.jpg)
កម្មករកំពុងឈរនៅកន្លែងការដ្ឋានរុករករ៉ែរបស់ក្រុមហ៊ុនមួយក្នុងខេត្តរតនគិរីកន្លងមក។ រូបថត Ananth Baliga
ភ្នំពេញៈ ក្រុមហ៊ុនរុករករ៉ែ Angkor Gold Corp នឹងជំរុញឆ្ពោះទៅរកដំណាក់កាលទី ២ នៃកម្មវិធីរុករករ៉ែរបស់ខ្លួននៅក្នុងប្រទេសកម្ពុជា ខណៈមានការបង្ហាញពីការគាំទ្រដ៏រឹងមាំនៃទីតាំងរ៉ែស្ពាន់ និងប្រាក់នៅក្នុងគម្រោង Halo។ នេះបើយោងតាមសេចក្តីប្រកាសព័ត៌មានរបស់ក្រុមហ៊ុន។
អនុប្រធានប្រតិបត្តិការនៅក្រុមហ៊ុន Angkor Gold បានពន្យល់ថានេះគឺជាគម្រោងដ៏សំខាន់មួយសម្រាប់ក្រុមហ៊ុន។ លោកថ្លែងថា៖ «លទ្ធផលវិជ្ជមានដែលបានបង្ហាញរហូតមកដល់ពេលនេះនៅក្នុងជុំដំបូងដែលយើងបានខួងរុករកជម្រៅ ១ ៨០០ ម៉ែត្រ»។
លោកបន្ថែមថាដំណាក់កាលនៃកម្មវិធីទី ២ នេះនឹងមានការខួងរុករក ១ ២០០ ម៉ែត្រ»។
លោកបានបញ្ជាក់ថា៖ «យើងទទួលបានលទ្ធផលវិជ្ជមាន ហើយការងារនេះបានកំណត់ដំណាក់កាលសម្រាប់ដំណាក់កាលទី ២ ។ យើងពិតជាអាចបង្កើតគំរូនៃប្រព័ន្ធនេះ»។ លោកថ្លែងថា៖ «វានៅតែជាការចាប់ផ្តើម ប៉ុន្តែខ្ញុំមានសុទិដិ្ឋនិយម។ វាពិតជាគួរឲ្យភ្ញាក់ផ្អើល»។
លោកបានបន្តថា៖ «រ៉ែទាំងនេះ [ដែលក្រុមហ៊ុន Angkor បានរកឃើញតាមការចង្អុលបង្ហាញដែលមានស្រាប់] គឺមិនតិចនោះទេ ជាធម្មតារ៉ែទាំងនោះគឺជារ៉ែដ៏ធំជាងគេ។ នេះអាចជាគម្រោងដ៏ធំសម្រាប់ទាំងពួកយើង និងប្រទេសកម្ពុជា»។
លោកថ្លែងថា៖ «យើងមានគម្រោងនេះនៅក្នុងផែនការរយៈពេលវែង យើងគ្រាន់តែត្រូវការដៃគូមានដើមទុនច្រើនដើម្បីដំណើរការឆ្ពោះទៅមុខតែប៉ុណ្ណោះ»។
យោងតាមសេចក្តីប្រកាសព័ត៌មានក្រុមហ៊ុនគ្រោងចាក់បញ្ចូលសាច់ប្រាក់ ១ លានដុល្លារក្នុងការបង្កើនគំរូ និងការធ្វើផែនទីភូមិសាស្ដ្ររបស់ខ្លួនរហូតដល់ខែមីនា។
ក្រុមហ៊ុននឹងធ្វើការងាររួមជាមួយក្រុមហ៊ុនដៃគូរុករករ៉ែ សហប្រតិបត្តិការប្រេង ឧស្ម័ន និងលោហធាតុរបស់ជប៉ុន (JOGMEC) ស្ថិតក្រោមអាជ្ញាប័ណ្ណផ្ដាច់មុខអូរយ៉ាដាវខាងត្បូងរបស់ក្រុមហ៊ុន Angkor នៅក្នុងខេត្តរតនគិរីដែលបានផ្ដល់កាលពីឆ្នាំមុន។
