Search form

Login - Register | FOLLOW US ON

Logo of Phnom Penh Post newspaper Phnom Penh Post - សក្តានុពល​ពាណិជ្ជកម្ម​អន​ឡាញ​ កម្ពុជា​នៅ​ធំ ​នៅ​ឡើយ

Content image - Phnom Penh Post
អ្នក​ប្រើ​ប្រាស់​កំពុង​បើក​មើល​កម្មវិធី ទូទាត់​ប្រាក់​តាម​អនឡាញ​ Pay&Go នៅ​ក្នុង​ទូរស័ព្ទ​ចល័ត។ ផា លីណា

សក្តានុពល​ពាណិជ្ជកម្ម​អន​ឡាញ​ កម្ពុជា​នៅ​ធំ ​នៅ​ឡើយ

ភ្នំពេញៈ ខណៈ​ច្បាប់​ពាណិជ្ជកម្ម​អេឡិច​ត្រូនិក ដែល​រង់ចាំ​ជា​យូរ​មក​ហើយ ត្រូវ​បាន​គេ​រំពឹង​ថា​នឹង​អនុម័ត​នៅ​ឆ្នាំ​ក្រោយ ហើយ​កំពុង​បង្កើន​ល្បឿន​ដើម្បី​ចាប់​យក​កំណើន​ពាណិជ្ជកម្ម​អេឡិច​ត្រូនិក ដោយ​ក្រុមហ៊ុន​ជាច្រើន​កំពុង​បង្ហាញ​ថា​ខ្លួន​ឯង​នឹង​ទទួល​បាន​ចំណែក​ទីផ្សារ​ដ៏​ធំ​នៃ​ទីផ្សារ​ក្មេង​ខ្ចី​នេះ​។

ការ​ទូទាត់​តាម​អន​ឡាញ​នៅ​តែ​ជា​បែប​បទ​ដែល​មាន​ការ​អភិវឌ្ឍ​តិច​តួច​បំផុត​នៃ​ប្រតិបត្តិការ​ហិរញ្ញវត្ថុ​នៅ​ក្នុង​ប្រទេស​កម្ពុជា ដែល​ភាគ​ច្រើន​បំផុត​នៃ​ការ​ទិញ​ត្រូវ​បាន​ធ្វើ​ដោយ​សាច់​ប្រាក់ ទោះ​បី​ជា​ការ​ទិញ​នោះ​ធ្វើ​ឡើង​តាម​អន​ឡាញ​ក៏ដោយ​។ ការ​រួម​បញ្ចូល​គ្នា​ជាមួយ​នឹង​កម្រិត​នៃ​ការ​ប្រើ​ប្រាស់​ប្រព័ន្ធ​ធនាគារ​ទាប​របស់​ប្រជាជន កង្វះ​ចំណេះ​ដឹង​ឌីជីថល និង​ប្រព័ន្ធ​ទូទាត់​ប្រាក់​នៅ​ពេល​បញ្ជូន​ទំនិញ (COD) បាន​ធ្វើ​ឲ្យ​ការ​ទូទាត់​តាម​អន​ឡាញ ជា​អាទិភាព​ទាប​សម្រាប់​ក្រុមហ៊ុន​ក្នុង​ស្រុក​ជាច្រើន​និង​អតិថិជន​របស់​ពួក​គេ​។

លោក Evgeny Kagay អ្នក​គ្រប់​គ្រង​ទូទៅ​នៅ​ក្រុមហ៊ុន Pay&Go ជា​កម្មវិធី​ទូទាត់​ប្រាក់ ដែល​ផ្ដល់​សេវា​ទូទាត់​តាម​រយៈ​បញ្ជរ ព្រម​ទាំង​តាម​រយៈ​ទូរស័ព្ទ​លើ​តុ និង​កម្មវិធី​ចល័ត បាន​ឲ្យ​ដឹងថា ដើម្បី​ធ្វើ​ឲ្យ​មាន​ការ​ទទួល​យក​ការ​ទូទាត់​អេឡិច​ត្រូនិក​របស់​កម្ពុជា​រីក​ចម្រើន លោក​ចង់​ឃើញ​ឧស្សាហ​កម្ម​នេះ​ទាំង​មូល​រួមគ្នា​ធ្វើ​ការងារ​ឆ្ពោះទៅ​ទិសដៅ​រួម​នៃ​ការ​ជំរុញ​ការ​អប់រំ​ប្រជាជន​កម្ពុជា​ភាគ​ច្រើន​ដែល​មិន​យល់​ដឹង​ពី​របៀប​ក្នុង​ការ​បង់ប្រាក់​ថ្លៃទំនិញ​តាម​អន​ឡាញ​។

