.jpg)
ក្រុងញូវយ៉កៈ ក្រុមហ៊ុន Ford បានបណ្តេញលោក Raj Nair ប្រធានក្រុមហ៊ុន Ford ប្រចាំតំបន់អាមេរិកខាងជើងចេញពីតំណែង នៅពេលមានការចោទប្រកាន់ពីបទ «មានឥរិយាបថមិនសមរម្យ» របស់មន្ត្រីប្រតិបត្តិរូបនេះ។ នេះបើយោងតាមក្រុមហ៊ុនផលិតរថយន្តដ៏ធំរបស់សហរដ្ឋអាមេរិកមួយនេះកាលពីថ្ងៃពុធ។
ក្រុមហ៊ុន Ford មិនបានប្រកាសពីព័ត៌មានលម្អិតទេ តែបានឲ្យដឹងថា ការវាយតម្លៃមួយ «បានសម្រេចពីឥរិយាបថជាក់លាក់របស់លោក Nair ដែលផ្ទុយពីក្រមសីលធម៌របស់ក្រុមហ៊ុន»។
លោក Nair បានបម្រើការនៅក្រុមហ៊ុន Ford ក្នុងឆ្នាំ ១៩៨៧ និងបានកាន់តំណែងជាន់ខ្ពស់ជាច្រើនក្នុងក្រុមហ៊ុនផលិតរថយន្តធំជាងគេទី ២ របស់សហរដ្ឋអាមេរិកមួយនេះ នៅមុនពេលចាត់តាំងឲ្យដឹកនាំក្រុមហ៊ុន Ford ប្រចាំតំបន់អាមេរិកខាងជើងកាលពីខែមិថុនាឆ្នាំ ២០១៧។
លោកក៏បានកាន់តំណែងជាអនុប្រធានប្រតិបត្តិក្នុងក្រុមហ៊ុននេះផងដែរ។
លោក Jim Hackett នាយកប្រតិបត្តិក្រុមហ៊ុន Ford បានឲ្យដឹងក្នុងសេចក្តីថ្លែងការណ៍មួយថា៖ «យើងបានសម្រេចបែបនេះ បន្ទាប់ពីការវាយតម្លៃយ៉ាងហ្មត់ចត់ និងការពិចារណាដ៏ប្រុងប្រយ័ត្ន»។
លោកបានថ្លែងបន្ថែមថា៖ «ក្រុមហ៊ុន Ford ប្តេជ្ញាចិត្តយ៉ាងខ្លាំងក្លាទៅនឹងការផ្តល់ និងបង្កើតនូវវប្បធម៌សុវត្ថិភាពដោយការគោរព ហើយយើងរំពឹងថា មេដឹកនាំរបស់យើងនឹងប្រកាន់ខ្ជាប់ទាំងស្រុងនូវតម្លៃទាំងនេះ»។
លោក Nair បានបង្ហាញពីការស្តាយក្រោយនៅក្នុងសេចក្តីប្រកាសព័ត៌មានមួយ។ លោកថ្លែងថា៖ «ខ្ញុំពិតជាសោកស្តាយដែលហេតុការណ៍មួយចំនួនកើតឡើងដែលខ្ញុំមិនបានបង្ហាញពីឥរិយាបថក្នុងនាមជាមេដឹកនាំស្របតាមគោលការណ៍ដែលក្រុមហ៊ុន និងរូបខ្ញុំផ្ទាល់តែងតែគាំទ្រនោះ»៕ BP
