Search form

Login - Register | FOLLOW US ON

Logo of Phnom Penh Post newspaper Phnom Penh Post - Apple ដាក់​បង្ហាញ iPhone បី​ម៉ូដែល

Content image - Phnom Penh Post
ទូរស័ព្ទ iPhone 8 ទូរស័ព្ទ iPhone X និង ទូរស័ព្ទ iPhone 8Plus ក្នុង​ពេល​ដាក់​បង្ហាញ​។ រូបថត AFP

Apple ដាក់​បង្ហាញ iPhone បី​ម៉ូដែល

ក្រុងគូភើទីណូៈ ក្រុមហ៊ុន Apple បាន​ដាក់​បង្ហាញ​ទូរស័ព្ទ iPhone ស៊េរី​ថ្មី​ចំនួន​បី​ម៉ូដែល​កាលពី​យប់​ថ្ងៃ​អង្គារ ដែល​ត្រូវ​បាន​ចាត់ទុក​ថា «​ជា​ការ​លោត​ផ្លោះ​ធំ​ជាង​គេ​» គិត​ចាប់​តាំងពី​ទូរស័ព្ទ iPhone ដំបូង​ចេញ​លក់​កាលពី ១០ ​ឆ្នាំ​មុន​។

លោក Tim Cook នាយក​ប្រតិបត្តិ​ក្រុមហ៊ុន Apple បាន​ប្រកាស​បង្ហាញ​ទូរស័ព្ទ iPhone X ដែល​មាន​គុណភាព​ល្អ និង​ទូរស័ព្ទ iPhone ស៊េរី​ថ្មី​ផង​ដែរ​គឺ​ទូរស័ព្ទ iPhone 8 និង​ទូរស័ព្ទ iPhone 8 Plus​។

ថ្លែង​ក្នុង​ព្រឹត្តិការណ៍​ដំបូង​នៅ​រោង​មហោស្រព​ថ្មី​ដែល​ត្រូវ​បាន​ដាក់​ឈ្មោះ​ថា Steve Jobs តាម​ឈ្មោះ​សហស្ថាបនិក​របស់​ក្រុមហ៊ុន Apple ដែល​បាន​ទទួល​មរណភាព​ហើយ​នោះ​លោក Cook មាន​ប្រសាសន៍​ថា​ទូរស័ព្ទ​ទំនើប​ស៊េរី​ចុង​ក្រោយ​នេះ​គឺជា​ការ​វិវឌ្ឍ​មួយ​សម្រាប់​ក្រុមហ៊ុន​ក្នុង​រយៈពេល​ ១ ​ទសវត្សរ៍ បន្ទាប់ពី​ការ​ចេញ​លក់​ទូរស័ព្ទ iPhone លើក​ដំបូង​។

លោក Cook បាន​ថ្លែង​ថា​៖ «១០ ​ឆ្នាំ​ក្រោយ​មក​វា​ពិតជា​សមស្រប​ណាស់​ដែល​យើង​ឈរ​នៅ​ទី​នេះ​ត្រង់​កន្លែង​មួយ​នេះ​នៅ​ថ្ងៃ​នេះ​ដើម្បី​ដាក់​បង្ហាញ​ផលិតផល​មួយ​ដែល​នឹង​កំណត់​ផ្លូវ​សម្រាប់​បច្ចេកវិទ្យា​នៅ​ក្នុង​ទសវត្សរ៍​ក្រោយ​» ដោយ​លោក​បាន​ចាត់ទុក​ថា​ទូរស័ព្ទ iPhone X «​គឺជា​ការ​លោត​ផ្លោះ​ទៅ​មុខ​ធំ​ជាង​គេ គិត​ចាប់​តាំង​ពី​ការ​ចេញ​លក់​ទូរស័ព្ទ iPhone ដំបូង​មក​»​។

ទូរស័ព្ទ iPhone X មាន​អេក្រង់​ទំហំ​ ៥,៨ ​អ៊ិញ និង​ប្រើប្រាស់​ការ​សម្គាល់​មុខ ដើម្បី​ដោះ​សោ​ទូរស័ព្ទ​ព្រម​ទាំង​មាន​អេក្រង់ «super retina» ដែល​មាន​គុណភាព​ល្អ​ជាង​មុន​រួម​ជាមួយ​នឹង​ក្រាហ្វិក និង​រូបភាព​កាន់តែ​ច្បាស់​។

ទូរស័ព្ទ​សេរី​ថ្មី​នេះ​នឹង​មាន​លក់​នៅ​ទីផ្សារ​នៅ​ថ្ងៃ​ទី​ ៣ ខែ​វិច្ឆិកា​ខាង​មុខ​ក្នុង​តម្លៃ​ចាប់​ពី​ ៩៩៩ ដុល្លារ​ក្នុង​មួយ​គ្រឿង ចំណែកឯ​ទូរស័ព្ទ iPhone 8 និង 8Plus នឹង​មាន​លក់​នៅ​ទីផ្សារ​នៅ​ចុង​ខែ​នេះ​ដោយ​ទូរស័ព្ទ iPhone 8 មាន​តម្លៃ ៦៩៩ ដុល្លារ និង​ទូរស័ព្ទ iPhone 8Plus មាន​តម្លៃ ៧៩៩ ​ដុល្លារ​។

ទូរស័ព្ទ​ស៊េរី​ថ្មី​ទាំង​ ៣ ​ម៉ូដែល​នេះ​នឹង​អាច​បញ្ចូល​ថ្ម​ដោយ​ដុំ​បញ្ចូល​ថ្ម​ឥត​ខ្សែ​ដោយ​ប្រើប្រាស់​ស្តង់ដារ​ពិភពលោក Qi​។

លោក Phil Schiller អនុប្រធាន​ជាន់​ខ្ពស់​របស់​ក្រុមហ៊ុន Apple បាន​ឲ្យ​ដឹង​ថា​ទូរស័ព្ទ iPhone 8 និង 8 Plus ដែល​មាន​តួ​ជា​កញ្ចក់​នេះ​គឺជា​ទូរស័ព្ទ​ទំនើប​ដំបូង​គេ​ «​ដែល​ត្រូវ​បាន​បង្កើតឡើង​យ៉ាង​ពិតប្រាកដ​សម្រាប់​ការ​ប្រើប្រាស់​ជាក់ស្តែង​ដែល​មាន​គុណភាព​កាន់តែ​ល្អ​» ដោយ​មាន​ថ្ម​កាន់​បាន​យូរ និង​ក្រាហ្វិក​ល្អ​ជាង​ឧបករណ៍​ដំណើរការ​ទិន្នន័យ​របស់​ទូរស័ព្ទ​មុនៗ​»​។

ក្រុមហ៊ុន Apple ក៏​បាន​ដាក់​បង្ហាញ​នាឡិកា​ដៃ​ទំនើប​ស៊េរី​ថ្មី Watch Series 3 និង​ប្រព័ន្ធ​វីដេអូ​ថ្មីៗ​ជាច្រើន​សម្រាប់​ទូរទស្សន៍ HD 4K​។

នាឡិកា​ថ្មី​នេះ​មាន​លទ្ធភាព​ភ្ជាប់​អ៊ីនធឺណិត​ដោយ​ខ្លួនឯង​បាន​ហើយ​នឹង​មាន​តម្លៃ​ចាប់ពី ៣៩៩ ដុល្លារ​៕ BP

0

Comments

Please, login or register to post a comment