Search form

Login - Register | FOLLOW US ON

Logo of Phnom Penh Post newspaper Phnom Penh Post - NBC តម្រូវ​ឲ្យ​អាជីវកម្ម​សេវា​ទូទាត់​សង​ប្រាក់​ត្រូវ​សុំ​អាជ្ញាប័ណ្ណ

Content image - Phnom Penh Post
អតិថិជនម្នាក់កំពុងប្រើប្រាស់​សេវា​របស់​ក្រុមហ៊ុន Pay Go ។ ផា លីណា

NBC តម្រូវ​ឲ្យ​អាជីវកម្ម​សេវា​ទូទាត់​សង​ប្រាក់​ត្រូវ​សុំ​អាជ្ញាប័ណ្ណ

ភ្នំពេញៈ ធនាគារជាតិ​នៃ​កម្ពុជា (NBC) កាលពី​ថ្មីៗ​នេះ​បាន​ចេញ​ប្រកាស​មួយ​តម្រូវ​ឲ្យ​គ្រឹះស្ថាន​ដែល​ផ្តល់​សេវា​ទូទាត់​ប្រាក់ ត្រូវ​ស្នើ​សុំ​អាជ្ញាប័ណ្ណ​ឲ្យ​បាន​ត្រឹមត្រូវ​ដោយ​ដាក់​ចេញ​លក្ខខណ្ឌ​តឹងរ៉ឹង​រាប់​តាំងពី​ការ​គ្រប់គ្រង​ប្រតិបត្តិការ និង​ដើម​ទុន​ចុះ​បញ្ជី ក្នុង​គោលដៅ​បង្កើន​ប្រសិទ្ធភាព​គ្រប់គ្រង​វិស័យ​នេះ​ស្រប​ពេល​ចំនួន​ប្រតិបត្តិ​ករ​កំពុង​កើន​ឡើង​។

តាម​រយៈ​ប្រកាស​ថ្មី​ស្តីពី «​ការ​គ្រប់គ្រង​គ្រឹះស្ថាន​ផ្តល់​សេវា ទូទាត់​សង​ប្រាក់​» គ្រឹះស្ថាន​ជាច្រើន​ដែល​កំពុង​ផ្តល់​សេវា​ទូទាត់​សង​ប្រាក់​ដូច​ជា សេវាកម្ម​របស់ Wing សេវា eMoney សេវា True Money និង​សេវា​របស់​ក្រុមហ៊ុន Asia Wei Luy សេវា​ផ្ទេរ​លុយ​របស់ AMK Money Transfer សេវា​វេរ​លុយ​របស់ Ly Hour Pay Pro ឬ សេវា​របស់​ក្រុមហ៊ុន Pay Go ជា​ដើម ត្រូវ​ស្នើសុំ​អាជ្ញាប័ណ្ណ​សម្រាប់​អាជីវកម្ម «​សេវា​ទូទាត់​សង​ប្រាក់​» ពី NBC​។ នេះ​បើ​យោង​តាម​លោក​ស្រី ជា សិរី អគ្គនាយក NBC​។

លោក​ស្រី ​បាន​ពន្យល់​ពី​វិសាលភាព​នៃ​ប្រកាស​នេះ​ថា គោល​បំណង​នៃ​ការ​ចេញ​ប្រកាស​នេះ​គឺ​ដើម្បី​ធានា​សុវត្ថិភាព​នៃ​ប្រតិបត្តិការ​វិស័យ​នេះ និង​ដើម្បី​កសាង​ទំនុក​ចិត្ត​អតិថិជន​។ ប្រកាស​នេះ​ក៏​មាន​គោលដៅ​សម្រួល​ដល់​ការ​ប្រកួត​ប្រជែង​ស្មើ​ភាព​ក្នុង​វិស័យ​នេះ​ដោយ​សារ​ថា​រាល់​បុគ្គល រួម​ទាំង​គ្រឹះស្ថាន​ហិរញ្ញវត្ថុ​ដូច​ជា​ធនាគារ​ដែល​ធ្វើ​ប្រតិបត្តិ​ការទូទាត់​សង​ប្រាក់ ត្រូវ​តែ​ស្នើ​សុំ​អាជ្ញាប័ណ្ណ​ដើម្បី​ធ្វើ​ប្រតិបត្តិការ ដែល​ប្រកាស​នេះ​គឺ​គ្រប​ដណ្តប់​លើ​ប្រតិបត្តិ​ករ​ថ្មី និង​ប្រតិបត្តិ​ករ​ដែល​កំពុង​បម្រើ​សេវា​នេះ​ស្រាប់​។

