ក្រុងអូតាវ៉ាៈ ឱនភាពពាណិជ្ជកម្មរបស់ប្រទេស កាណាដា បានកើនឡើងដល់ ៣,២ ពាន់លានដុល្លារ កាណាដា (២,៦ ពាន់លានដុល្លារអាមេរិក) កាលពីខែធ្នូដោយបានបញ្ចប់ឆ្នាំ ២០១៧ ជាមួយនឹងការធ្លាក់ចុះពាណិជ្ជកម្មជាមួយសហរដ្ឋអាមេរិក។ នេះបើយោងតាមទីភ្នាក់ងារស្ថិតិរបស់រដ្ឋាភិបាលកាលពីថ្ងៃអង្គារ។
តួលេខនេះ បានកើនឡើងបើធៀបនឹងឱនភាពចំនួន ២,៧ ពាន់លានដុល្លារកាណាដា ដែលបានចេញផ្សាយកាលពីខែវិច្ឆិកា និងមានកម្រិតខ្ពស់ជាងការព្យាកររបស់ក្រុមអ្នកវិភាគដែលបានព្យាករថាអាចនឹងមានចំនួនតែ ២,២ ពាន់លានដុល្លារកាណាដា។
យោងតាមការិយាល័យស្ថិតិរបស់ប្រទេសកាណាដា ការនាំចូលសរុបបានកើនឡើង ១,៥ ភាគរយដល់កម្រិតខ្ពស់បំផុត ៤៩,៧ ពាន់លានដុល្លារកាណាដាកាលពីខែធ្នូ ទន្ទឹមនឹងនោះដែរការនាំចេញបានកើនឡើងក្នុងរយៈពេលបីខែជាប់គ្នា ដោយបានកើនឡើង ០,៦ ភាគរយ ដល់ ៤៦,៥ ពាន់លានដុល្លារកាណាដា។
កំណើននាំចេញនិងនាំចូលរបស់ប្រទេសនេះ ត្រូវបាននាំមុខដោយផលិតផលថាមពល។
ការនាំចូលប្រេងឆៅ និងកៅស៊ូក្រាលថ្នល់ បានកើនឡើង ២៣,៩ ភាគរយ ខណៈការនាំចូលផលិតផលថាមពលប្រេងសាំងដែលចម្រាញ់រួច បានកើនឡើង ១៧,៨ ភាគរយ ភាគច្រើនដោយសារការនាំចូលប្រេង ម៉ាស៊ូត និងប្រេងឥន្ទនៈកាន់តែខ្ពស់។
ការនាំចូលឈើហ៊ុប រ៉ែ គ្រឿងម៉ាស៊ីនបម្រើឲ្យវិស័យសំណង់ និងឧបករណ៍ផ្សេងៗ ក៏បានកើនឡើងដល់កម្រិតខ្ពស់បំផុត ៨៩៧ លានដុល្លារកាណាដា។
ពាណិជ្ជកម្មរួមជាមួយសហរដ្ឋអាមេរិកបានធ្លាក់ចុះនៅខែធ្នូ ដែលធ្វើឲ្យមានកំណើនអតិរេកពាណិជ្ជកម្មបន្តិចដែលមានចំនួន ៣,៤ ពាន់លានដុល្លារការណា៕ AFP/BP