លោក​បន្តថា​៖ «​ខ្ញុំ​គិត​ថា នៅ​តែ​មាន​គម្លាត​ដ៏​ធំ​រវាង​សាធារណជន​ទូទៅ និង​ប្រជាជន​ដែល​យល់​ដឹង​តិច ឬ​ច្រើន​ពី​របៀប​ប្រតិបត្តិការ​សាច់​ប្រាក់​នេះ​»​។

ទោះបី​ជាមាន កិច្ចការ​ជាច្រើន​ត្រូវ​បាន​ធ្វើ​ដោយ​សហព័ន្ធ​បច្ចេកវិទ្យា​ព័ត៌មាន​វិទ្យា និង​ទូរគមនាគមន៍ (ICT) និង​ក្រសួង​ទូរគមនាគមន៍​ក៏​ដោយ ក៏​យើង​មាន​អារម្មណ៍​ថា នៅ​តែ​មាន​គម្លាត​ដែល​ប្រជាជន​ប្រកាន់​ប្រពៃណី​អនុវត្ត​តាម​តម្រាប់​ដូនតា​របស់​ពួក​គេ​»​។

ក្រុមហ៊ុន Pay&Go ផ្ដល់​សេវា MasterCard ដែល​អនុញ្ញាត​ឲ្យ​អតិថិជន​មិន​ប្រើ​ប្រាស់​ធនាគារ​អាច​ទិញ​តាម​អន​ឡាញ​តាម​លក្ខខណ្ឌ​កាន់​តែ​ងាយស្រួល ដោយ​គ្រាន់​តែ​បង្កើត​គណនី​នៅ​ក្នុង​ធនាគារ​មួយ​។ ប៉ុន្តែ​លោក Kagay នៅ​តែ​មើល​ឃើញ​ថា​ប្រព័ន្ធ​ទូទាត់​ទាំង​នេះ​នៅ​តែ​យឺត ជា​ពិសេស​នៅ​តាម​ខេត្ត​នានា ដោយ​សារ​កង្វះ​ការ​អប់រំ​ឌីជីថល​ដល់​អតិថិជន ដែល​កំពុង​បង្ក​ជា​បញ្ហា​ប្រឈម​មួយ​ក្នុង​ចំណោម​បញ្ហា​ប្រឈម​សំខាន់ៗ​សម្រាប់​ការ​ទទួល​យក​ការ​ទូទាត់​តាម​អន​ឡាញ​ឲ្យ​កាន់​តែ​ទូលំ​ទូលាយ​។

លោក​លើក​ឡើង​ថា​៖ «​ច្បាស់​ណាស់ យើង​ទាំង​អស់​គ្នា​ចង់​រក​ប្រាក់ និង​ធ្វើ​ឲ្យ​ប្រាកដ​ដល់​អាជីវកម្ម​របស់​យើង ប៉ុន្តែ​ជារួម​យើង​ចង់​ឲ្យ​ប្រជាជន​កម្ពុជា មិន​គ្រាន់​តែ​នៅ​ក្នុង​ទីក្រុង​ភ្នំពេញ​ប៉ុណ្ណោះ​ទេ ប៉ុន្តែ​សម្រាប់​អ្នក​នៅ​តាម​បណ្ដា​ខេត្ត​អាច​យល់ដឹង​ពី​វិធី​ងាយៗ​ដល់​ប្រតិបត្តិការ​សាច់​ប្រាក់​ជា​រៀង​រាល់​ថ្ងៃ​»​។

លោក​បន្ត​ថា​៖ «​ពិត​ហើយ ទីក្រុង​ភ្នំពេញ​នៅ​ពេល​នេះ​កំពុង​ឆ្ពោះ​ទៅ​មុខ​ទាក់ទង​នឹង​ការ​យល់​ដឹង​របស់​ប្រជាជន​នៃ​អ្វី​ដែល​ពាណិជ្ជកម្ម​អេឡិច​ត្រូនិក និង​អ្វីដែល​វា​ជា​មធ្យោបាយ​ទូទៅ​ក្នុង​ការ​ប្រតិបត្តិការ ការទិញ​ទំនិញ ឬ​ការទិញ​តាម​អន​ឡាញ ប៉ុន្តែ​នៅ​តាម​ខេត្ត ស្ថានភាព​គឺ​នៅ​តែ​មិន​ត្រូវ​បាន​អភិវឌ្ឍ​ខ្លាំង​នោះ​ទេ​»​។

