Search form

Login - Register | FOLLOW US ON

Logo of Phnom Penh Post newspaper Phnom Penh Post - អ្នក​ជំនាញ ​ជំរុញ​ឲ្យ​ពង្រីក​ធានា​រ៉ាប់រង​ដំណាំ

Content image - Phnom Penh Post
កសិករ​នៅ​ខេត្ត​កំពង់ស្ពឺ កំពុង​ស្ទូង​ស្រូវ​កាល​ពី​រដូវ​ដាំដុះ​ នា​ពេល​កន្លង​មក។ ហុង មិនា

អ្នក​ជំនាញ ​ជំរុញ​ឲ្យ​ពង្រីក​ធានា​រ៉ាប់រង​ដំណាំ

ភ្នំពេញៈ អ្នក​ជំនាញ​ក្នុង វិស័យ​កសិកម្ម កាលពី​ម្សិល​មិញ​បាន​ស្នើ​ឲ្យ​ភាគី​ពាក់ព័ន្ធ​ពង្រីក​វិសាលភាព​នៃ​ការ​ផ្តល់​សេវា​ធានា​រ៉ាប់រង​ដំណាំ​ដល់​កសិករ​ឲ្យ​បាន​កាន់​តែ​ទូលាយ ដោយ​អះអាង​ថា វា​ជា​ដំណោះ​ស្រាយ​ដើម្បី​រួម​ចំណែក​កាត់​បន្ថយ​ហានិភ័យ​ផលិតកម្ម​កសិកម្ម ដែល​កសិករ​កំពុង​ប្រឈម​ទល់​នឹង​ការ​ប្រែប្រួល​អាកាស​ធាតុ​។

ថ្លែង​កាលពី​ម្សិលមិញ​នៅ​ក្នុង​សិក្ខាសាលា​ពិគ្រោះ​យោបល់​ស្ដីពី​ការ​ធានា​រ៉ាប់រង​ដំណាំ​កសិកម្ម ដែល​បាន​រៀបចំ​ឡើង​ដោយ GIZ ដើម្បី​ប្រមូល​ភាគី​ពាក់ព័ន្ធ​នៅ​ក្នុង​វិស័យ​ធានា​រ៉ាប់រង​ដំណាំ​កសិកម្ម លោក​ស្រី មុំ ថានី អនុរដ្ឋ​លេខាធិការ​ក្រសួង​កសិកម្ម រុក្ខា​ប្រមាញ់ និង​នេសាទ បាន​អំពាវនាវ​ដល់​ភាគី​ពាក់ព័ន្ធ​ទាំង​អស់​ត្រូវ​រក្សា​គំនិត​ផ្ដួច​ផ្ដើម​នៃ​ការ​ពង្រីក​ភាព​អាច​រក​បាន​នៃ​ការ​ផ្ដល់​ការ​ធានា​រ៉ាប់រង​ដំណាំ​ដល់​កសិករ ដែល​លោក​ស្រី​បាន​ថ្លែងថា នឹង​រួម​ចំណែក​ក្នុង​ការ​ធានា​រ៉ាប់រង​ការ​អភិវឌ្ឍ​ប្រកប​ដោយ​ស្ថិរភាព​នៃ​វិស័យ​កសិកម្ម​នៅ​ក្នុង​ប្រទេស​កម្ពុជា​។

លោក​ស្រី​ថ្លែង​ថា​៖ «​វិស័យ​កសិកម្ម​ងាយ​ទទួល​រង​គ្រោះ​បំផុត​ដោយ​សារ​ការ​ប្រែប្រួល​ធាតុ​អាកាស​»​។

លោក​ស្រី​បន្ថែម​ថា គំនិត​ផ្ដួចផ្ដើម​នេះ ដើម្បី​បង្កើន​ផែនការ​ធានា​រ៉ាប់រង​ដំណាំ​គឺជា​វិធានការ​មួយ​ដ៏​ល្អ ក្នុង​ការ​កាត់​បន្ថយ​អាជីវកម្ម​នៃ​ការ​ដាំដុះ​។

លោក​ស្រី​បន្ត​ថា​៖ «​ការ​ធានា​រ៉ាប់រង​ដំណាំ​ការពារ​ការ​វិនិយោគ​របស់​កសិករ និង​ធានា​ថា ទោះបីជា​នៅ​ពេល​ការ​ប្រមូល​ផល​បរាជ័យ​ក៏​ដោយ ក៏​កសិករ​មាន​ប្រភព​ហិរញ្ញវត្ថុ​គ្រប់គ្រាន់​ក្នុង​ការ​វិនិយោគ និង​រ៉ាប់រង​លើ​តម្រូវ​ការ​គ្រួសារ​ជា​មូលដ្ឋាន​ដូច​ជា​អាហារ និង​ការ​ថែរក្សា​សុខភាព​ជាដើម​»​។

