ភ្នំពេញៈ ចូរស្រមៃថា កសិករអាចដំឡើងប្រព័ន្ធថាមពលសូឡា នៅក្នុងវាលស្រែរបស់ពួកគេ ដែលបំពាក់ដោយឧបករណ៍ផ្ដល់សញ្ញាក្នុងការរកឲ្យឃើញ និងរារាំងសត្វបក្សីកុំឲ្យស៊ីដំណាំតាមរយៈការបញ្ចេញរលកសំឡេង ហ្វ្រេកង់ខ្ពស់។ នេះជាការបង្ហាញពីគំនិតបង្កើតថ្មីមួយរបស់សហគ្រិនវ័យក្មេងកម្ពុជា។
ផែនការសម្រាប់ផលិតផលនេះត្រូវបានបង្ហាញដោយក្រុមសហគ្រិនកម្ពុជាវ័យក្មេងនៅក្នុងការប្រកួតប្រជែងសហគ្រិនភាពអន្តរជាតិ Dongsheng Cup ប្រចាំឆ្នាំលើកទី ៥ នៅទីក្រុងប៉េកាំង កាលពីចុងខែដែលមានគណៈប្រតិភូជាង ២០០ មកពីបណ្ដាប្រទេស៥ចូលរួម ដើម្បីបង្ហាញគំនិតរបស់ពួកគេសម្រាប់អាជីវកម្មបង្កើតថ្មី។
ខណៈគំនិតនៃការរារាំងសត្វបក្សីពីការបំផ្លាញដំណាំបានឈ្នះទៅក្រុមកម្ពុជាសម្រាប់ការច្នៃប្រឌិតនេះ ការទទួលបានមូលនិធិអាជីវកម្មបង្កើតថ្មីណាមួយ ពិសេសលើគ្រាប់ពូជអាចមានការពិបាក។
ដៃគូប្រកួតប្រជែងមួយក្នុងចំណោមដៃគូប្រកួតប្រជែងជាច្រើន កញ្ញា នី វួចនា មានអាយុ ២២ ឆ្នាំ ជានិស្សិតវិស្វកម្មគីមី នៅវិទ្យាស្ថានបច្ចេកវិទ្យាកម្ពុជា បានថ្លែងថា ផលិតផលរបស់ពួកគេអាចផ្តល់ការសន្សំប្រាក់ដល់កសិករ និងធានាថា ដំណាំកសិកម្មកាន់តែច្រើនមិនមានសារធាតុគីមី ប៉ុន្តែ ផលិតផលរបស់ក្រុមនេះមិនអាចដំណើរការទៅមុខដោយមិនមានការផ្ដល់មូលនិធិបន្ថែមសម្រាប់ការស្រាវជ្រាវ និងការបង្កើតនោះទេ។
កញ្ញាថ្លែងថា៖ «យើងកំពុងគិតអំពីសត្វបក្សីដែលបំផ្លាញដំណាំកសិកម្មជារៀងរាល់ឆ្នាំ ដូច្នេះយើងបានបង្កើតគំនិតនេះឡើង [ដើម្បីដោះស្រាយបញ្ហានេះ] ប៉ុន្តែនៅពេលនេះ វាគ្រាន់តែជាគំនិតមួយប៉ុណ្ណោះ»។
កញ្ញា ឃាង ស្រីលក្ខណ៍ជានិស្សិត អាយុ ២១ ឆ្នាំ នៅសាកលវិទ្យាល័យភូមិន្ទកសិកម្ម (RUA) ក៏ធ្លាប់បានចូលរួម ប្រកួតប្រជែងនៅក្នុង «បច្ចេកវិទ្យាកសិកម្ម» ដែលត្រូវបានរៀបចំធ្វើនៅ RUA កាលពីខែវិច្ឆិកាដែរ ដោយបានចាប់ដៃគូជាមួយនិស្សិត៣នាក់ផ្សេងទៀត ដែលពេលនោះទទួលបានចំណាត់ថ្នាក់លេខ ១។
