Search form

Login - Register | FOLLOW US ON

Logo of Phnom Penh Post newspaper Phnom Penh Post - LOLC ក្លាយ​ជា​ម្ចាស់​ភាគ​ហ៊ុន​ធំ​នៅ​ប្រាសាក់

Content image - Phnom Penh Post
ម៉ូតូ​រ៉ឺម៉ក​ជិះ​កាត់​មុខ​សាខា​គ្រឹះស្ថាន​មីក្រូ​ហិរញ្ញវត្ថុ​ប្រាសាក់​មួយ​នៅ​ក្នុង​ទីក្រុង​ភ្នំពេញ​កន្លង​មក។ ហេង ជីវ័ន

LOLC ក្លាយ​ជា​ម្ចាស់​ភាគ​ហ៊ុន​ធំ​នៅ​ប្រាសាក់

ភ្នំពេញៈ Bank of East Asia ដែល​ជា​ក្រុមហ៊ុន​ហិរញ្ញវត្ថុ​ឈាន​មុខ​គេ​របស់​ទីក្រុង​ហុងកុង និង​ក្រុមហ៊ុន LOLC របស់​ស្រីលង្កា បាន​ប្រកាស​កាលពី​ថ្ងៃ​សុក្រ​ថា ពួក​គេ​បាន​ក្លាយ​ជា​ភាគ​ទុនិក​ភាគ​ច្រើន​របស់​ប្រាសាក់ ដែល​កិច្ច​ព្រម​ព្រៀង​នេះ​ត្រូវ​បាន​រាយការណ៍​ថា​មាន​តម្លៃ​ ១៨៦ ​លាន​ដុល្លារ​។

យោង​តាម​សេចក្ដី​ប្រកាស​ព័ត៌មាន​រួម ធនាគារ Bank of East Asia (BEA) និង​ក្រុមហ៊ុន LOLC បាន​ទិញ​ភាគហ៊ុន​ភាគ​ច្រើន​របស់ ប្រាសាក់ ដែល​បាន​គ្រប់គ្រង​ដោយ​ក្រុមហ៊ុន Dragon Capital Group Limited ក្រុមហ៊ុន , Belgian Investment Company for Developing Countries SA (BIO) និង​ក្រុមហ៊ុន Netherlands Development Finance Company (FMO)​។

កិច្ច​ព្រម​ព្រៀង​នេះ​បង្កើន​ភាគហ៊ុន​ដែល​មាន​ស្រាប់​របស់​ក្រុមហ៊ុន LOLC ពី ​២២​ ភាគរយ ដល់​ ៧០ ​ភាគរយ ដោយ​ក្រុមហ៊ុន BEA កាន់​កាប់​ភាគ​ហ៊ុន​២១​ភាគរយ និង​ប្រាសាក់​កាន់​កាប់​ភាគ​ហ៊ុន​នៅ​សល់​៩​ភាគរយ​។

ប្រព័ន្ធ​ព័ត៌មាន​ស្រី​លង្កា បាន​បញ្ជាក់​ថា កិច្ច​ព្រម​ព្រៀង​នេះ​មាន​តម្លៃ ១៨៦​លាន​ដុល្លារ ខណៈ​ប្រាសាក់ និង​ភាគ​ទុនិក​ផ្សេង​ទៀត​មិន​អាច​ទាក់ទង​សុំ​ការ​អត្ថាធិប្បាយ​ទេ​កាលពី​ម្សិលមិញ​។

ប៉ុន្តែ សេចក្ដី​ប្រកាស​ព័ត៌មាន​រួម​បាន​ឲ្យ​ដឹង​ថា ប្រាសាក់​បាន​រីក​ចម្រើន​ក្លាយ​ជា MFI ឈាន​មុខ​គេ​របស់​កម្ពុជា​ជាមួយ​នឹង​ផលបត្រ​ទ្រព្យ​សកម្ម ១,៣​ពាន់​លាន​ដុល្លារ​។

សេចក្ដី​ប្រកាស​ព័ត៌មាន​នេះ​បន្ថែម​ថា កិច្ច​ព្រម​ព្រៀង​នេះ​នឹង​ជួយ​ត្រួសត្រាយ​ផ្លូវ​ឲ្យ​ប្រាសាក់​ក្លាយ​ជា​ធនាគារ​ពាណិជ្ជ​នៅ​ពេល​អនាគត​ដ៏​ខ្លី​ខាង​មុខ​។

សេចក្ដី​ប្រកាស​ព័ត៌មាន​ឲ្យ​ដឹង​ថា​៖ «​ប្រាសាក់​មាន​អ្នក​ដាក់​ប្រាក់​បញ្ញើ​ប្រហែល​ ៥៣០ ០០០ នាក់ ជាមួយ​នឹង​ប្រាក់​បញ្ញើ​មូលដ្ឋាន​ជាង​៦៦០​លាន​ដុល្លារ គិត​ត្រឹម ​ខែ​កុម្ភៈ ឆ្នាំ​ ២០១៧»​។

សេចក្ដី​ប្រកាស​ព័ត៌មាន​បន្ត​ថា​៖ «​ប្រា​សាក់​គ្រោង​នឹង​ធ្វើ​ពិពិធ​កម្ម​អាជីវកម្ម របស់​ខ្លួន និង​ការ​ផ្លាស់​ប្តូរ​ទៅ​ជា​ធនាគារ​ពាណិជ្ជ​ពេល​អនាគត​ដ៏​ខ្លី​»​។

