Search form

Login - Register | FOLLOW US ON

Logo of Phnom Penh Post newspaper Phnom Penh Post - Agribuddy ទទួល​មូលនិធិ​$៧៣​ម៉ឺន

Content image - Phnom Penh Post
ការ​ប្រមូល​ផល​ស្រូវ​របស់​កសិករ​ដោយ​ប្រើ​ម៉ាស៊ីន​ដើម្បី​បូត​កន្លង​មក។ ហេង ជីវ័ន

Agribuddy ទទួល​មូលនិធិ​$៧៣​ម៉ឺន

ភ្នំពេញៈ AGRIBUDDY ជា​អាជីវកម្ម​ផ្តោត​លើ​បច្ចេកវិទ្យា​កសិកម្ម « agritech » មាន​មូលដ្ឋាន​នៅ​សៀមរាប បាន​ទទួល​មូលធន​វិនិយោគ​រួម ៧៣​ម៉ឺន​ដុល្លារ ក្នុង​ការ​អភិវឌ្ឍ​គម្រោង​កម្មវិធី​ជនបទ និង​ការ​បង្កើន​ផ្នែក​ពាណិជ្ជកម្ម​។ នេះ​បើ​យោង​តាម​ប្រធាន​ប្រតិបត្តិ​ក្រុមហ៊ុន​បាន​ឲ្យ​ដឹង​កាលពី​ថ្ងៃ​អង្គារ​។

អាជីវកម្ម​គ្រប់គ្រង​ដោយ​វិនិយោគិន​ជប៉ុន ដែល​ចាប់​ផ្ដើម​ដំណើរការ​កាលពី​ឆ្នាំ​២០១៥ បាន​ប្រមូល​ចំណាប់​អារម្មណ៍​វិនិយោគ​សំខាន់ៗ​ពី​ក្រុមហ៊ុន iSGS Investment Works Inc របស់​ទីក្រុង​តូក្យូ និង​ក្រុម​វិនិយោគិន​លក្ខណៈ​បុគ្គល​ផ្សេង​ទៀត​មកពី​ប្រទេស​សិង្ហ​បុរី​។

​លោក Brandon Ross ប្រធាន​ប្រតិបត្តិ​ក្រុមហ៊ុន Agribuddy បាន​ឲ្យ​ដឹង​ថា ការ​វិនិយោគ​នេះ​នឹង​ជួយ​ពង្រីក​ការ​ទទួល​បាន​កម្មវិធី ដែល​មាន​អ្នក​ចុះឈ្មោះ​អ្នក​ប្រើ​ប្រាស់​រួច​ហើយ​ចំនួន ១៤ ៨៨៤ នាក់ ជាមួយ​ប្រាក់​ចំណូល​កសិកម្ម​រួម ១២៥​លាន​ដុល្លារ លើ​ផ្ទៃដី​ជាង​១៩​ម៉ឺន​ហិកតា​នៅ​ក្នុង​ប្រទេស​កម្ពុជា និង​ប្រទេស​ជិត​ខាង​។

លោក​លើក​ឡើង​ថា​៖«​មូលនិធិ​ថ្មី​នេះ​នឹង​អនុញ្ញាត​ឲ្យ​ក្រុមហ៊ុន Agribuddy ពង្រីក​ចំនួន​កសិករ​ដែល​យើង​ធ្វើ​​ការងារ​ជាមួយ ព្រមទាំង​វិនិយោគ​កាន់​តែ​ច្រើន​ក្នុងការ​ធ្វើ​ពាណិជ្ជកម្ម​ដំណាំ​កសិកម្ម ដើម្បី​ឲ្យ​កសិករ​អាច​ពង្រីក​ចំនួន​អ្នក​ទិញ​របស់​ពួក​គេ​»​។

កម្មវិធី​ដែល​ប្រើប្រាស់​ប្រតិបត្តិការ android នេះ​អាច​ប្រើប្រាស់​ទាំង​ការ​ភ្ជាប់​អ៊ីនធឺណិត និង​គ្មាន​អ៊ីនធឺណិត​នៅ​លើ​ទូរស័ព្ទ​ដៃ ដែល​បង្កើត​ទិន្នន័យ​ពេលវេលា​ពិត​ប្រាកដ ដើម្បី​ត្រួត​ពិនិត្យ​ប្រាក់​ចំណូល និង​គំរូ​ការ​ចំណាយ​របស់​កសិករ។

ប្រព័ន្ធ​នេះ​បាន​អភិវឌ្ឍ​ការ​គណនា ដែល​បង្កើត​របាយការណ៍​ឥណទាន​ផ្ទាល់​ខ្លួន​ផង​ដែរ ដែល​អាច​ត្រូវ​បាន​ប្រើប្រាស់​ដោយ​គ្រឹះស្ថាន​ហិរញ្ញវត្ថុ​ដើម្បី​គណនា​ហានិភ័យ​។

ដំណោះស្រាយ​បច្ចេកវិទ្យា​ហិរញ្ញវត្ថុ​នេះ​បាន​ចុះ​ហត្ថលេខា​លើ​កិច្ច​ព្រម​ព្រៀង​រួច​ហើយ​ជាមួយ​ធនាគារ​អេស៊ីលីដា និង​ធនាគារ​ស្ថាបនា កាលពី​ឆ្នាំមុន ហើយ​បច្ចុប្បន្ន​កំពុង​សហការ​ជាមួយ​ទីភ្នាក់ងារ​សហប្រតិបត្តិ​ការ​អន្តរជាតិ​នៃ​ប្រទេស​ជប៉ុន (JICA)​។ នេះ​បើ​យោង​តាម​លោក Ross​។

លោក​បាន​បន្ថែម​ថា តាម​រយៈ​ការ​កម្មវិធី​ដែល​ជួយ​បង្កើន​លំហូរ​ចូល​ហិរញ្ញវត្ថុ​ដោយ​សេរី​នេះ វា​កំពុង​ធ្វើ​ការ​ងារ​ដើម្បី​បំបាត់​គម្លាត​ដ៏​ធំ​រវាង​ការ​ផ្ដល់​កម្ចី​ដោយ​ប្រុងប្រយ័ត្ន និង​តម្រូវ​ការ​របស់​កសិករ។

លោក​លើក​ឡើង​ថា​៖ «​កម្ពុជា​មាន​បរិមាណ​ផល​ទាប​រួច​ហើយ ហើយ​ការ​ផ្លាស់​ប្តូរ អាកាសធាតុ​បាន​ធ្វើ​ឲ្យ​បញ្ហា​នេះ​កាន់​តែ​ធ្ងន់ធ្ងរ​រួច​ហើយ​»​។

លោក​បន្ថែម​ថា​៖ «​សម្រាប់​កសិករ​ដើម្បី​ប្រកួត​ប្រជែង ពួក គេ​ចាំបាច់​ត្រូវ​បង្កើន​បរិមាណ​ផល​របស់​ពួកគេ ដែល​ទាមទារ​មិន​គ្រាន់តែ​ការ​វិនិយោគ​ប៉ុណ្ណោះ​ទេ ប៉ុន្តែ​ថែមទាំង​ចំណេះដឹង​ផង​ដែរ នៅ​ពេល​ដាំ​ដុះ​ដំណាំ​កសិផល​នៅតាម​កន្លែង​ត្រឹមត្រូវ និង​ពេល​វេលា​ត្រឹម​ត្រូវ ពឹង​លើ​ផ្អែក​លើ​ទីផ្សារ​»៕ LA

0

Comments

Please, login or register to post a comment