លោកបន្ថែមថាក្រុមហ៊ុន JOGMEC បានសន្យាមូលនិធិ ១ លានដុល្លារនេះដើម្បីចំណាយលើសម្ភារជាមុនដល់ថ្ងៃទី ៣១ ខែមីនា។ លោកថ្លែងថាលោកមានទំនុកចិត្តលើដំណាក់កាលទី ៣ នៃការរុករករ៉ែ និងទំនងជាចាប់ផ្ដើមនៅខែកក្កដានៅដើមរដូវវស្សា។ លោកបានបន្តថា៖ «ដំណាក់កាលនីមួយៗកាន់តែសំខាន់ឡើងៗ និងអនុញ្ញាតឲ្យពួកយើងត្រូវផ្ដោតកាន់តែខ្លាំងលើការខួងរករ៉ែ»។
លោកបានថ្លែងថា៖ «អ្វីដែលយើងមើលឃើញ [នៅក្នុងប្រទេសកម្ពុជា] គឺកម្រិតខ្ពស់នៃអត្ថប្រយោជន៍ដោយសារតែជាអ្វីដែលយើងបានធ្វើរួចហើយនៅទីនេះរហូតមកដល់ពេលនេះ។ នៅពេលវិនិយោគិនយល់ថាមានរ៉ែនៅទីនេះ ពួកគេនឹងចាប់ផ្ដើមចូលមកដែលបង្កើតប្រទេសកម្ពុជាជាទិសដៅដ៏ធំមួយសម្រាប់ក្រុមហ៊ុនរុករករ៉ែ»។ លោកបន្តថា៖ «នេះប្រហែលជាការចាប់ផ្ដើមរបស់ប្រទេសកម្ពុជាក្នុងការដំណើរការឧស្សាហកម្មរុករករ៉ែរបស់ខ្លួនឆ្ពោះទៅមុខ»។
លោក យស មុនីរ័ត្ន អ្នកនាំពាក្យក្រសួងរ៉ែ និងថាមពលបានឲ្យដឹងថាគម្រោងនេះបង្ហាញពីភាពវិជ្ជមានសម្រាប់ប្រទេសកម្ពុជា។ លោកថ្លែងថា៖ «បាទ នេះគឺជាដំណើរការឆ្ពោះទៅមុខដោយវិជ្ជមាន»។
លោកបន្ថែមថា ក្រសួងកំពុងស្ថិតក្នុងផែនការអភិវឌ្ឍន៍ប្រចាំឆ្នាំរបស់ខ្លួនសម្រាប់ឧស្សាហកម្មរុករករ៉ែ។
លោក Richard Stanger ប្រធានសមាគមក្រុមហ៊ុនរ៉ែ និងការរុករករ៉ែនៅកម្ពុជា (CAMEC) បានថ្លែងថានេះគឺជាជំហានឆ្ពោះទៅមុខជាវិជ្ជមានសម្រាប់ការរុករករ៉ែនៅក្នុងប្រទេសកម្ពុជា។
លោកបន្ថែមថា ខណៈបច្ចុប្បន្នការរុករករ៉ែបន្តិចបន្តួចកំពុងកើតឡើងនៅក្នុងប្រទេសកម្ពុជា ដំណើរការបទប្បញ្ញត្តិត្រូវបានធ្វើឡើងកាន់តែរលូនដោយរដ្ឋាភិបាលសម្រាប់ក្រុមហ៊ុនក្នុងការចូលក្នុងឧស្សាហកម្មនេះ។
ក្រុមហ៊ុនរុករករ៉ែរបស់អូស្ត្រាលី Medusa Mining កាលពីសប្តាហ៍មុនក៏បានប្រកាសផែនការចាប់ផ្ដើមរុករករ៉ែមាស ស្ពាន់ និងប្រេងនៅក្នុងឃុំព្រែកកាំពីរបស់ខេត្តក្រចេះដែលលាតសន្ធឹងប្រហែល ៣៥ គីឡូម៉ែត្រនៃទន្លេមេគង្គជាកន្លែងត្រីផ្សោតទន្លេជិតផុតពូជរស់នៅផងដែរ។
ក្រុមហ៊ុន Medusa Mining បានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយក្រុមហ៊ុន Sea Resources ដែលត្រូវបានផ្ដល់សិទ្ធិផ្ដាច់មុខក្នុងការរុករកនៅព្រែកកាំពីដោយក្រសួងរ៉ែ និងថាមពលកាលពីខែមិថុនាឆ្នាំមុន។ តំបន់ព្រែកកាំពីគឺជាកន្លែងសត្វផ្សោតទន្លេ Irrawaddy ដែលជិតផុតពូជរស់នៅក្នុងនោះមានប្រហែល ៨០ ក្បាលក្នុងទន្លេមេគង្គ៕ LA
