Search form

Login - Register | FOLLOW US ON

Logo of Phnom Penh Post newspaper Phnom Penh Post - អ្នក​ផ្តល់​សេវា​ទូរគមនាគមន៍​នឹង​ប្រឈម​បញ្ហា

អង់តែន​ក្រុមហ៊ុន​ទូរគមនាគមន៍​នៅកម្ពុជា​ដែល​បំពាក់​លើ​ដំបូលផ្ទះ​នៅរាជធានីភ្នំពេញ​។ ផាលីណា
អង់តែន​ក្រុមហ៊ុន​ទូរគមនាគមន៍​នៅកម្ពុជា​ដែល​បំពាក់​លើ​ដំបូលផ្ទះ​នៅរាជធានីភ្នំពេញ​។ ផា លីណា

អ្នក​ផ្តល់​សេវា​ទូរគមនាគមន៍​នឹង​ប្រឈម​បញ្ហា

ភ្នំពេញៈ សេចក្ដី​ព្រាង​ច្បាប់​ថ្មី​របស់​រដ្ឋា​ភិបាល​ដែល​ត្រូវ​បាន​បក​ប្រែ​ក្រៅ​ផ្លូវការ​បង្ហាញ​ថា ក្រុមហ៊ុន​ទូរស័ព្ទ​ចល័ត ក្រុម​ហ៊ុន​ផ្តល់​សេវា​អ៊ីនធឺណិត និង​ហេដ្ឋ​រចនា​សម្ព័ន្ធ​ ហើយ​សូម្បី​អ្នក​ប្រើ​ប្រាស់​ឧបកណ៍​ទូរគមនាគមន៍​អាច​ប្រឈម​នឹង​ការ​ពិន័យ​យ៉ាង​ច្រើន​ បើ​ក្រសួង​ប្រៃសណីយ៍​ និង​ទូរគមនាគមន៍​អនុវត្ត​វិធាន​ការ​របស់​ខ្លួន។

ការ​បកប្រែ​ថ្មី​នៃ​សេចក្ដី​ព្រាង​ច្បាប់​ទូរគមនាគមន៍​ដែល​មិន​ទាន់​អនុម័ត​នៅឡើយ​ត្រូវ​បាន​លេច​ធ្លាយ​មក​ដល់​ភ្នំពេញប៉ុស្ដិ៍ នៅ​ក្នុង​កិច្ច​ប្រជុំ​រយៈពេល​ ២​ថ្ងៃ​រវាង​ក្រសួង និង​តំណាង​​វិស័យ​ឯកជន​ដែល​បញ្ចប់​នៅ​ថ្ងៃ​នេះ។

តំណាង​ក្នុង​ឧស្សាហកម្ម​នេះ​មួយ​រូប​សុំ​មិន​បញ្ចេញ​ឈ្មោះ​ប្រាប់​ថា៖ «ប្រសិនបើ​ច្បាប់​នេះ​ត្រូវ​បាន​អនុម័ត វា​ពិតជា​នឹង​សង្កត់​សង្កិន​ដល់​ឧស្សាហ​កម្ម​នេះ។ វា​អនុញ្ញាត​ឲ្យ​រដ្ឋាភិបាល​​ក្នុង​ការ​ផ្លាស់​ប្តូរ​អ្វី​ដែល​ពួកគេ​ចង់​ធ្វើ​នៅ​ពេលណា​ដែល​ពួក​គេ​​ចង់​ធ្វើ»។

លោក​បានលើក​ឡើង​​ពី ខ ជា​ច្រើន​នៅ​ក្នុង​ច្បាប់​នេះ​ដែល​អនុញ្ញាត​​ឲ្យ​ក្រសួង​ធ្វើ​ការ​ផ្លាស់​ប្តូរ​នៅ​ក្នុង​​ឆន្ទានុសិទ្ធិ​ផ្ទាល់​របស់​ខ្លួន។

