ភ្នំពេញៈ ឯកសារកិច្ចសហប្រតិបត្តិការរវាងកម្ពុជានិងចិនចំនួន១៩ ត្រូវបានចុះហត្ថលេខានៅព្រឹកថ្ងៃព្រហស្បតិ៍ ទី១១ ខែមករានេះរវាងប្រទេសទាំងពីរ ក្រោមអធិបតីភាពរបស់លោកនាយករដ្ឋមន្ត្រី ហ៊ុន សែន និងនាយករដ្ឋមន្ត្រីចិនលោក លី ខឺឈាំង។
ក្នុងចំណោមឯកសារទាំងអស់ កិច្ចព្រមព្រៀងចំនួន៩ អនុស្សារណៈនៃការយោគយល់ចំនួន៧ លិខិតប្តូរសារចំនួន២ និងកិច្ចសន្យាចំនួន១ ត្រូវបានចុះហត្ថលេខាដោយភាគីរដ្ឋនិងរដ្ឋ រដ្ឋនិងឯកជន និងឯកជននិងឯកជនរវាងប្រទេសទាំងពីរ។
លោក អ៊ាង សុផល្លែត ជំនួយការផ្ទាល់របស់លោកនាយករដ្ឋមន្ត្រី ហ៊ុន សែន បានថ្លែងថា លោក លី បានមានប្រសាសន៍ថា ដំណើរទស្សនកិច្ចរបស់លោកលើកនេះគឺធ្វើយ៉ាងណាដើម្បីជំរុញទំនាក់ទំនងទ្វេភាគីរវាងប្រទេសកម្ពុជា និងចិន ឲ្យកាន់តែរឹងមាំ និងខ្លាំងក្លាឡើងថែមទៀត ហើយចិននឹងបន្តជួយកម្ពុជាថែមទៀតទៅលើវិស័យនានា ដើម្បីជំរុញការអភិវឌ្ឍកម្ពុជា។
លោក សុផល្លែត បានថ្លែងបន្តថា ក្នុងឱកាសនោះដែរ លោកនាយករដ្ឋមន្ត្រី ហ៊ុន សែន បានស្នើសុំឲ្យភាគីចិនបន្តជួយជំរុញភ្ញៀវទេសចរចិនឲ្យមកទេសនាកម្ពុជាឲ្យកាន់តែច្រើនឡើង និងស្នើឲ្យភាគីចិនពិចារណានាំចេញស្ករអំពៅពីកម្ពុជាផងដែរ ខណៈដែលចំពោះករណីនេះ លោក លី បានស្នើឲ្យរដ្ឋមន្ត្រីក្រសួងពាណិជ្ជកម្មរបស់ប្រទេសទាំងពីរពិភាក្សាគ្នាបន្ថែមទៀត។
ឯកសារទាំង ១៩នេះ រួមមាន៖
១) អនុស្សារណៈនៃការយោគយល់គ្នាស្តីពីការលើកកម្ពស់បន្ថែមការអភិវឌ្ឍមជ្ឈមណ្ឌលផ្ទេរបច្ចេកវិទ្យាកម្ពុជា-ចិន។
២) អនុស្សារណៈនៃការយោគយល់គ្នាសម្រាប់កិច្ចសហប្រតិបត្តិការលើការលើកកម្ពស់គុណភាពផលិតផល។
៣) កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និងបច្ចេទេស។
៤) លិខិតប្តូរសារស្តីពីគម្រោងជួសជុលរាជរាំងអង្គរ។
៥) លិខិតប្តូរសារស្តីពីការផ្តល់ជូនបរិក្ខាមួយកញ្ចប់។
៦) អនុស្សារណៈនៃការយោគយល់គ្នាស្តីពីគម្រោង «ដំណើរនៃក្តីស្រលាញ់ពីបេះដូង» នៅកម្ពុជា។
៧) អនុស្សារណៈនៃការយោគយល់គ្នាស្តីពីផែនការរួមលើការអភិវឌ្ឍកសិកម្មទំនើបនៅកម្ពុជា។
៨) អនុស្សារណៈនៃការយោគយល់គ្នាស្តីពីកិច្ចសហប្រតិបត្តិការក្នុងការស្រាវជ្រាវដំណាំស្រូវ។
៩) កិច្ចព្រមព្រៀងស្តីពីការអនុវត្តគម្រោង «ការបង្កើតមជ្ឈមណ្ឌលបង្កាត់និងអភិរក្សពូជឈើមានតម្លៃនៅកម្ពុជា»។
១០) កិច្ចព្រមព្រៀងឥណទានសម្បទានសម្រាប់គម្រោងសាងសង់ខ្សែអគ្គិសនីតង់ស្យុងខ្ពស់ ២៣០ គីឡូវ៉ុលដំណាក់កាលទី ២។
១១) កិច្ចព្រមព្រៀងឥណទានសម្បទានសម្រាប់គម្រោងពង្រីក និងលើកកម្រិតផ្លូវជាតិលេខ៣ (ចោមចៅ-បែកគូស-ក្រុងកំពត)។
១២) អនុស្សារណៈនៃការយោគយល់គ្នាស្តីពីកិច្ចសហប្រតិបត្តិការទៅវិញទៅមក។
១៣) កិច្ចព្រមព្រៀងសម្បទានសម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធផ្លូវល្បឿនលឿនភ្នំពេញ-ខេត្តព្រះសីហនុ។
១៤) កិច្ចព្រមព្រៀងស្តីពីវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ។
១៥) អនុស្សារណៈនៃការយោគយល់គ្នាស្តីពីពាណិជ្ជកម្មអង្ករ។
១៦) កិច្ចសន្យាសម្រាប់គម្រោងសាងសង់ខ្សែបញ្ជូនអគ្គិសនី ៥០០គីឡូវ៉ុលជាឆ្អឹងខ្នងសម្រាប់បណ្តាញជាតិ និងភ្ជាប់អនុតំបន់។
១៧) កិច្ចព្រមព្រៀងក្របខ័ណ្ឌស្តីពីកិច្ចសហប្រតិបត្តិការហិរញ្ញប្បទានសម្រាប់គម្រោងអាកាសយានដ្ឋានភ្នំពេញថ្មី ប្រទេសកម្ពុជា។
១៨) កិច្ចព្រមព្រៀងក្របខ័ណ្ឌស្តីពីគម្រោងបាញ់បង្ហោះផ្កាយរណប «តេជោ ១»។
១៩) កិច្ចព្រមព្រៀងស្តីពីគម្រោងវិនិយោគលើការសាងសង់ និងប្រតិបត្តិការកំពង់ផែស្ទឹងហាវ។