Search form

Login - Register | FOLLOW US ON

Logo of Phnom Penh Post newspaper Phnom Penh Post - អាជីវកម្ម​ផ្គត់ផ្គង់​ម្ហូប​មង្គល​ការ​ បង្ហាញ​ពី​កំណើន

Content image - Phnom Penh Post
លោក​ទូច រដ្ឋា ម្ចាស់ និង​ជា​អ្នក​គ្រប់​គ្រង​ទូទៅ​អាជីវកម្ម​សេវា​ចុង​ភៅ សេង ហុកហេង ក្នុង​បទ​សម្ភាស​ជាមួយ​ភ្នំពេញ ប៉ុស្តិ៍។ ហេង ជីវ័ន

អាជីវកម្ម​ផ្គត់ផ្គង់​ម្ហូប​មង្គល​ការ​ បង្ហាញ​ពី​កំណើន

ភ្នំពេញៈ នៅ​កម្ពុជា​នៅ​ពេល​ដែល​មនុស្ស​ពីរ​នាក់​ស្រឡាញ់​គ្នា ហើយ​ព្រម​សម្រេច​ចិត្ត​រៀបការ សកម្មភាព​សេដ្ឋកិច្ច​ក៏​កើត​មាន​។ មាន​អ្នក​ចំណាយ​ច្រើន​ជាង​មុន ហើយ​ក៏​មាន​អ្នក​ទទួល​បាន​ចំណូល​កើន​ឡើង ជា​ពិសេស​សហគ្រិន​ដែល​មាន​អាជីវកម្ម​ទាក់ទង​នឹង​ការ​រៀបចំ​អាពាហ៍​ពិពាហ៍​។

ទិន្នន័យ​ប្រជាសាស្ត្រ​បាន​​បង្ហាញ​ថា ក្នុង​ចំណោម​​​ប្រជាជន​កម្ពុជា​ជាង ១៥ លាន​នាក់ ប្រជាជន​ដែល​មាន​អាយុ​ស្ថិត​ក្នុង​វ័យ​​រៀបការ​មាន​ប្រមាណ​ មួយ​ភាគ​បី​នៃ​ចំនួន​ប្រជាជន​សរុប។ កត្តា​នេះ​បង្ហាញ​ថា អាជីវកម្ម​ទាក់​ទង​នឹង​ការ​រៀបចំ​អាពាហ៍​ពិពាហ៍​នឹង​នៅ​តែ​មាន​សក្តានុពល​ខ្លាំង​និង​មាន​រយៈពេល​យូរ​ទៀត​នៅ​កម្ពុជា។

ឱកាស​ធ្វើ​អាជីវកម្ម​ជាច្រើន​ប្រភេទ​បាន​កើត​ឡើង រាប់​ចាប់ពី​អាជីវកម្ម​ខ្នាត​តូច ដល់​ខ្នាត​ធំ​។​ ពី​តូប​កាហ្វេ​ចល័ត ដល់​អាជីវកម្ម​សម្អាងការ ពី​អាជីវកម្ម​តុបតែង​លម្អ​ផ្កា​ស្រស់​ដល់​រោង​ចុងភៅ​ខ្នាត​ធំ​ជា​ដើម​។

អ្នក​យក​ព័ត៌មាន​កាសែត​ភ្នំពេញ​ប៉ុស្តិ៍​លោក ហ៊ គីមសាយ បាន​ជួប​សម្ភាស​ជាមួយ​លោក​ទូច រដ្ឋា ម្ចាស់ និង​ជា​អ្នក​គ្រប់គ្រង​ទូទៅ​អាជីវកម្ម​សេវា​ចុងភៅ សេង ហុក​ហេង អំពី​ដំណើរ​ការ​អាជីវ​កម្ម​នេះ និង​សក្តានុពល​អាជីវកម្ម​ទាក់ទង​នឹង​ការ​រៀប​អាពាហ៍​ពិពាហ៍​។

តាំង​ពី​បើក​ដំណើរការ​អាជីវកម្ម​ចុង​ភៅ​មក តើ​ពិធី​ណា​មួយ​ដែល​ធំ​ជាង​គេ​ដែល​ក្រុមហ៊ុន​លោក​បាន​ផ្តល់​សេវា​ឲ្យ ហើយ​ពិធី​នោះ​ចំណាយ​អស់​ប៉ុនណា​ដែរ​?

