សិង្ហបុរីៈ ក្រុមហ៊ុនផលិតយន្តហោះ Boeing បានឲ្យដឹងកាលពីថ្ងៃអង្គារថា នាយកដ្ឋានផ្នែកសេវាសកលលោករបស់ខ្លួនបានចុះហត្ថលេខាលើកិច្ចព្រមព្រៀងតម្លៃជិត ១ ពាន់លានដុល្លារនៅក្នុងពិព័រណ៍យន្តហោះក្នុងប្រទេសសិង្ហបុរី លើវិស័យជាច្រើនដូចជាគ្រឿងបន្លាស់ ការថែទាំ ការជួសជុល និង ការបណ្ដុះបណ្ដាល។
កិច្ចព្រមព្រៀងនេះបញ្ជាក់ពីកំណើនដ៏មានសារៈសំខាន់នៃទីផ្សារពាណិជ្ជកម្មដ៏ធំនៅក្នុងតំបន់អាស៊ីប៉ាស៊ីហ្វិក។
លោក Stan Deal ប្រធាននាយកប្រតិបត្តិក្រុមហ៊ុន Boeing Global Services បានថ្លែងថា៖ «ក្រុមហ៊ុន Boeing មានបំណងជួយឲ្យអតិថិជនមានសុទិដ្ឋិនិយមលើប្រតិបត្តិការនៃក្រុមយន្តហោះរបស់ខ្លួន និងកាត់បន្ថយការចំណាយលើប្រតិបត្តិការ»។
ក្នុងចំណោមកិច្ចព្រមព្រៀងទាំងនោះគឺកិច្ចព្រមព្រៀងមួយជាមួយក្រុមហ៊ុនអាកាសចរណ៍ Malaysia Airlines ដើម្បីទទួលបានឧបករណ៍ជួសជុលពីក្រុមផ្លាស់ប្តូរដែលថែទាំដោយក្រុមហ៊ុនផលិតយន្តហោះអាកាសចរណ៍ឈានមុខគេរបស់អាមេរិកមួយនេះ។
ក្រុមហ៊ុនអាកាសចរណ៍សិង្ហបុរី Singapore Airlines បានចុះហត្ថលេខាលើកិច្ចព្រមព្រៀងមួយក្នុងការប្រើប្រាស់បញ្ជីសៀវភៅអេឡិចត្រូនិកសម្រាប់កត់ហេតុការណ៍នៅលើយន្តហោះ Boeing 777 និងយន្តហោះ Boeing 787 របស់ខ្លួន។
ក្រុមហ៊ុនមិនបានផ្ដល់តម្លៃនីមួយៗសម្រាប់កិច្ចព្រមព្រៀងទាំងនោះទេ ប៉ុន្តែបានថ្លែងថាកិច្ចព្រមព្រៀងទាំងនោះមានតម្លៃសរុបជាង ៩០០ លានដុល្លារ។
ក្រុមហ៊ុនដៃគូប្រកួតប្រជែងអឺរ៉ុបរបស់ខ្លួន Airbus បានឲ្យដឹងកាលពីថ្ងៃអង្គារថា ការធ្វើចរាចរណ៍ផ្លូវអាកាសនឹងកើនឡើង ៣ ដងនៅតំបន់អាស៊ីប៉ាស៊ីហ្វិកក្នុងរយៈពេល ២០ ឆ្នាំក្រោយដែលធ្វើឲ្យតំបន់នេះក្លាយជាទីផ្សារអាកាសចរណ៍ធំជាងគេរបស់ពិភពលោក។
តំបន់នេះនឹងត្រូវការយន្តហោះថ្មី ១៤ ៤៥០ គ្រឿងក្នុងអំឡុងពេលនោះ ដែលមានតម្លៃរួច ២,៣ ពាន់ពាន់លានដុល្លារ។
តម្លៃនេះមានចំនួនជាង ៤០ ភាគរយនៃតម្រូវការពិភពលោក។ នេះបើយោងតាមក្រុមហ៊ុន Airbus។
ពិព័រណ៍យន្តហោះនៅប្រទេសសិង្ហបុរីដែលជាព្រឹត្តិការណ៍ធំជាងគេនៅតំបន់អាស៊ីត្រូវបានរៀបចំឡើងជារៀងរាល់ ២ ឆ្នាំម្ដង ប៉ុន្តែក្រុមអ្នកវិភាគថ្លែងថាពួកគេមិនរំពឹងថានឹងមានការបញ្ជាទិញយន្តហោះសំខាន់ៗនោះទេនៅក្នុងពិព័រណ៍យន្តហោះឆ្នាំនេះ៕ LA