្រូវអង្ករនេះ សង្ឃឹមយ៉ាងមុតមាំថា យីហោនេះនឹងធ្វើឲ្យការនាំចេញអង្កររបស់កម្ពុជាមានទ្រង់ទ្រាយកាន់តែធំ។
លោកថ្លែងថា៖«យីហោអង្ករនឹងលើកកម្ពស់តម្រូវការអង្ករដែលនឹងឆ្លុះបញ្ចាំងពីតម្រូវការកាន់តែច្រើនពីកសិករ ដែលនឹងបង្កើនប្រាក់ចំណូលដល់ពួកយើង»។
លោកបន្ថែមថា ការធ្វើទំនើបកម្មកសិករ ត្រូវការពេលវេលាដើម្បីលើកកម្ពស់ការយល់ដឹងដល់កសិករ ឲ្យស្របនឹងប្រព័ន្ធបច្ចេកវិទ្យាថ្មីនេះ។
លោកបន្ថែមថា៖ «វាជាគោលនយោបាយដ៏ល្អដែលជំរុញឲ្យមានការធ្វើទំនើបកម្ម ប៉ុន្តែការយល់ដឹងរបស់កសិករ គឺនៅតែមានកម្រិតក្នុងការទទួលយក ខ្ញុំគិតថា វាត្រូវការពេលវេលាក្នុងការដឹកជញ្ជូន និងត្រូវការការគាំទ្រហិរញ្ញវត្ថុជាច្រើនពីរដ្ឋាភិបាល ដើម្បីជំរុញឲ្យការងារនេះកើតឡើង»៕ LA