កសិករ​ដែល​ចូលរួម​ផែនការ​នេះ ត្រូវ​បង់​ធានា​រ៉ាប់រង​នៅ​ពេល​ចាប់​ផ្ដើម​រដូវ​ដាំ​ដុះ ផ្អែក​លើ​ទំហំ​វាល​ស្រែ​របស់​ពួក​គេ ប្រភេទ​នៃ​ការ​ដាំដុះ​ស្រូវ និង​ឧបករណ៍​បច្ចេកទេស​ដែល​បាន​ប្រើប្រាស់​។ ជា​ថ្នូរ ពួក​គេ​ទទួល​បាន​ការ​ពិគ្រោះ​យោបល់​ស្ដីពី​បច្ចេកទេស​ដាំ​ដុះ និង​ទទួល​បាន​ការ​សង​ប្រាក់​ធានា​រ៉ាប់រង បើ​ដំណាំ​របស់​ពួក​គេ​ត្រូវ​ខូចខាត​ដោយ​សារ​ទឹកជំនន់ ឬក៏​ភាព​រាំង​ស្ងួត​។

អង្គការ​សេដាក ​(CEDAC)​ និង​ក្រុមហ៊ុន​ធានា​រ៉ាប់រង Forte ស្ថិត​ក្នុង​ចំណោម​អ្នក​នៅ​ក្នុង​ឧស្សាហ​កម្ម​នេះ​ដែល​ផ្ដល់​សេវា​ធានា​រ៉ាប់រង​កសិកម្ម​ខ្នាត​តូច ដើម្បី​ជួយ​កសិករ​ដាំ​ដុះ​ស្រូវ​កាន់​តែ​ប្រសើរ ឆ្លើយ​តប​នឹង​ការ​ប្រែប្រួល​ធាតុ​អាកាស​។ យោង​តាម​តួ​លេខ ក្រុមហ៊ុន Forte បាន​លក់​ការ​ធានា​រ៉ាប់រង​ស្រូវ​ដល់​គ្រួសារ ​១៥០ រហូត​មក​ដល់​ពេល​នេះ បន្ទាប់​ពី​ការ​ដំណើរ​ការ​គម្រោង​នេះ​កាល​ពី​ឆ្នាំ​២០១៥ ក្នុង​នោះ​ការសង​ប្រាក់​សំណង​មាន​ប្រហែល​៦ ០០០​ដុល្លារ​នៅ​ក្នុង​អំឡុង​ពេល​នេះ​។

លោក សម វិទូ នាយក​ប្រតិបត្តិ អង្គការ​សេដាក បាន​ឲ្យ​ដឹង​ថា ការ​ពង្រីក​វិសាល​ភាព​ក្នុង​ការ​ផ្តល់​ធានា​រ៉ាប់រង​ដល់​កសិករ​គឺជា​ការ​ល្អ​។

សេ​ដាក បាន​អនុវត្ត​គម្រោង​សាកល្បង​ការ​ផ្តល់​ធានា​រ៉ាប់រង​ដំណាំ​ស្រូវ​ដល់​កសិករ​ចន្លោះ​ពី​ឆ្នាំ ២០១៤ ដល់ ២០១៦ ដោយ​មាន​កសិករ​សរុប​១៥០ គ្រួសារ​ចូលរួម ហើយ​កំពុង​ពិចារណា​បង្កើន​លទ្ធភាព​ក្នុង​ការ​ផ្តល់​សេវា​ធានា​រ៉ាប់រង​នេះ​កាន់​តែ​ធំ​ដល់​កសិករ​។

លោក​បន្ត​ថា​៖ «​តាម​រយៈ​ធានា​រ៉ាប់រង​ដំណាំ កសិករ​គាត់​មិន​ខាត​ទាំង​ស្រុង​ទេ បើ​ទោះ​បី​ជា​ពួក​គាត់​ជួប​គ្រោះ​ធម្មជាតិ​ដូច​ជា​រាំង​ស្ងួត​ទឹក​ជំនន់​»​។ លោក​បន្ត​ថា រដ្ឋាភិបាល​គួរ​មាន​កញ្ចាប់​ថវិកា ឬ​បន្ត​ជំរុញ​ស្ថាប័ន​ពាក់ព័ន្ធ​នានា​បង្កើន​លទ្ធភាព​ផ្តល់​ធានា​រ៉ាប់រង​នេះ​ដល់​កសិករ​។

