.jpg)
រូបភាពណ៌ធម្មជាតិដែលបង្ហាញចេញពីបាតដៃរបស់សត្វដែលជាតួអង្គ នៅពេលដែលយកសាប៊ូទៅដុសលាងពីលើ។ រូបថត campaignbrief.com
ភ្នំពេញ ក្រុមហ៊ុន McCann Health បានប្រកាសកាលពីសប្តាហ៍មុនថា ខ្លួនបានសហការជាមួយក្រុមហ៊ុន ANGFA ដើម្បីបង្កើតសៀវភៅរូបភាពលើកដំបូងក្នុងពិភពលោកដែលអាចដុសលាងនឹងសាប៊ូបាន ក្នុងយុទ្ធនាការមួយដើម្បីជួយអប់រំកុមារក្នុងប្រទេសកំពុងអភិវឌ្ឍន៍ដែលរួមមានទាំងកម្ពុជាដែរនោះអំពីអត្ថប្រយោជន៍នៃការប្រើប្រាស់សាប៊ូសម្លាប់មេរោគ។
យោងតាមគេហទំព័រ campaignbrief.com គោលបំណងរបស់សៀវភៅដែលអាចដុសលាងបាននេះ គឺដើម្បីប្រាប់កុមារនៅក្នុងប្រទេសកំពុងអភិវឌ្ឍន៍ថា អនាគតដ៏អស្ចារ្យមួយកំពុងរង់ចាំពួកគេតាមរយៈការបង្ការជំងឺដោយការលាងដៃរបស់ពួកគេនឹងសាប៊ូ។
យោងតាមគេហទំព័រនេះ សៀវភៅរូបភាពនេះត្រូវបានបង្កើតជារបៀបសាច់រឿង ហើយសាច់រឿងជារូបភាពនេះអាចនឹងលេចចេញឡើងនៅពេលដែលកុមារយកសាប៊ូដុសលាងលើដៃរបស់តួអង្គនៅក្នុងសៀវភៅនេះ។ តាមរយៈបច្ចេកវិទ្យាបោះពុម្ពពិសេសមួយ នៅពេលដែលដៃរបស់តួអង្គដែលជាផ្ទាំងពណ៌សត្រូវបានដុសលាងនោះ សាច់រឿងនឹងលេចចេញមកជាពណ៌ធម្មជាតិនៅលើដៃរបស់តួអង្គទាំងនោះ។
គំនិតនេះគឺថា កុមារនឹងចាប់ផ្តើមដឹងថា ការប្រើប្រាស់សាប៊ូសម្លាប់មេរោគអាចបង្កាជំងឺបាន ហើយនឹងផ្តល់អនាគតដ៏ត្រចេះត្រចង់ដល់ពួកគេ។ សម្រាប់ការចែកចាយដំបូងនៃយុទ្ធនាការនេះ សៀវភៅចំនួន ៤០០ ក្បាល ត្រូវបានផលិតឡើង ហើយនឹងបញ្ជូនមកកាន់ប្រទេសកម្ពុជារួមជាមួយនឹងសាប៊ូសម្លាប់មេរោគ ANGFA ចំនួន ៤០០ ដុំផងដែរ។
បាតដៃរបស់តួអង្គដែលសស្អាត មុនពេលមិនទាន់យកសាប៊ូទៅដុសលាងពីលើ។ រូបថត campaignbrief.com
ក្រុមហ៊ុន McCann Health គឺជាក្រុមហ៊ុនដែលផ្តល់សេវាធ្វើទីផ្សារពិភពលោកឈានមុខគេមួយសម្រាប់សេវាថែទាំសុខភាពដែលមានមូលដ្ឋាននៅទីក្រុងញូវយ៉ក ខណៈក្រុមហ៊ុន ANGFA មានភាពល្បីល្បាយដោយសារផលិតផលវេជ្ជសាស្រ្តសម្រាប់បង្កាមេរោគរបស់ខ្លួន។
គេហទំព័រ campaignbrief.com បានដកស្រង់សំដីរបស់លោក Jeremy Perrott ប្រធានផ្នែកគំនិតច្នៃប្រឌិតពិភពលោករបស់ក្រុមហ៊ុន McCann Health ខណៈលោកថ្លែងក្នុង «ទិវាលាងដៃ» ក្នុងប្រទេសជប៉ុនកាលពីសប្តាហ៍មុនថា៖ «សភាវគតិពិតរបស់មនុស្សចំពោះការប៉ះ អារម្មណ៍ និងបទពិសោធ ត្រូវបាននាំយកមកកាន់សៀវភៅនេះ។ អ្វីដែលខ្ញុំស្រលាញ់សៀវភៅនេះគឺប្រពន្ធដ៏ជឿនលឿនមួយក្នុងការពាំនាំសារ»។ លោកបានបន្ថែមថា៖ «ជំនួសមកវិញ យើងរៀនសូត្រតាមរយៈបទពិសោធមួយ និងការចងចាំ ដោយសារសកម្មភាពសាមញ្ញនៃការដុសលាងលើផ្ទៃមួយដើម្បីងបង្ហាញសារ។ វាពិតជាអស្ចារ្យ»។
ក្នុងប្រទេសកំពុងអភិវឌ្ឍន៍ កុមារចំនួន ៦ពាន់នាក់ស្លាប់ជារៀងរាល់ថ្ងៃដោយសារជំងឺឆ្លង៕
