ភ្នំពេញៈ ធនាគារជាតិនៃកម្ពុជា (NBC) កាលពីថ្ងៃសុក្របានប្រកាសថានឹងចាត់វិធានការផ្លូវច្បាប់ចំពោះក្រុមហ៊ុន Chaintope ដែលថ្មីៗនេះបានអះអាងថា ខ្លួនបានទទួលកិច្ចសហការពី NBC បង្កើតរូបិយប័ណ្ណអេឡិចត្រូនិក K-Coin ជាអ្វីដែល NBC អះអាងថាជាការផ្សព្វផ្សាយបោកប្រាស់។
យោងតាមសេចក្តីជូនដំណឹងរបស់ NBC ដែលផ្សព្វផ្សាយនៅលើគេហទំព័រហ្វេសប៊ុកផ្លូវការរបស់ខ្លួនកាលពីថ្ងៃសុក្រសប្តាហ៍មុន កន្លងមក NBC មិនបានសហការជាមួយក្រុមហ៊ុន Chaintope ឬ ក្រុមហ៊ុនផ្សេងៗណាមួយដើម្បីបង្កើតរូបិយវត្ថុអេឡិចត្រូនិកនៅកម្ពុជានោះទេ។
សេចក្តីជូនដំណឹងរបស់ NBC បានបញ្ជាក់ថា៖ «យើងសូមថ្កោលទោសដាច់អហង្ការចំពោះបុគ្គលណាដែលប្រើប្រាស់ឈ្មោះរបស់ធនាគារជាតិនៃកម្ពុជាផ្សព្វផ្សាយព័ត៌មានបោកប្រាស់នេះ និងកំពុងចាត់វិធានការតាមផ្លូវច្បាប់ដែលមានជាធរមាន»។
សេចក្តីជូនដំណឹងដដែលនេះបន្ថែមថា៖ «NBC មិនដែលបានអនុញ្ញាតឲ្យមានការទិញលក់ និងចរាចររូបិយប័ណ្ណអេឡិចត្រូនិក (CryptoCurrencies) ក្នុងទម្រង់ណាមួយដូចជា K-Coin ដែលបានលើកឡើង [ដោយក្រុមហ៊ុន] នោះទេ»។
ការព្រមាននេះបានធ្វើឡើងកាលពីថ្ងៃសុក្រ ខណៈក្រុមហ៊ុន Chaintope ដែលមានមូលដ្ឋាននៅប្រទេសជប៉ុន និងក្រុមហ៊ុន Digital Agriculture Exchange ដែលមានទំនាក់ទំនងជាមួយទីក្រុងហុងកុង បានរៀបចំ «ពិធីចុះហត្ថលេខាលើកិច្ចព្រមព្រៀងសហការ» ពោលគឺមួយថ្ងៃបន្ទាប់ពីសេចក្តីប្រកាសព័ត៌មានជាភាសាខ្មែរពីក្រុមហ៊ុន Chaintope ត្រូវបានផ្សព្វផ្សាយដល់អ្នកយកព័ត៌មានក្នុងស្រុក។
ការចេញផ្សាយព័ត៌មានជាភាសាអង់គ្លេសដែលចុះកាលបរិច្ឆេទថ្ងៃទី១៩ ខែធ្នូ ប្រកាសពីការបង្កើតរូបិយប័ណ្ណឌីជីថល K-coin «រួមជាមួយសាជីវកម្មកម្ពុជា និងធនាគារជាតិនៃកម្ពុជា»។
ក្រុមហ៊ុននេះបានចុះឈ្មោះក្រុមហ៊ុន Digital Agriculture Exchange ថាជាដៃគូក្នុងស្រុក។
សេចក្តីប្រកាសព័ត៌មាននេះបានឲ្យដឹងថា រូបិយប័ណ្ណឌីជីថល K-coin កំពុងត្រូវបានបង្កើតឡើង ដើម្បីប្រើប្រាស់ ក្នុងការនាំចូល នាំចេញ និងការកែច្នៃផលិតផលកសិកម្មក្នុងប្រទេសកម្ពុជា ជាមួយទិសដៅដំបូងប្រកបដោយមហិច្ឆតាមួយដែលត្រូវបានទទួលយកដោយក្រុមហ៊ុនចំនួន ២០០ ០០០ ហើយក្រោយមកពង្រីកឲ្យដល់តម្លៃសរុបដែលអាចបោះផ្សាយបាន ២០០ពាន់លានដុល្លារ។
សេចក្តីប្រកាសព័ត៌មាននេះបានឲ្យដឹងថា ការចូលរួមរបស់ NBC ក្នុងរូបិយប័ណ្ណឌីជីថលនេះ នឹងជាមូលដ្ឋានមួយដែល «ក្រុមហ៊ុន Digital Agriculture Exchange នឹងអាចមានបោះផ្សាយ និងគ្រប់គ្រងរូបិយប័ណ្ណឌីជីថល K-coin ដោយមានការអនុញ្ញាតពីធនាគារកណ្ដាល ដែលផ្ដល់ការធានាដ៏រឹងមាំនៃការជឿទុកចិត្ត»។
