.jpg)
ឥណ្ឌូនេស៊ី ទិញយន្តហោះតម្លៃជាង ១ ពាន់លានដុល្លារពី រុស្ស៊ី។ រូបថត AFP
ក្រុងហ្សាការតាៈ ប្រទេសឥណ្ឌូនេស៊ីបានចុះហត្ថលេខាលើកិច្ចព្រមព្រៀងមួយតម្លៃជាង ១ ពាន់លានដុល្លារ ដើម្បីទិញយន្តហោះម៉ូដែល Sukhoi Su-35 ចំនួន ១១ គ្រឿងពីប្រទេសរុស្ស៊ី។ នេះបើយោងតាមមន្ត្រីមួយរូបកាលពីថ្ងៃសៅរ៍សប្តាហ៍មុន។
លោក Totok Sugiharto អ្នកនាំពាក្យក្រសួងការពារជាតិឥណ្ឌូនេស៊ីបានឲ្យដឹងថា កិច្ចព្រមព្រៀងដែលត្រូវបានចុះហត្ថលេខាដោយតំណាងរបស់ប្រទេសទាំង ២ នាទីក្រុងហ្សាការតាកាលពីថ្ងៃពុធកន្លងទៅនេះមានតម្លៃសរុប ១,១៤ ពាន់លានដុល្លារ។
លោកបានប្រាប់ទីភ្នាក់ងារព័ត៌មាន AFP ថា៖ «យន្តហោះម៉ូដែល Sukhoi ចំនួន ២ គ្រឿងនឹងត្រូវបញ្ជូនទៅកាន់ប្រទេសឥណ្ឌូនេស៊ីនៅខែសីហាឆ្នាំ ២០១៨ ខាងមុខនេះ»។
យន្តហោះចំនួន ៦ គ្រឿងផ្សេងទៀតនឹងត្រូវបញ្ចូនទៅឲ្យឥណ្ឌនេស៊ីក្នុងរយៈពេល ១៨ ខែ បន្ទាប់ពីកិច្ចសន្យានេះចូលជាធរមាន ហើយយន្តហោះចំនួន ៣ គ្រឿងចុងក្រោយនឹងត្រូវបញ្ចូនក្នុងរយៈពេល ៥ ខែក្រោយទៀត»។
កិច្ចព្រមព្រៀងនេះកើតមានឡើង បន្ទាប់ពីប្រទេសឥណ្ឌូនេស៊ីបានឲ្យដឹងកាលពីខែសីហាថា ខ្លួននឹងព្យាយាមធ្វើពាណិជ្ជកម្មប្រេងដូង កាហ្វេ និងតែ ដើម្បីទិញយកយន្តហោះចម្បាំងរបស់រុស្ស៊ីនេះ ដោយប្រទេសមួយនេះបានឲ្យដឹងថាខ្លួនមានបំណងទាញយកផលប្រយោជន៍ពីទណ្ឌកម្មអន្តរជាតិមកលើរដ្ឋាភិបាលក្រុងម៉ូស្គូ។
ឥណ្ឌូនេស៊ី និងរុស្ស៊ីបានចុះហត្ថលេខាលើអនុស្សរណៈយោគយល់មួយ ដើម្បីដោះដូរយន្តហោះចម្បាំង Sukhoi ១១ គ្រឿងជាមួយទំនិញសំខាន់ៗមួយចំនួននៅទីក្រុងម៉ូស្គូកាលពីខែសីហាឆ្នាំមុន។
តែយ៉ាងណាកាលពីថ្ងៃសៅរ៍សប្តាហ៍មុនមិនមានការប្រកាសពីវិធីទូទាត់ប្រាក់ សម្រាប់ការចំណាយទេ៕ BP