វា​ជា​ពិធី​រៀប​អាពាហ៍​ពិពាហ៍ ដែល​រៀបចំ​នៅ​កោះ​ពេជ្រ​កាលពី​ឆ្នាំ​មុន ដែល​ការ​ចំណាយ​សរុប​សម្រាប់​សេវា​ចុងភៅ​នា​ពេល​នោះ​មាន​ប្រហែល​ ១៥ ម៉ឺន​ដុល្លារ​។ នៅ​ពេល​និយាយ​ពី​តម្លៃ​សេវា​ចុងភៅ គឺ​ខ្ញុំ​សំដៅ​ដល់​តម្លៃ​ម្ហូប​អាហារ ការ​តុប​តែង​រោងការ ការ​ក្រាល​ពាស និង​ម៉ាស៊ីន​ត្រជាក់​។

តើ​អាជីវកម្ម​របស់​លោក​បាន​រីក​ចម្រើន​យ៉ាង​ដូច​ម្តេច​?​មាន ការ​ប្រែ​ប្រួល​យ៉ាង​ណា​ដែរ​បើ​ធៀប​នឹង​កាលពី​បី​ឆ្នាំ​មុន​?

អាជីវកម្ម​ចុងភៅ សេង ហុកហេង បាន​ផ្តល់​សេវា​ចុងភៅ​ជា​មធ្យម​ប្រមាណ ៣ ៥០០ តុ​ក្នុង​មួយ​ខែ​ក្នុង​អំឡុង​រដូវ​អាពាហ៍​ពិពាហ៍ ចាប់ពី​ខែ​វិច្ឆិកា​ដល់​ខែ​មីនា​។ ចំនួន​នេះ​បាន​កើន​ឡើង​ជិត​ ៣​ ដង​ធៀប​នឹង​កាលពី​បី​ឆ្នាំ​មុន​។

ជា​មធ្យម តើ​ពិធី​រៀប​អាពាហ៍​ពិពាហ៍ ចំណាយ​លើ​សេវាកម្ម​របស់​ក្រុមហ៊ុន​លោក​ក្នុង​ទឹក​ប្រាក់​ប៉ុន​ណា​ដែរ​?

នៅ​ក្នុង​ករណី​របស់​ខ្ញុំ តម្លៃ​ជា​មធ្យម​នៃ​សេវា​ចុងភៅ​សម្រាប់​ពិធី​រៀប​អាពាហ៍​ពិពាហ៍​គឺ​ចន្លោះ​ពី ១៥ ០០០​ ដុល្លារ ដល់ ២០ ០០០​ ដុល្លារ​។

ដោយ​សារ​អាជីវកម្ម​នេះ​មាន​ភាព​មមាញឹក​អាស្រ័យ​តាម​រដូវ​កាល តើ​លោក​គ្រប់​គ្រង​បុគ្គលិក​យ៉ាង​ដូច​ម្ដេច​ដែរ​? ហើយ​លោក​មាន​បុគ្គលិក​សរុប​ប៉ុន្មាន​នាក់​ដែរ​?