សេចក្តីប្រកាសនេះអះអាងថា ការគាំទ្ររបស់ NBC នឹងអនុញ្ញាតឲ្យរូបិយប័ណ្ណឌីជីថល K-coin ជម្នះលើកង្វះខាតជាមូលដ្ឋានដែលមានក្នុងរូបិយប័ណ្ណឌីជីថលនានាដូចជា Bitcoin ជាដើម ដែលបានឡើងថ្លៃខ្លាំងក្នុងរយៈពេលប៉ុន្មានឆ្នាំមកនេះ ប៉ុន្តែបានក្លាយជាអ្វីដែលគ្មានប្រយោជន៍សម្រាប់ការអនុវត្តប្រតិបត្តិការពិតប្រាកដ។
នៅពេលសួរដោយក្រុមអ្នកយកព័ត៌មាននៅក្នុងពិធីកាលពីថ្ងៃសុក្រថា តើក្រុមហ៊ុនអាចបញ្ជាក់ពីការសហការជាមួយ NBC យ៉ាងដូចម្តេចនោះ លោក Hideki Shoda អគ្គនាយកក្រុមហ៊ុន Chaintope បានផ្ដល់យោបល់ថា អ្នកយកព័ត៌មានគួរលើកបញ្ហានេះជាមួយក្រុមហ៊ុន Digital Agriculture Exchange ដោយសារក្រុមហ៊ុន Digital Agriculture Exchange ជាអ្នកទទួលខុសត្រូវលើការធ្វើការងារជាមួយ NBC។
ឆ្លើយតបនឹងក្រុមអ្នកយកព័ត៌មានលើបញ្ហានេះ លោកស្រី Bridget Lau នាយិកាក្រុមហ៊ុន Digital Agriculture Exchange មិនបានឆ្លើយនោះទេថា តើលោកស្រីបានទទួលការទទួលស្គាល់ជាផ្លូវការពីធនាគារកណ្ដាលឬអត់នោះទេ ដោយគ្រាន់តែថ្លែងថា លោកស្រីបានជួបជាមួយមន្ដ្រី NBC ៣ដងមកហើយដើម្បីពិភាក្សាពីលទ្ធភាព។
កាលពីម្សិលមិញ ស្ដ្រីមួយរូបដែលបានទទួលទូរស័ព្ទរបស់ក្រុមហ៊ុន Digital Agriculture Exchange ជាលេខចុះបញ្ជីនៅក្រសួងពាណិជ្ជកម្មបានប្រាប់ថា នាងឈ្មោះ លី ឡេង ខណៈពេលដែលបញ្ជាក់អត្តសញ្ញាណថា ជាប្រធាននាយកដ្ឋានរដ្ឋបាលរបស់ក្រុមហ៊ុននេះ។
អ្នកស្រី ឡេង បានថ្លែងថា ការប្រកាសរបស់ក្រុមហ៊ុន Chaintope កំពុងធ្វើឲ្យប៉ះពាល់ជាអវិជ្ជមានដល់កេរ្តិ៍ឈ្មោះក្រុមហ៊ុនរបស់អ្នកស្រី ហើយក្រុមការងារថា្នក់គ្រប់គ្រងក្រុមហ៊ុន កំពុងពិចារណាការចាត់វិធានការផ្លូវច្បាប់ប្រឆាំងនឹងក្រុមហ៊ុន Chaintope។
អ្នកស្រី ឡេង បានទទួលស្គាល់ថា ក្រុមហ៊ុនរបស់អ្នកស្រីបានចុះហត្ថលេខាលើកិច្ចព្រមព្រៀងមួយជាមួយក្រុមហ៊ុន Chaintope កាលពីថ្ងៃសុក្រ ប៉ុន្តែបានថ្លែងថា វាគ្រាន់តែជាប់ទាក់ទងជាមួយគម្រោងអភិវឌ្ឍន៍កសិកម្ម និងការសាងសង់ក្លិបវាយកូនហ្គោលនៅទីក្រុងភ្នំពេញតែប៉ុណ្ណោះ ហើយមិនជាប់ពាក់ព័ន្ធអ្វីជាមួយរូបិយប័ណ្ណឌីជីថល K-coin នោះទេ។
អ្នកស្រីថ្លែងថា ក្រុមហ៊ុនរបស់អ្នកស្រីមានផែនការមួយ ដើម្បីសិក្សាពីទីផ្សារសម្រាប់រូបិយប័ណ្ណឌីជីថលនៅកម្ពុជា ហើយបានជួបជាមួយមន្ដ្រី NBC ដើម្បីស្វែងរកព័ត៌មានតែប៉ុណ្ណោះ។
អ្នកស្រីថ្លែងថា៖ «វាគ្រាន់តែជាផែនការមួយក្នុងការសិក្សាទីផ្សារប៉ុណ្ណោះ ប៉ុន្តែវាមិនមានន័យថា យើងបានធ្វើការស្រាវជ្រាវហើយនោះទេ។ យើងមិនបានទទួលការយល់ព្រមណាមួយពី NBC ទេ»៕ LA