តាម​សេចក្ដី​ព្រាង​ច្បាប់​នេះ ក្រសួង​ និង​និយតករ​ទូរគមនាគមន៍​កម្ពុជា​នឹង​មាន​អំណាច​បញ្ជា​ដល់​ក្រុម​ហ៊ុន​ផ្ដល់​សេវា​ទាក់​ទង​ទូរគមនាគមន៍​ឲ្យ​ប្រគល់​ទិន្នន័យ​ ប្រព័ន្ធ​ និង​ឧបករណ៍​ដើម្បី​ជា​ប្រយោជន៍​សម្រាប់​សន្តិសុខ​ជាតិ ស្ថិរភាព​ និង​សណ្ដាប់​ធ្នាប់​សាធារ​ណៈ។​

ខណៈសេច​ក្ដី​ព្រាង​ច្បាប់​បង្គាប់​ដល់​ក្រុម​ហ៊ុន​ដែល​ទាក់​ទង​ក្នុង​ការ​ផ្ដល់​សេវា​ទូរគមនាគមន៍​ឲ្យ​ដាក់​ពាក្យ​សុំ​ ហ្វ្រេកង់ និង​អាជ្ញាប័ណ្ណ​ថ្មី​ រដ្ឋា​ភិបាល​បាន​រក្សា​សិទ្ធិ​​ក្នុង​ការ​កំណត់​លក្ខ​ខណ្ឌ​បន្ថែម​​ កែ​ប្រែ​ ឬ​ថែម​ទាំង​​ដក​ហូត​​អាជ្ញា​ប័ណ្ណ​ថ្មី​ ដែល​បាន​លើក​ឡើង​នេះ​។​

ទាក់ទង​នឹង​ការ​បញ្ចុះ​តម្លៃ​ និង​តម្លៃ​សេវា​ ក្រសួង​បាន​បញ្ជាក់​ថា ​ខ្លួន​នឹង​ដាក់​ចេញ​ស្ដង់ដារ​បង្ខំ​ និង​រូបមន្ត​សម្រាប់​ការ​គណនា​តម្លៃ​នៃ​តម្លៃ​ភ្ជាប់​ប្រព័ន្ធ​ និង​តម្លៃ​សេវា​អតិថិជន និង​ថ្លៃ​សេវា​។

លោក ​រ៉យ វីរៈ ​អ្នក​វិភាគ​ឧស្សាហកម្ម​ទូរគមនាគមន៍​អាស៊ី​ប៉ាស៊ីហ្វិ​សម្រាប់​ក្រុម​ហ៊ុន​ស្រាវជ្រាវ​ពិភព​លោក Ovum ថ្លែង​ថា ​ខណៈ​គោល​នយោបាយ​ជា​លក្ខណៈ​ស្ថាបនា​របស់​រដ្ឋ ជា​រឿយ​ៗ​ជួយ​ការពារ​ការ​វិនិ​យោគ​ដែល​​មាន​​ស្រាប់ ​បទ​ប្បញ្ញត្តិ​ដ៏​អា​ក្រក់​នេះ​អាច​ធ្វើ​ផ្ទុយ​​ទៅវិញ។

លោក​ថ្លែង​ថា៖ «ជា​ភ័ស្ដុតាង​ឧស្សា​ហម​កម្ម​ទូរ-​គមនា​គមន៍​នឹងតម្រូវ​ឲ្យ​មាន​លំហូរ​សាច់​ប្រាក់​ដើម្បី​គាំទ្រ​ដល់​ការ​ចំណាយ​ទុន។ ​ច្បាប់​ដ៏​តឹង​រ៉ឹង​នេះ​កំពុង​ធ្វើ​ឲ្យ​ខូច​ទឹក​ចិត្ត​ដល់​ការ​វិនិ​យោគ​ថ្មី​ៗ និង​ប៉ះពាល់​ដល់​គុណ​ភាព​សេវា​ កម្រិត​បច្ចេកវិទ្យា​ និង​កាត់​បន្ថយ​ភាព​ទាក់ទាញ​ទី​ផ្សារ​»​។