យើង​អាច​ផ្ដល់​ការងារ​រហូត​ដល់​៥០០​នាក់​ប្រចាំ​ខែ នៅ​ក្នុង​រដូវ​មាន​ពិធី​រៀប​អាពាហ៍ពិពាហ៍​ច្រើន​។ សម្រាប់​ពេល​រដូវ​មាន​តម្រូវការ​ទាប យើង​បាន​ផ្តល់​ការងារ​បាន ២៥០ នាក់​។ យើង​មាន​ក្រុម​បុគ្គលិក​មាន​ប្រាក់​ខែ​គោល បុគ្គលិក​បណ្ដោះ​អាសន្ន និង​បុគ្គលិក​ទទួល​កម្រៃ​តាម​គម្រោង​ដោយ​សារ​តែ​អាជីវកម្ម​នេះ​ត្រូវបាន​ប្រែប្រួល​តាម​រដូវ​។

បុគ្គលិក​របស់ខ្ញុំ​ ៩៨ ​ភាគរយ​មិនបាន​បញ្ចប់​ការ​រៀន​សូត្រ​នៅ​សាកល​វិទ្យាល័យ​ទេ អាស្រ័យ​ហេតុ​នេះ ខ្ញុំ​ជា​អ្នក​គ្រប់​គ្រង​ទូទៅ ដែល​ត្រូវ​តែ​មាន​តួនាទី​ច្រើន ពេល​ខ្លះ​ជា​គ្រូ អ្នក​បណ្ដុះ​បណ្ដាល​ឬ​អ្នក​សម្រប​សម្រួល​។ យើង​ផ្ដល់​បរិយាកាស​លក្ខខណ្ឌ​ការងារ​ល្អ និង​ប្រាក់ខែ​កាន់​តែ​ប្រសើរ​ដើម្បី​ទាក់ទាញ​កម្លាំង​ពលកម្ម​មានគុណ​ភាព​កាន់​តែ​ច្រើន ដោយ​សារ​តែ​យើង​គិត​អំពី​គុណភាព និង​យីហោ​របស់​យើង​។

ក្នុង​អាជីវកម្ម​ចុង​ភៅ សេង ហុកហេង យើង​មាន​បុគ្គល​ប្រហែល​ ២០ ​នាក់ ដែល​តួនាទី​ជា​អ្នក​គ្រប់គ្រង​ជាន់​ខ្ពស់​ហើយ​ពួក​គេ​មាន​ប្រាក់​ខែ​ខ្ពស់​ខុសៗ​គ្នា​តែ​ស្ថិត​នៅ​ចន្លោះ​ពី ១ ០០០ ដុល្លារ​ដល់ ១៥០០ ​ដុល្លារ​ក្នុង​មួយ​ខែ​។ មាន​បុគ្គលិក​ប្រហែល ៥០​ នាក់ ដែល​ធ្វើ​ការងារ​ជា​អ្នក​គ្រប់គ្រង​ថ្នាក់​កណ្ដាល ដែល​ទទួល​ប្រាក់ខែ​ប្រហែល​ពី ៦០០ ​ដុល្លារ ដល់​ ៨០០​ ដុល្លារ​ក្នុង​មួយខែ ហើយ​បុគ្គល​ផ្សេង​ទៀត​គឺជា​កម្រិត​ទាប ដែល​ទទួល​ប្រាក់ខែ​ពី​២០០​ដុល្លារ​ដល់​២៥០​ដុល្លារ​ក្នុង​មួយខែ​។

អ្វី​ជា​បញ្ហា​ប្រឈម​ខ្លាំង​ជាង​គេ​ដែល​លោក​ជួប​ប្រទះ​ក្នុង​កិច្ចការ​អាជីវ​កម្ម​នេះ​?

