ក្រុងហ្សការតាៈ ក្រុមអ្នកវិភាគ និងពាណិជ្ជករនៅឥណ្ឌូនេស៊ីបានឲ្យដឹងថា រដ្ឋាភិបាលឥណ្ឌូនេស៊ីនឹងអនុវត្តគោលនយោបាយថែមទៀត ដើម្បីសម្រេចបានសក្ដានុពលរបស់ខ្លួនក្នុងការទាក់ទាញការវិនិយោគកាន់តែច្រើន។
លោក Sri Mulyani Indrawati រដ្ឋមន្ដ្រីក្រសួងហិរញ្ញវត្ថុឥណ្ឌូនេស៊ី ថ្លែងនៅពេលថ្មីៗនេះថាបច្ចុប្បន្នរដ្ឋាភិបាលកំពុងធ្វើការងារលើគំនិតផ្ដួចផ្ដើមចំនួន ៤ ដោយសង្ឃឹមថា នឹងទាក់ទាញការវិនិយោគកាន់តែច្រើនមកប្រទេសនេះ។
គំនិតផ្ដួចផ្ដើមទាំងនេះរួមមាន ពង្រីកវិស័យពាណិជ្ជកម្មសម្រាប់ការលើកលែងពន្ធធ្វើឲ្យនីតិវិធីដាក់ពាក្យសុំលើកលែងពន្ធមានភាពងាយស្រួល ពង្រីករយៈពេលលើកលែងពន្ធ និងការលុបចោលពន្ធលើភាគលាភដែលដកលើមូលធនិកវិនិយោគរួមនៅក្នុងសហគ្រាសធុនតូច និងមធ្យម (SME)។
ស្ថិតក្រោមគំនិតផ្ដួចផ្ដើមថ្មីទាំងនេះរដ្ឋាភិបាលនឹងបន្តរយៈពេលការលើកលែងពន្ធពីរយៈពេលបច្ចុប្បន្ន ៥-២០ ឆ្នាំរហូតដល់ ៣០ ឆ្នាំ។ រដ្ឋាភិបាលនឹងកាត់បន្ថយពន្ធលើប្រាក់ចំណូលសម្រាប់ SME ពី ១ ភាគរយមកត្រឹម ០,៥ ភាគរយ។
លើសពីនេះរដ្ឋាភិបាលឥណ្ឌូនេស៊ីនឹងផ្ដល់ការកាត់បន្ថយពន្ធរហូតដល់ ២០០ ភាគរយសម្រាប់ក្រុមហ៊ុនណាដែលផ្ដល់ការបណ្ដុះបណ្ដាលវិជ្ជាជីវៈ និងធ្វើការស្រាវជ្រាវ។
បទប្បញ្ញត្តិជាធរមានមួយចំនួននឹងត្រូវតែត្រូវបានកែ ដើម្បីសម្រួលដល់គំនិតផ្ដួចផ្ដើមទាំងនេះដូចជាច្បាប់ស្ដីពីការវិនិយោគមូលធន និងបទប្បញ្ញត្តិ អនុក្រឹត្យរបស់រដ្ឋាភិបាលមួយចំនួនទៀត។
ខណៈស្វាគមន៍ និងផ្ដួចផ្ដើមទាំងនេះលោក Sutrisno Iwantono ប្រធានសមាគមនិយោជកឥណ្ឌូនេស៊ី បានថ្លែងថាការលើកទឹកចិត្តថ្មីៗទាំងនេះគួររួមបញ្ចូលទាំង SME ផងដែរ៕ ANN/LA