លោក​ស្រី​ថ្លែង​ថា​៖«​បច្ចុប្បន្ន ការ​ច្នៃ​ប្រឌិត​ថ្មី​នៅ​ក្នុង​វិស័យ​ទូទាត់​សង​ប្រាក់​មាន​ការ​រីកចម្រើន​យ៉ាង​លឿន ខណៈ​ដែល​បទ​ប្បញ្ញាត្តិ​គ្រប់គ្រង​វិស័យ​នេះ​នៅ​កម្ពុជា​នៅមានកម្រិត​នៅឡើយ ឬ​អាច​ថា​វិសាលភាព​នៃ​បទ​ប្បញ្ញត្តិ​ដែលមាន​ស្រាប់​មិនអាច​គ្របដណ្តប់​ការច្នៃប្រឌិត​ថ្មី​នៃ​វិស័យនេះ​បាន​គ្រប់​ជ្រុងជ្រោយ​ទេ​»​។

លោកស្រី​បញ្ជាក់ថា​៖«NBC ជឿថា​ភាព​ច្នៃប្រឌិត​នៃ​សេវា​ទូទាត់​សង​ប្រាក់ អាច​ផ្តល់​អត្ថប្រយោជន៍​យ៉ាងច្រើន​ដល់​អ្នក​ប្រើ​ប្រាស់​តាម​រយៈ​ការ​ប្រើ​ប្រាស់​សេវាកម្ម​ដែល​ប្រសើរ​ជាង​មុន​និង​មានតម្លៃ​ទាប ដែល​កត្តា​នេះ​ជួយ​រួម​ចំណែក​ដល់​ការ​ធ្វើ​បរិយា​ប័ន្ន​ហិរញ្ញវត្ថុ​ដើម្បី​ជំរុញ​សកម្មភាព​សេដ្ឋកិច្ច​»។

ក្នុង​ចំណោម​លក្ខខណ្ឌ​តម្រូវ​ជាច្រើន ប្រកាស​របស់ NBC ស្តីពី «​ការ​គ្រប់គ្រង​គ្រឹះស្ថាន​ផ្តល់​សេវា​ទូទាត់​សង​ប្រាក់​» ដែល​បាន​ចេញ​ផ្សាយ​កាលពី​ថ្ងៃ ២០ មិថុនា បាន​បញ្ជាក់​ថា គ្រឹះស្ថាន​ដែល​ផ្តល់​សេវា​ទូទាត់​សង​ប្រាក់ ត្រូវ​មាន​ដើមទុន​ចុះបញ្ជី​យ៉ាង​ហោច​ណាស់​ ២ លាន​ដុល្លារ​។

គ្រឹះស្ថាន​ដែល​បាន​ទទួល​អាជ្ញាប័ណ្ណ​ត្រូវ​រក្សា​ប្រាក់​តម្កល់​ធានា​ដើម​ទុន​ស្មើ​នឹង ៥ ភាគរយ​នៃ​ដើម​ទុន​ចុះ​បញ្ជី​នៅ​ក្នុង​គណនី​ដែល​បាន​បើក​នៅ​ធនាគារ​ជាតិ​នៃ​កម្ពុជា​។ អាជ្ញាប័ណ្ណ​មាន​សុពលភាព​រយៈពេល ៦​ ឆ្នាំ ហើយ​ប្រតិបត្តិ​ករ​ត្រូវ​បង់​សោហ៊ុយ​អាជ្ញាប័ណ្ណ​ប្រចាំ​ឆ្នាំ ៥ ០០០ ដុល្លារ​។