លោក ស៊ន ស៊ឺន កសិករ​ស្រូវ​នៅ​ខេត្ត​កំពង់ស្ពឺ ដែល​មាន​ផ្ទៃដី​ដាំ​ដុះ​ស្រូវ​សរុប​ចំនួន ៤,៥ ហិកតា បាន​ឲ្យ​ដឹង​ថា​លោក​បាន​ទិញ​ធានា​រ៉ាប់រង​ស្រូវ​ជា​លើក​ដំបូង​ពី​អង្គការ សេ​ដាក កាលពី​ឆ្នាំ ២០១៥ សម្រាប់​ការ​ធានា​តែ ១ ហិកតា​ប៉ុណ្ណោះ ហើយ​បន្ទាប់​មក​ក៏​បាន​បង្កើន​ការ​ទិញ​ធានា​រ៉ាប់រង​នេះ​រហូត​ដល់ ៣ ហិកតា​កាលពី​ឆ្នាំ ២០១៦​។

លោក​បន្ត​ថា​៖ «​ស្រូវ​ជា​ដំណាំ​សំខាន់​របស់​យើង អ៊ីចឹង​ការ​ហ៊ាន​ចំណាយ​បន្ថែម​ខ្លះ​ដើម្បី​បង្ការ​បញ្ហា​ដែល​អាច​កើត​ឡើង គឺជា​រឿង​ធម្មតា​»​។

លោក​បន្តថា​៖«​សម្រាប់​រដូវ​ដាំ​ដុះ​ក្រោយៗ ខ្ញុំ​នឹង​ទិញ​ធានា​រ៉ាប់រង​ស្រូវ​កាន់តែ​ច្រើន​ជាង​មុន​»​។

លោក ជា យឿន កសិករ​ស្រូវ​ម្នាក់​ទៀត​នៅ​ស្រុក​មោង​ឫស្សី ខេត្ត​បាត់ដំបង បាន​ឲ្យ​ដឹង​ថា​លោក​សម្រេច​ចិត្ត​ទិញ​ធានា​រ៉ាប់រង​ស្រូវ​ជា​លើក​ដំបូង​នៅ​ឆ្នាំនេះ​ដោយ​ការពារ​សម្រាប់​តែ​ស្រូវ​១​ហិកតា​ប៉ុណ្ណោះ ក្នុង​ចំណោម​ស្រូវ​សរុប​៨ ហិកតា​។

លោក​បាន​ចំណាយ ១១ ម៉ឺន​រៀល​លើ​ធានា​រ៉ាប់រង​ស្រូវ ១ ហិកតា​នេះ ហើយ​បញ្ជាក់​ថា​នឹង​អាច​បង្កើន​ទៅ​លើ​ផ្ទៃដី​ដាំ​ដុះ​ផ្សេង​ទៀត​នៅ​ឆ្នាំ​ក្រោយ ប្រសិន​បើ​ដំណើរ​ការល្អ​។

លោក​ថ្លែង​ថា​៖«​ប្រសិន​ការ​ធានា​រ៉ាប់រង​អាច​ជួយ​សង​យើង​វិញ​នៅ​ពេល​ដែល​មានការ​ខូចខាត ខ្ញុំ​គិត​ថា ការ​ចំណាយ​ប៉ុណ្ណោះ​មិន​ច្រើន​ទេ​»​។ លោក​បញ្ជាក់​ថា ការ​ធ្វើ​ស្រូវ​ក្នុង​១​ហិកតា ត្រូវ​ចំណាយ​កាន់​តែ​ច្រើន​ឡើង ស្រប​ពេល​ហានិភ័យ​នៃ​ការ​ខាត​បង់​កាន់​ធំ​ជាង​មុន​ដោយ​សារ​គ្រោះ​ធម្មជាតិ​ផ្សេងៗ​។

លោក​បញ្ជាក់​ថា​៖«​ឥឡូវ​បញ្ហា​រាំង​ស្ងួត ឬ គ្រោះ​ធម្មជាតិ​អី​ផ្សេងៗ​ហ្នឹង​កើត​ឡើង​ញឹកញាប់​ហើយ​ស្មាន​មិន​ត្រូវ​ទេ អ៊ីចឹង​យើង​សាកល្បង​ធានា​រ៉ាប់រង​ហ្នឹង​មើល បើ​ជោគជ័យ​ឆ្នាំ​ក្រោយៗ​ខ្ញុំ​នឹង​ទិញ​ច្រើន​ជាង​នេះ​»៕ LA

0

Comments

Please, login or register to post a comment