ក្រសួង​មាន​បំណង​រក្សា​អំណាច​តុលាការ​ក្នុង​ការ​ចោទ​ប្រកាន់​ប្រតិបត្តិករ​ទាក់ទង​សេវា​ទូរគមនាគមន៍​ណា​មួយ​ដែល​បាន​រក​ឃើញ​ថា ​បាន​រំលោភ​លើ​បទ​ប្បញ្ញត្តិ​របស់​សេចក្ដី​ព្រាង​​ច្បាប់​នេះ។

ក្រុមហ៊ុន​ទូរគមនាគមន៍​ជាច្រើន​ដែល​បានរក​ឃើញ​ថា​កំពុង​រំលោភ​​លើ​ច្បាប់​ដែល​​បាន​ដាក់​ចេញ​នេះ ដែល​រួម​មាន​ការ​លក់​សេវា​ឲ្យ​អតិថិជន​ដោយ​គ្មាន​អត្តសញ្ញាណ​ត្រឹមត្រូវ ការ​បដិសេធ​មិន​​ផ្តល់​ឯកសារ​​ផ្លូវ​ការ​ឲ្យ​ក្រសួង ការ​ធ្វើ​ការ​ផ្លាស់​ប្តូរ​បណ្ដាញ​ទូរគមនាគមន៍​ដោយ​គ្មាន​ការ​យល់​ព្រម​ពី​រដ្ឋាភិបាល ការ​ធ្វើ​ឲ្យ​ខូចខាត​បណ្ដាញ​ទូរគមនាគមន៍​ដោយ​ចេតនា​ឬ​គ្មាន​ចេតនា ឬ​ការធ្វើ​ការ​គំរាម​កំហែង​តាម​រយៈ​ឧបករណ៍​ទូរគមនាគមន៍​ដើម្បី​ប្រព្រឹត្ត​បទ​ឧក្រិដ្ឋ​នឹង​ប្រឈម​នឹង​ផល​វិបាក​យ៉ាង​ច្រើន។

ការ​ផាក​ពិន័យ​អាច​ចាប់​ពី ២ ៤០០ ដុល្លារ ដល់ ១,២ លាន​ដុល្លារ​ ដែល​ជាប់​គុក​ពី​ ៦ខែ​ដល់​១៥ឆ្នាំ​ ហើយ​​បើសិ្ថត​នៅ​ក្នុង​ករណី​ធ្ងន់ធ្ងរ​ អាច​ឈាន​ដល់​​ការ​ហាម​ឃាត់​​មិន​ឲ្យ​រស់​នៅ​ក្នុង​ប្រទេស​កម្ពុជា​រយៈ​ពេល​រហូត​ដល់​ ១០​ឆ្នាំ​។

កញ្ញា​ ស៊ន ​រ៉ាម៉ា​ណា ​អ្នក​សម្រប​សម្រួល​សេរី​ភាព​បញ្ចេញមតិ​នៃ​មជ្ឈមណ្ឌល​សិទ្ធិ​មនុស្ស​កម្ពុជា និយាយ​ថា ​សំណើ​ច្បាប់​របស់​ក្រសួង​សម្រាប់​មនុស្ស​ដែល​​ប្រើ​ប្រាស់​ប្រព័ន្ធ​ទូរគមនាគមន៍​ក្នុង​ន័យ​គំរាម​កំហែង​ ឬ​រួម​គំនិត​ប្រព្រឹត្ត​បទ​ឧក្រិដ្ឋ​គឺ​តឹង​រ៉ឹង​ពេក។

កញ្ញា​បន្ត​ថា៖«កាត់​​ទោស​ឲ្យ​ជាប់​គុក​ គឺ​វា​ខ្លាំងពេក ​និង​មិន​សមាមាត្រ​នឹង​បទ​​ឧក្រិដ្ឋ។ ​វា​អាច​ត្រូវ​បាន​គេ​ប្រើ​ប្រាស់​​ដើម្បី​រឹត​បន្តឹង​លើសេរី​ភាព​បញ្ចេញ​មតិ​»។

មិន​អាច​ទាក់​ទង​តំណាង​មក​ពីក្រសួង​បាន​ទេ​ កាល​ពី​ថ្ងៃ​ម្សិល​មិញ៕​PB

0

Comments

Please, login or register to post a comment