លោក Tomas Pokorny អគ្គនាយក​ក្រុមហ៊ុន Pi Pay ដែល​ជា​ក្រុមហ៊ុន​ផ្ដល់​ដំណោះ​ស្រាយ​ទូទាត់​ប្រាក់​ឌីជីថល និង​កាបូប​ប្រាក់​អេឡិច​ត្រូនិក បាន​ឲ្យ​ដឹង​ថា​វា​ជា​វិធានការ​ដ៏​ល្អ​មួយ ហើយ​វា​នឹង​មិន​រារាំង​ដល់​ការពង្រីក​របស់​បច្ចេក​វិទ្យា​ហិរញ្ញវត្ថុ​ជា​ទូទៅ​នោះ​ទេ​។

លោក​បន្ថែម​ថា វា​ជា​ការ​ធ្វើ​ចំណាត់​ថ្នាក់​បន្ថែម​ទៀត​នៃ​ទីផ្សារ ហើយ​ដោយ​សារ​មិនមាន​ការ​ចេញ​ប្រកាស​នេះ ស្ទើរតែ​គ្រប់គ្នា​អាច​ធ្វើ​ការ​ទូទាត់​បាន ទោះបី​វា​មិនមែនជា​គ្រឹះស្ថាន​ហិរញ្ញវត្ថុ​ពិត​ប្រាកដ​ក៏​ដោយ ជា​ឧទាហរណ៍​ក្រុមហ៊ុន​ផ្ដល់​បចេ្ចក​វិទ្យា​ជាដើម​។

លោក​ថ្លែងថា​៖ «​ប្រកាស​ថ្មី​នេះ​សង្ឃឹម​ថា​នឹង​ធ្វើ​ឲ្យ​មាន​ភាព​ច្បាស់​លាស់​ដល់​វិស័យ​នេះ ហើយនឹង​ផ្ដល់​ភាព​បត់បែន​កាន់​តែ​ច្រើន និង​ភាព​ច្បាស់​លាស់​ចំពោះ​គ្រឹះស្ថាន​ហិរញ្ញវត្ថុ និង​បច្ចេកវិទ្យា​របស់​ពួក​គេ និង​ដៃគូ​ច្នៃ​ប្រឌិត​ដូចគ្នា​»​។

យោង​តាម​លោក Tomas តម្រូវការ​ទុន​ចុះ​បញ្ជី​អប្បបរមា ២​លាន​ដុល្លារ នឹង​ផ្លាស់​ប្តូរ​បរិយាកាស​ទីផ្សារ​បច្ចេកវិទ្យា​ហិរញ្ញវត្ថុ​។

លោក​បន្ថែម​ថា វា​អាច​បង្កើន​តម្រូវការ​ហិរញ្ញវត្ថុ​កាន់​តែ​ខ្ពស់​ដោយ​ប្រតិបត្តិ​ករ​ហិរញ្ញវត្ថុ ប៉ុន្តែ​វា​ក៏​ពង្រីក​សេវា របស់​ពួក​គេ​បាន​ផង​ដែរ តាម​រយៈ​ការ​អនុញ្ញាត​ឲ្យ​ពួក​គេ​ប្រតិបត្តិការ​ការ​ច្នៃ​ប្រឌិត​កាន់​តែ​ច្រើន និង​បរិយាកាស​បត់​បែន​បាន​។

លោក​បាន​ថ្លែង​បន្ត​ថា​៖ «​យើង​ជឿជាក់​ថា វា​ជា​ជំហាន​ចាំបាច់​ក្នុង​ការ​ធ្វើ​ឲ្យ​ប្រទេស​កម្ពុជា​ ទៅ​កាន់​តែ​ជិត​ប្រទេស​ផ្សេង​ទៀត​របស់​ អាស៊ាន ជា​កន្លែង​ដែល​វិស័យ​បច្ចេកវិទ្យា​ហិរញ្ញវត្ថុ​កំពុង​រីក​ចម្រើន​ក្នុង​រយៈពេល​ពីរ​បី​ឆ្នាំ​ចុង​ក្រោយ​នេះ​»៕ LA

0

Comments

Please, login or register to post a comment