ការ​ស្វែងរក​ក្រុម​ការងារ​ដ៏​ខ្លាំង​មួយ មាន​គំនិត​ច្នៃប្រឌិត មាន​ថាមពល និង​ចេះ​ជំនាញ​ច្រើន ដើម្បី​ឆ្លើយតប​នឹង​កំណើន​ដ៏​ឆាប់​រហ័ស​របស់​អាជីវកម្ម​នេះ​គឺជា​បញ្ហា​ប្រឈម​ខ្លាំង​បំផុត​ដែល​បាន​ជួប​ប្រទះ​ដោយ​ក្រុមហ៊ុន​ចុងភៅ​របស់ខ្ញុំ​នៅពេល​បច្ចុប្បន្ន​។ យើង​មិន​មែន​ជា​ក្រុមហ៊ុន​ដែល​បុគ្គលិក​សុទ្ធតែ​ទទួល​បាន​ការ​អប់រំ​ខ្ពស់​ទេ តែ​គ្រាន់​តែ​អាជីវកម្ម​ដែលមាន​បុគ្គលិក​ភាគច្រើន​មិនបាន​សិក្សា​ថ្នាក់ខ្ពស់​ឡើយ​។ តែ​ពួក​គេ​មាន​ជំនាញ ដូច្នេះ​យើង​ត្រូវធ្វើ​ការងារ​ជា​ក្រុម​ឲ្យ​បានល្អ ត្រូវ​ចេះ​យល់​ចិត្ត និង​សហការគ្នា ប្រៀប​ដូច​ក្រុមបាល់ទាត់​ដែល​ត្រូវ​រត់​ប្រសេច​ប្រសាច​នៅលើ​ទីលាន តែ​ពួកគេ​ត្រូវ​យល់​ពី​តួនាទី​ខ្លួនឯង​ឲ្យ​ច្បាស់ និង​មាន​ជំនាញ​លើ​តួនាទី​របស់​ខ្លួន​ឲ្យ​ប្រាកដ​។

តើ​លោក​អាច​រៀបរាប់​ពី​ចង្វាក់​ផ្គត់ផ្គង់​សម្ភារ​អាហារ​ដូចជា​ត្រី​សាច់ បន្លែ​យ៉ាង​ដូច​ម្ដេច​ក្នុង​ការ​ប្រតិបត្តិការ​អាជីវកម្ម​នេះ​?

ចង្វាក់​ផ្គត់ផ្គង់​វត្ថុ​ធាតុ​សម្រាប់​ធ្វើ​អាហារ​ដូចជា​ត្រី សាច់ បន្លែ គឺជា​ការ​បារម្ភ​របស់​យើង​សម្រាប់​ក្រុមហ៊ុន​ដែល​រីក​ចម្រើន​ដូចជា​ពួក​យើង​។ នីតិវិធី​មួយ​ត្រូវ​តែ​បង្កើត​ឡើង​យ៉ាង​ល្អ​ប្រសើរ​ដើម្បី​ធ្វើ​ឲ្យ​ប្រាកដ​ថា អ្វីៗ​ដំណើរ​ការ​ល្អ​ចាប់ពី​ការ​ចេញ​បញ្ជី​បញ្ជា​ទិញ​មុខ​ម្ហូប រហូតដល់​ការ​ចែកចាយ​ផលិតផល​។

យើង​បានជ្រើសរើស​ដៃគូ​ផ្គត់ផ្គង់ ហើយ​យើង​បាន​ចុះ​កិច្ច​ព្រម​ព្រៀង​ជាមួយ​គ្នា​ដើម្បី​ធានាថា​ពួកគេ​អាច​ផ្គត់ផ្គង់​ទំនិញ​មាន​គុណ​ភាព ទាន់​ពេល​វេលា​។ យើង​បាន​ចែង​ក្នុង​លក្ខខណ្ឌ​របស់​យើង ប្រសិន​បើ​អ្នក​ផ្គត់ផ្គង់​មិន​អនុវត្តតាម​លក្ខខណ្ឌ​នេះ ពួកគេ​នឹង​ព្រមាន ឬ​ឈាន​ដល់​ការ​បញ្ចប់​កិច្ច​ព្រម​ព្រៀង​។

តើ​លោក​សង្កេត​ឃើញ​អាជីវកម្ម​ទាក់ទង​នឹង​អាពាហ៍ពិពាហ៍​នៅ​ក្នុង​ប្រទេស​កម្ពុជា​មាន​សក្តានុពល​កម្រិត​ណា ហើយ​វា​នឹង​មាន​និន្នាការ​យ៉ាង​ដូច​ម្តេច​ទៅ​ថ្ងៃ​មុខ​?