សារៈ​សំខាន់​ចំពោះ​បញ្ហា​នៃ​ការ​ទូទាត់​តាម​អន​ឡាញ​គឺ​ច្បាប់​ពាណិជ្ជកម្ម​អេឡិចត្រូនិក​ដែល​ពន្យារ​ពេល​ជា​យូរ ត្រូវ​បាន​រំពឹង​ថា នឹង​ដាក់​ជូន​រដ្ឋ​សភា​នៅ​អំឡុង​ពេល​ឆ្នាំ​២០១៧ គឺ​មាន​រយៈពេល​៨​ឆ្នាំ​បន្ទាប់​ពី​ច្បាប់​នេះ​ត្រូវ​បាន​ប្រកាស​ជា​លើក​ដំបូង​។

លោក Kagay មើល​ឃើញ​ការ​អនុម័ត​ច្បាប់​នេះ​ជា​ផ្នែក​មួយ​ដ៏​សំខាន់​សម្រាប់​ជំរុញ​ការ​ទូទាត់​តាម​អន​ឡាញ ការពារ​អតិថិជន និង​ក្រុមហ៊ុន ព្រម​ទាំង​កាត់​បន្ថយ​ភាព​មិន​ច្បាស់​លាស់ ជុំវិញ​ពាណិជ្ជកម្ម​អេឡិច​ត្រូនិក​ដែល​មាន​បច្ចុប្បន្ន​។

លោក Mike Gaertner ប្រធាន​ប្រតិបត្តិការ​ក្រុមហ៊ុន Sabay Digital បាន​ជំរុញ​ក្រុមហ៊ុន​របស់​លោក​ឆ្ពោះ​ទៅ​មុខ​យ៉ាង​រហ័ស​ក្នុង​ការ​ទទួល​យក​ការ​ទូទាត់​តាម​អន​ឡាញ​។

ក្នុង​អំឡុង​សន្និសីទ​ ដែល​បាន​រៀបចំ​ឡើង​ដោយ ICT Federation កាល​ពី​ឆ្នាំ​មុន លោក​បាន​ឲ្យ​ដឹង​ថា លោក​សង្ឃឹម​ថា ក្រុមហ៊ុន​នេះ​នឹង​ប្រតិបត្តិការ​សាច់​ប្រាក់​ដោយ​សេរី​ត្រឹម​ឆ្នាំ​២០១៧​។

លោក​បាន​ពន្យល់​ថា ក្រុមហ៊ុន​ទូរគមនាគមន៍​ផ្សេង​ទៀត​បាន​ប្រតិបត្តិការ​តាម​រយៈ​ការ​ទូទាត់​ដោយ​ផ្អែក​លើ​ក្រដាស​ស្នាម​ដែល​តម្រូវ​ឲ្យ​មាន​បណ្ដាញ​ភ្នាក់ងារ​ដ៏​ធំ​ទូទាំង​ប្រទេស ដែល​ចែក​ចាយ​កាត​កោស​ដល់​អតិថិជន​សម្រាប់​ការ​ទូទាត់ ហើយ​នេះ​ជា​អ្វីដែល Sabay កំពុង​ចៀស​វាង​។

យោង​តាម​ការ​ស្រាវ​ជ្រៀវ​ផ្ទាល់​របស់ លោក Gaertner ផ្អែកលើ​ទិន្នន័យ​ធនាគារ​ជាតិ​នៃ​កម្ពុជា លោក​ជឿថា គ្រឹះ​ស្ថាន​ហិរញ្ញវត្ថុ​របស់​កម្ពុជា​ខក​ខាន​ចាប់​យក​ប្រាក់​ចំណេញ​ពី​ពាណិជ្ជកម្ម​អន​ឡាញ ខណៈ​ការ​ប្រើ​ប្រាស់​ប្រព័ន្ធ​ធនាគារ​កំពុង​កើន​ឡើង​។

