Search form

Login - Register | FOLLOW US ON

Logo of Phnom Penh Post newspaper Phnom Penh Post - EMIA ទិញ​ភាគ​ហ៊ុន​ក្រុម​ហ៊ុន iCare Benefits

Content image - Phnom Penh Post
ម៉ាស៊ីន​បោក​ខោអាវ​ដាក់​លក់​នៅផ្សារ​អុីអន។ iCare ផ្តល់​សេវា​ដែលអាច​ទិញ​សម្ភារ​គ្មានការ​ប្រាក់​​។ ផា លីណា

EMIA ទិញ​ភាគ​ហ៊ុន​ក្រុម​ហ៊ុន iCare Benefits

ភ្នំពេញៈ ក្រុមហ៊ុន​មូលនិធិ​មូលធន​ឯកជន​មួយ​ដែល​មាន​មូលដ្ឋាន​នៅ​សិង្ហ​បុរី និង​ផ្ដោត​ទៅ​លើ​អាជីវកម្ម​កំពុង​អភិវឌ្ឍន៍​នៅ​មហា​អនុ​តំបន់​ទន្លេ​មេគង្គ (GMS) កាលពី​សប្ដាហ៍​មុន​បាន​ទិញ​ភាគហ៊ុន​ភាគ​តិច​ក្នុង​ក្រុមហ៊ុន iCare Benefits (Cambodia) Co., Ltd ដែល​ផ្តល់​សេវា​បែប​កម្មវិធី​ផ្ដល់​អត្ថប្រយោជន៍​ដល់​បុគ្គលិក​មួយ​ដល់​សហគ្រាស​ប្រតិបត្តិការ​នៅ​កម្ពុជា​។

ភាគ​ហ៊ុន​ភាគ​តិច​ក្នុង​ក្រុមហ៊ុន iCare ត្រូវ​បាន​ទិញ​ដោយ​ក្រុមហ៊ុន Emerging Markets Investment Advisers (EMIA) តាម​រយៈ​មួយ​ផ្នែក​នៃ​មូលនិធិ Cambodia Laos Myanmar Development Fund II (CLMDF II) ក្នុង​តម្លៃ​មួយ​ដែល​មិន​ប្រាប់​ឲ្យ​ដឹង​។ មូលនិធិ CLMDF II គ្រប់គ្រង​ទឹក​ប្រាក់ ៦៥​លាន​ដុល្លារ​។

តាម​រយៈ​ភាព​ជា​ដៃ​គូ​នេះ ក្រុមហ៊ុន iCare មាន​បំណង​ផ្ដល់​ឲ្យ «​បុគ្គលិក​កម្មករ​រាប់ពាន់នាក់​នូវ​លទ្ធភាព​ទទួលបាន​ហិរញ្ញប្បទាន​បង់​រំលស់​តម្លៃ​ទាប​ដើម្បី​ទិញ​ផលិតផល​និង​សេវា​សំខាន់ៗ​»​។ នេះ​បើ​យោង​តាម​សេចក្ដី​ប្រកាស​ព័ត៌មាន​របស់​ក្រុមហ៊ុន​។

លោក Joshua Morris អគ្គនាយក EMIA បាន​ប្រាប់ ​ភ្នំពេញ​ ប៉ុស្ដិ៍​ កាលពី​ម្សិលមិញ​ថា តាម​រយៈ​ការ​មាន​ភាគហ៊ុន​ក្នុង​ក្រុមហ៊ុន​ដែល​ផ្តល់​សេវា​អត្ថប្រយោជន៍​ដល់​បុគ្គលិក​នេះ ភាព​រីក​ចម្រើន​របស់​ក្រុមហ៊ុន iCare នឹង​ជួយ​សម្រួល​ដល់​ប្រតិបត្តិការ​នានា ដូចជា​ការ​ផ្ទៀង​ផ្ទាត់​ទិន្នន័យ ពោល​គឺជា​អ្វីដែល​កាត់​បន្ថយ​បាន​យ៉ាង​ខ្លាំង​នូវ​ហានិភ័យ​ដែល​មាន​ក្នុង​ក្រុមហ៊ុន​ហិរញ្ញវត្ថុ​អតិថិជន​ធម្មតា​។

លោក Morris បាន​សរសេរ​តាម​អ៊ីមែល​មួយ​ថា​៖ «​ការ​វិនិយោគ​របស់​យើង​នឹង​គាំទ្រ​ដល់​ការ​ពង្រីក​ប្រតិបត្តិការ​អាជីវកម្ម​របស់​ក្រុមហ៊ុន [iCare] និង​ការ​ពង្រីក​សេវា​របស់​ខ្លួន​ដល់​ក្រុមហ៊ុន​កាន់​តែ​ច្រើន និង​បុគ្គលិក​របស់​ក្រុមហ៊ុន​ទាំងនោះ​នៅ​ទូទាំង​ប្រទេស​កម្ពុជា​»​។