វា​ជា​វិស័យ​មួយ​ដែល​អាច​ផ្តល់​ឱកាស​អាជីវកម្ម​ដល់​អាជីវករ​ជាច្រើន និង​ផ្តល់​ចំណូល​សរុប​រាប់លាន​ដុល្លារ​។ អាជីវកម្ម​ទាក់ទង​នឹង​ការ​រៀប​អាពាហ៍​ពិពាហ៍ គឺជា​អាជីវកម្ម​ដែល​កាន់តែ​ទំនើប​។ ប្រជាជន​មាន​និន្នាការ​ទំនោរ​ទៅ​រក​ភាព​ទាន់​សម័យ និង ចង់​បាន​ការ​រៀបចំ​ដែល​ល្អ និង​ប្លែក​ពី​គេ ដែល​ចំណាយ​កាន់​តែ​ច្រើន​ឡើង​។

ក្រៅ​ពី​អាជីវកម្ម​ចុងភៅ តើ​អាជីវកម្ម​ប្រភេទ​ផ្សេង​ទៀត​ណា​ខ្លះ​ដែល​លោក​យល់​ថា​មាន​សក្ដានុពល​ក្នុង​ការ​ចាប់​យក​កំណើន​អាពាហ៍​ពិពាហ៍​នៅ​កម្ពុជា​?

អាជីវកម្ម​ជាច្រើន​សុទ្ធ​តែ​អាច​ទទួល​បាន​អត្ថ​ប្រយោជន៍ តែ​សម្រាប់​ខ្ញុំ មាន​អាជីវកម្ម​មាន​សក្ដានុពល​ខ្លាំង​បី ដែល​អាជីវកម្ម​ទាំង​នោះ​រួម​មាន អគារ​រៀបការ អាជីវកម្ម​សម្អាងការ និង​ការ​តុប​តែង​ផ្កា​ស្រស់​។ អាជីវកម្ម​មួយ​ក្នុង​ចំណោម​អាជីវកម្ម​ទាំង​នោះ អគារ​អាពាហ៍​ពិពាហ៍ មាន​តម្រូវ​ការ​ខ្ពស់​ជាមួយ​នឹង​ការ​ប្រកួត​ប្រជែង​ទាប តែ​វា​ត្រូវ​ការ​ទុន​វិនិយោគ​ច្រើន​។

លោក​គិត​ថា ការ​រីក​ចម្រើន​នៃ​អាជីវកម្ម​ចុង​ភៅ បាន​ជួយ​ដល់​ការ​អភិវឌ្ឍ​សង្គម​យ៉ាង​ដូច​ម្តេច​ខ្លះ​?

ខ្ញុំ​គិត​ថា វា​បាន​ជួយ​ដល់​អ្នក​មិនបាន​រៀន​ចប់​មហាវិទ្យាល័យ​ទទួល​បាន​ការងារ និង​ប្រាក់​ខែ​សមរម្យ​ដូច​និស្សិត​បញ្ចប់​ការ​សិក្សា​ចេញ​ពី​សាកល​វិទ្យាល័យ​ល្បីៗ​ផងដែរ​។

នៅ​កម្ពុជា ចំនួន​មនុស្ស​មិន​ទាន់​បញ្ចប់​ការសិក្សា​គឺ​ច្រើនជាង​ចំនួន​និស្សិត​បញ្ចប់​ការសិក្សា ដូច្នេះ​ដើម្បី​កសាង​សង្គម​កាន់តែ​ប្រសើរ​នៅ​កម្ពុជា យើង​ត្រូវមាន​អាជីវកម្ម​ដែល​ត្រូវការ​ធនធាន​មនុស្ស​ដែល​មិនមាន​ការ​អប់រំ​ខ្ពស់​កាន់តែ​ច្រើន​ឡើង ដើម្បី​ផ្តល់​កម្រៃ ដល់​ពួកគេ​ឲ្យ​បាន​សមរម្យ​។ ខ្ញុំ​គិត​ថា អាជីវកម្ម​ចុងភៅ របស់​យើង​កំពុង​ធ្វើ​ការ​ងារ​នេះ​៕ LA

0

Comments

Please, login or register to post a comment