ក្រុងវ៉ាស៊ីនតោនៈ លោកប្រធានាធិបតីអាមេរិក ដូណាល់ ត្រាំ នៅថ្ងៃព្រហស្បតិ៍គ្រោងនឹងប្រកាសពីទណ្ឌកម្មប្រឆាំងនឹងប្រទេសចិន ជុំវិញ «ការលួច» កម្មសិទ្ធិបញ្ញារបស់អាមេរិក ដែលអាចបង្កឲ្យមានការប្រឈមមុខដាក់គ្នាជាលើកទពីរក្នុងរយៈពេលជាច្រើនខែ។ នេះបើយោងតាមមន្ត្រីសេតវិមាន។
លោក Raj Shah អ្នកនាំពាក្យសេតវិមានបានប្រាប់ទីភ្នាក់ងារព័ត៌មាន AFP ថា លោក ត្រាំ នឹងប្រកាសឲ្យដឹងពីវិធានការមួយចំនួន បន្ទាប់ពី «ការស៊ើបអង្កេតក្នុងកិច្ចខិតខំប្រឹងប្រែងបង្ខូចទីផ្សារ ដែលដឹកនាំដោយរដ្ឋរបស់ ចិន ដើម្បីបង្ខំដាក់សម្ពាធ និងលួចបច្ចេកវិទ្យា និងកម្មសិទ្ធិបញ្ញារបស់អាមេរិក»។
រដ្ឋាភិបាលក្រុងប៉េកាំង បានព្រមានរួចជាស្រេចដល់រដ្ឋបាលរបស់លោក ត្រាំ ប្រឆាំងនឹងវិធានការនេះ ដោយបានជំរុញមិនឲ្យលោក ត្រាំ ធ្វើការងារទៅតាម «អារម្មណ៍»។ វាមានរយៈពេលត្រឹមតែប៉ុន្មានសប្តាហ៍ប៉ុណ្ណោះ គិតចាប់តាំងពីលោក ត្រាំ បានប្រកាសពីទណ្ឌកម្មមួយចំនួនលើដែកថែប និងអាលុយមីញ៉ូម ដែលត្រូវបានផលិតនៅបរទេស។
វិធានការនោះបានជំរុញឲ្យមានការលាលែងចេញពីតំណែងរបស់លោក Gary Cohn ទីប្រឹក្សាសេដ្ឋកិច្ចជាន់ខ្ពស់របស់អាមេរិក ការលក់ចេញភាគហ៊ុននៅលើទីផ្សារពិភពលោក ជម្លោះផ្លូវច្បាប់ និងការគំរាមកំហែងស្តីពីវិធានការវាយបកវិញ។
លោក Jerome Powell ប្រធានធនាគារកណ្តាលអាមេរិកបានរំឭកកាលពីថ្ងៃពុធថា ចក្ខុវិស័យនៃសង្គ្រាមពាណិជ្ជកម្ម គឺជាការគំរាមកំហែងដែលកំពុងកើនឡើងមួយចំពោះសេដ្ឋកិច្ចធំជាងគេរបស់ពិភពលោកមួយនេះ។ តែលោកប្រធានាធិបតីដែលមិនសូវពិចារណាវែងឆ្ងាយមួយនេះ កំពុងបង្ហាញថាគ្មានសញ្ញានៃការចុះញមនោះទេ៕ AFP/BP