ស្រីលក្ខណ៍ និងសមាជិកក្រុម ដែលជានិស្សិតឆ្នាំទី ៤ នៅ RUA បានប្ដេជ្ញាចិត្តថា ពួកគេនឹងនាំយកការអនុវត្តកសិកម្មប្រកបដោយសុវត្ថិភាពទៅទីកន្លែងតំបន់ក្រុងជាមួយនឹងអាជីវកម្មបង្កើតថ្មីរបស់ពួកគេ (Tang) ដែលផ្ដល់កញ្ចប់ និងសេវាក្នុងការជួយដល់គ្រួសារដែលរស់នៅទីក្រុងក្នុងការដាំដុះនៅក្នុងសួនបន្លែផ្ទាល់របស់ពួកគេ។
និស្សិត សុខ សុធារ័ត្ន និយាយថា៖«ប្រជាជនទីក្រុងជារឿយៗមមាញឹកលើការងាររបស់ពួកគេ និងមិនមានពេល ក្នុងការថែរក្សាដំណាំដោយខ្លួនឯងទេ ដូច្នេះពួកគេញ៉ាំបន្លែមកពីទីផ្សារក្នុងស្រុកដែលអាចមានសារធាតុគីមីដែលគ្រោះថ្នាក់ខ្លាំង»។
កញ្ញា បន្តថា Tang ផ្ដល់ដល់អតិថិជនជាមួយនឹងរុក្ខជាតិ ព្រមទាំងកញ្ចប់វេចខ្ចប់ជាមុនមានសព្វគ្រប់ទាំងគ្រាប់ពូជ ជីកំប៉ុស និងជីផងដែរ។
កញ្ញាថ្លែងថា៖ «ខ្ញុំបានទទួលយោបល់ [ពីអ្នកជំនាញក្នុងស្រុក] ថា អតិថិជននៅទីក្រុង មិនមានជម្រើសនោះទេ ប៉ុន្តែដើម្បីស្វែងរកដំណោះស្រាយ[សម្រាប់ការចៀសវាងការផលិតដែលមានសារធាតុគីមី] អាជីវកម្មបង្កើតថ្មីរបស់ខ្ញុំអាចដោះស្រាយបញ្ហានេះបាន»។
លោក Andre Kwok ដែលធ្វើការនៅមូលនិធិវិនិយោគគាំទ្រហិរញ្ញវត្ថុខ្សែក្រវាត់ និងផ្លូវ ជាអង្គការវិនិយោគមូលនិធិមានមូលដ្ឋាននៅទីក្រុង ហុងកុង បានជួយរៀបចំកម្មវិធី «បច្ចេកវិទ្យាកសិកម្ម» កម្ពុជា ហើយក៏បានចូលរួមនៅក្នុងការប្រកួតប្រជែងនេះនៅទីក្រុងប៉េកាំងដែរ។
លោក Kwok ថ្លែងថា ការផ្ដល់មូលនិធិគ្រាប់ពូជកាន់តែច្រើនមានភាពចាំបាច់នៅក្នុងប្រទេស កម្ពុជា ដើម្បីជួយជ្រោមជ្រែង និងជួយសម្រួលឲ្យបានត្រឹមត្រូវដល់សហគ្រិនវ័យក្មេងរបស់កម្ពុជា។
លោកថ្លែងថា៖ «ការផ្ដល់មូលនិធិអាជីវកម្មបង្កើតថ្មីនៅក្នុងប្រទេសកម្ពុជាមិនមានជាទូទៅនោះទេ ប៉ុន្តែវាសំខាន់ខ្លាំងបំផុតសម្រាប់ប្រជាជនវ័យក្មេងដើម្បីរៀនសូត្រពីរបៀបក្នុងការសាកល្បង និងដើម្បីយល់ដឹងពីទីផ្សារនេះ»។
លោកបានបន្តថា៖«សហគ្រិនវ័យក្មេងនៅក្នុងប្រទេស កម្ពុជា ពិតជាកំពុងធ្វើការងារ និងការអប់រំយ៉ាងខ្លាំង ប៉ុន្តែប្រព័ន្ធអេកូនៅទីនេះមិនទាន់មានភាពអំណោយផលសម្រាប់ការវិនិយោគលើអាជីវកម្មបង្កើតថ្មីនោះទេ»៕ LA