លោក​បន្ត​ថា​៖ «​មូលនិធិ [​សម្រាប់​ការទិញ​ហ៊ុន​] នេះ នឹង​ត្រូវ​បាន​ប្រើប្រាស់​ដើម្បី​បង្កើត​ក្រុម​ការងារ​ក្នុង​ស្រុក​របស់​ក្រុមហ៊ុន iCare និង​ការ​ពង្រីក​កម្មវិធី​ទីផ្សារ​របស់​ខ្លួន​»​។

យោង​តាម​លោក Morris បុគ្គលិក​របស់​ក្រុមហ៊ុន​ដែល​ជា​ដៃគូ​របស់​ក្រុមហ៊ុន iCare តាម​រយៈ​សមាជិក​ភាព មាន​សិទ្ធិ​ទិញ​ផលិតផល​និង​សេវា​ជា​ពិសេស ដូចជា​ទូរស័ព្ទ​ស្មាត​ហ្វូ​ន និង​ទំនិញ​អេឡិច​ត្រូនិក​ធំៗ ដែល​រួម​មាន​ឧបករណ៍​ប្រើ​ប្រាស់​ក្នុង​លំនៅឋាន​ដូច​ជា​ម៉ាស៊ីន​បោក​សម្លៀក​បំពាក់ ម៉ាស៊ីន​ត្រជាក់ និង​ឆ្នាំង​ដាំបាយ ព្រម​ទាំង​ម៉ូតូ និង​កង់​ស្ថិត​ក្រោម​កម្មវិធី​បង់​រំលស់​អត្រា​ការ​ប្រាក់​សូន្យ​ភាគរយ​រយៈពេល​៦​ខែ​។

លោក​ថ្លែង​ថា​៖ «​មិនមាន​ការ​ចំណាយ ឬ​តម្លៃ​ដែល​ត្រូវ​បង់​ដោយ​ក្រុមហ៊ុន​ចូលរួម​ជាមួយ​ក្រុមហ៊ុន iCare Benefits នោះ​ទេ ហើយ​ការ​ចុះ​ឈ្មោះ មិន​តម្រូវ​ឲ្យ​បុគ្គលិក​កម្មករ​ចំណាយ​នោះទេ​»​។ លោក​បន្តថា​៖«​ដូច្នេះ ចំពោះ​ក្រុមហ៊ុន​នានា វា​ជា​កម្មវិធី​ផ្ដល់​អត្ថ​ប្រយោជន៍​ដល់​បុគ្គលិក​ដែលមាន​បំណង​បង្កើន​ការ​រក្សា​ទុក​បុគ្គលិក​សម្រាប់​ក្រុមហ៊ុន​ជា​ដៃគូ​របស់ iCare»​។

លោក​បន្ថែម​ថា មិន​ដូច​ក្រុមហ៊ុន​ភតិសន្យា​ដែល​គិត​អត្រា​ការ​ប្រាក់ ឬ​តម្លៃ​សម្រាប់​បុគ្គល ឬ​បុគ្គលិក​ក្រុមហ៊ុន គំរូ​អាជីវកម្ម​របស់​ក្រុមហ៊ុន iCare អាច​ទទួល​បាន​ផលិតផល​ក្នុង​តម្លៃ​ចុះ​ភាគ​រយ​តាម​រយៈ​បណ្ដាញ​ដ៏​ទូលំទូលាយ​របស់​ខ្លួន​។

លោកស្រី មាស ម៉ូលីកា អគ្គនាយក​ក្រុមហ៊ុន iCare បាន​ឲ្យ​ដឹង​ថា បទ​ពិសោធ​របស់​ក្រុមហ៊ុន EMIA នឹងមិន​អាច «​កាត់​ថ្លៃ​បាន​» ទេ​សម្រាប់​ការ​ពង្រីក​អាជីវកម្ម​នៅ​ពេល​អនាគត​នៅ​ក្នុង​ទីផ្សារ​កម្ពុជា​។

លោក​ស្រី​ថ្លែង​ថា​៖ «​បទពិសោធ​ផ្នែក​ឧស្សាហកម្ម​របស់ EMIA និង​បណ្ដាញ​ដ៏​ទូលំ​ទូលាយ​នៃ​ទំនាក់​ទំនង​នេះ​នឹង​បង្ហាញ​ពី​ភាព​មិន​អាច​កាត់​ថ្លៃ​បាន​ដល់​ពួក​យើង ខណៈ​យើង​កំពុង​រីក​ចម្រើន និង​ពង្រីក​ប្រតិបត្តិការ​របស់​យើង​នៅ​ពេល អនាគត​»៕ LA

0

Comments

Please, login or register to post a comment