លោក ស៊ឹម សេនា​ជាតិ អគ្គនាយក ប្រាសាក់ ត្រូវ​បាន​ដក​ស្រង់​សម្ដី​នៅ​ក្នុង​សេចក្ដី​ប្រកាស​ព័ត៌មាន​ដោយ​ថ្លែង​ថា BEA គឺជា​វិនិយោគិន​យុទ្ធសាស្ដ្រ​មួយ ហើយ​នឹង «​រួម​ចំណែក​បន្ថែម​ទៀត​ដល់​ការ​អភិវឌ្ឍ​សេដ្ឋកិច្ច និង​លទ្ធភាព​ទទួល​បាន​សេវា​ហិរញ្ញវត្ថុ​គ្រប់ៗ​គ្នា​ប្រកប​ដោយ​ស្ថិរភាព​នៅ​ប្រទេស​កម្ពុជា​»​។

លោក Ishara Nanayakkara អនុប្រធាន​ក្រុមហ៊ុន​LOLC Group បាន​បញ្ជាក់​ក្នុង​សេចក្ដី​ប្រកាស​ព័ត៌មាន​នេះ​ថា កិច្ច​ព្រម​ព្រៀង​នេះ​បាន​បង្ហាញ​ការ​ពង្រីក​ការ​វិនិយោគ​នៅ​ក្រៅ​ប្រទេស​ជា​លើក​ដំបូង​របស់​ខ្លួន និង​ថា ភាគ​ទុនិក​មាន​ចក្ខុ​វិស័យ​រួម​នៃ​ការ​បង្កើន​លទ្ធភាព​ទទួល​បាន​សេវា​ហិរញ្ញវត្ថុ​នៅ​ក្នុង​ប្រទេស​កម្ពុជា​។

លោក David Li ប្រធាន​នាយក​ប្រតិបត្តិ​ក្រុមហ៊ុន BEA បាន​ឲ្យ​ដឹង​ថា កិច្ច​ព្រម​ព្រៀង​នេះ​បាន​បង្ហាញ​ទីតាំង​ឈរ​ជើង​លើក​ដំបូង​នៅ​កម្ពុជា ហើយ​នឹង​ជួយ​ដល់​គ្រឹះស្ថាន​ហិរញ្ញវត្ថុ​ចូល​ទៅ​ដល់​សហគមន៍​សេដ្ឋកិច្ច​អាស៊ាន​។

លោក​ត្រូវ​បាន​ដក​ស្រង់​សម្ដី​ថា​៖«​តាម​រយៈ​ប្រាសាក់ ធនាគារ​របស់​យើង​នឹង​ពង្រឹង​បន្ថែម​ដល់​វត្តមាន​របស់​ខ្លួន​នៅ​អាស៊ី​អាគ្នេយ៍​។ ការ​វិនិយោគ​ជា​យុទ្ធសាស្ដ្រ​នេះ នឹង​ជំរុញ​ឲ្យ​ពួក​យើង​ទាញ​យក​ផល​ប្រយោជន៍​កាន់​តែ​ប្រសើរ​លើ​ឱកាស​កើន​ឡើង​ពី «​គំនិត​ផ្ដួច​ផ្ដើម​ខ្សែ​ក្រវាត់​មួយ និង​ផ្លូវ​មួយ​របស់​ចិន​»​។

ការ​ទិញ​ភាគហ៊ុន​នេះ​មិន​មែន​ជា​លើក​ដំបូង​ឡើយ ដែល​ប្រាសាក់​បាន​ដើរ​ឆ្ពោះ​ទៅ​រក​ការ​ទទួល​បាន​វិនិយោគិន​យុទ្ធសាស្ដ្រ​នោះ​។

កាលពី​ខែ​សីហា ឆ្នាំ​មុន NBC បាន​បដិសេធ​នូវ​កិច្ច​ព្រម​ព្រៀង​មួយ​រវាង​ប្រាសាក់ និង​ធនាគារ Woori Bank ដែល​ជា​គ្រឹះស្ថាន​ហិរញ្ញវត្ថុ​ឈាន​មុខ​គេ​របស់​ប្រទេស​កូរ៉េ​ខាង​ត្បូង​សម្រាប់​ភាគ​ហ៊ុន​៥០​ភាគរយ ដោយ​បញ្ជាក់​ថា ធនាគារ​កូរ៉េ​មិនមែនជា​ធនាគារ​ដេញថ្លៃ​មួយ​ដ៏​ស័ក្តិសម ដែល​បានទទួល​ស្គាល់​ដោយ​ស្ថាប័ន​និយតករ​ឯករាជ្យ​នោះទេ​។

មិនអាច​ទាក់ទង NBC ដើម្បី​សុំ​ការ​បញ្ជាក់​ថា​តើ​ខ្លួន​បាន​យល់ ព្រម​លើ​កិច្ច​ព្រម​ព្រៀង​នេះ​ឬ​យ៉ាង​ណា​នោះទេ កាលពី​ថ្ងៃ​ម្សិលមិញ​៕ LA

0

Comments

Please, login or register to post a comment