លោក​បញ្ជាក់​ថា តួលេខ​របស់ NBC បាន​បង្ហាញ​ថា ត្រឹម​ចុង​ឆ្នាំ ​២០១៥ កាត​ឥណ​ពន្ធ​ ១,៤ ​លាន​ត្រូវ​បានចេញ​។ លោក​បន្ថែម​ថា ទំនុក​ចិត្ត​ដែល​កំពុង​កើន​ឡើង​នៅក្នុង​គ្រឹះស្ថាន​ហិរញ្ញវត្ថុ​របស់​ប្រទេស​នេះ​កំពុង​បង្កើន​ចំនួន​មូលនិធិ​ដែល​អាច​ត្រូវបាន​ប្រើប្រាស់​សម្រាប់​ការទូទាត់​តាមរយៈ​ឌីជីថល​។

លោក​ថ្លែងថា​៖ «​មាន​ប្រាក់​បញ្ញើ​ដោយ​ផ្ទាល់​ជា​ដុល្លារ​ប្រហែល ​២,៥​ ពាន់​លាន​ដុល្លារ ដែល​មាន​ន័យ​ថា ប្រាក់​អាច​ត្រូវបាន​ដកចេញ​ពី​ធនាគារ​ដោយ​មិនមាន​ការ​ជូន​ដំណឹង​»​។

លោក​បន្ថែម​ថា តួលេខ​នេះ​រួមបញ្ចូល​ទាំង​ប្រាក់​បញ្ញើ​បុគ្គល និង​ក្រុមហ៊ុន​។ លោក​បន្តថា​៖ «​ទឹកប្រាក់​២,៥​ពាន់​លាន​ដុល្លារ​ដាក់​នៅក្នុង​ធនាគារ ដោយមាន​កាត អេ​ធី​អឹម​ ១,៥​ លាន​កាត ក្នុង​នោះ​៨០​ម៉ឺន​កាត​ត្រូវ​បាន​ចេញ​ដោយ​អេស៊ីលីដា​»​។

​ប៉ុន្តែ​បើ​យោង​តាម​លោក Gaertner បញ្ហា​គឺថា អេស៊ីលីដា​ជា​ធនាគារ​តែ​មួយ​គត់​ដែល​មាន​ការ​ទូទាត់​ផ្ទាល់​ខ្លួនឯង​តាម​អន​ឡាញ​សម្រាប់​កាត​អេ​ធី​អឹម​របស់​ខ្លួន​។

លោក​បញ្ជាក់​ថា លើស​ពី​នេះ ដំណើរ​ការ​អនុវត្ត​ប្រព័ន្ធ​ទូទាត់​តាម​អន​ឡាញ​សម្រាប់​ក្រុមហ៊ុន​ជាមួយ​ធនាគារ​អេស៊ីលីដា​មាន​រយៈពេល​វែង និង​មាន​បញ្ហា​បច្ចេកទេស ដែល​ធ្វើ​ឲ្យ​ក្រុម ហ៊ុន​តូចៗ​មានការ​ពិបាក​ក្នុង​ការ​មាន​លទ្ធភាព​ប្រើប្រាស់​ប្រព័ន្ធ​ដូច​នោះ​។

Mango Tango ជា​ក្រុមហ៊ុន​ទីផ្សារ និង​ប្រព័ន្ធ​ផ្សព្វផ្សាយ​មាន​មូលដ្ឋាន​នៅ​កម្ពុជា ពេល​ថ្មីៗ​បាន​ប្រកាស​ថា ខ្លួន​នឹង​ចេញ​ផ្សាយ​របាយការណ៍​ស្ដីពី​ពាណិជ្ជកម្ម​អេឡិច​ត្រូនិក​របស់​កម្ពុជា​ឆាប់ៗ សម្រាប់​គំនិត​ផ្ដួចផ្ដើម​អាជីវកម្ម​មេគង្គ​របស់ ADB​។

​ផ្អែកលើ​ការ​ស្រាវ​ជ្រាវ លោក Chris McCarthy អគ្គនាយក Mango Tango បាន​កត់​សម្គាល់​ថា បញ្ហា​ប្រឈម​មួយ​ចំនួន​កំពុង​រារាំង​ការ​រីក​ចម្រើន​របស់​ពាណិជ្ជកម្ម​អេឡិច​ត្រូនិក នៅ​កម្ពុជា​ដូចជា​សមត្ថភាព IT របស់​ក្រុមហ៊ុន​នៅ​ខ្សោយ ជាដើម​៕ LA

0

Comments

Please, login or register to post a comment

ព័ត៌មានពាក់ព័ន្ធ