ក្រុងហ្សឺណែវៈ ក្រុមហ៊ុន Nestle បានឲ្យដឹងកាលពីថ្ងៃអង្គារថាខ្លួនបានព្រមព្រៀងលក់អាជីវកម្មផលិតស្ករគ្រាប់នៅអាមេរិករបស់ខ្លួនទៅឲ្យក្រុមហ៊ុន Ferrero របស់ប្រទេសអ៊ីតាលីក្នុងតម្លៃ ២,៨ ពាន់លានដុល្លារ (២,៣ ពាន់លានអឺរ៉ូ) ជាសាច់ប្រាក់ ខណៈក្រុមហ៊ុនផលិតអាហាររបស់ប្រទេសស្វ៊ីសនេះរៀបចំផលបត្រ (បណ្តុំ) ផលិតផលរបស់ខ្លួនឡើងវិញ។
ក្រុមហ៊ុន Ferrero ដែលល្បីឈ្មោះដោយសារស្ករគ្រាប់ម៉ាកយីហោ Tic Tac ស្ករ Nutella និង Ferrero Rocher របស់ខ្លួន តែជាធម្មតាចូលចិត្តពង្រីកអាជីវកម្មដោយការទិញយកក្រុមហ៊ុនផ្សេងៗនោះបច្ចុប្បន្ននឹងទិញយកស្ករគ្រាប់ម៉ាកយីហោ Crunch ស្ករ Butterfinger និងស្ករ Baby Ruth ពីក្រុមហ៊ុន Nestle។
ការលក់អាជីវកម្មផលិតស្ករគ្រាប់នេះនឹងធ្វើឲ្យក្រុមហ៊ុន Ferrero ក្លាយជាក្រុមហ៊ុនផលិតស្ករគ្រាប់ធំជាងគេទី ៣ នៅទីផ្សារអាមេរិក។
យោងតាមសេចក្តីរាយការណ៍ព័ត៌មានក្រុមហ៊ុន Ferrero បានប្រកួតប្រជែងជាមួយនឹងក្រុមហ៊ុនផលិតស្ករសូកូឡាធំៗមួយចំនួនដូចជា ក្រុមហ៊ុន Hershey និងមូលនិធិឯកជនមួយចំនួនរួមទាំងមូលនិធិ Rhone Capital ជាដើមដើម្បីសម្រេចបានកិច្ចព្រមព្រៀងទិញយកក្រុមហ៊ុនផលិតស្ករគ្រាប់នេះ។
លោក Giovanni Ferrero នាយកប្រតិបត្តិក្រុមហ៊ុន Ferrero មានប្រសាសន៍ថា បន្ទាប់ពីការទិញយកក្រុមហ៊ុនផលិតស្ករគ្រាប់នេះក្រុមហ៊ុន Ferrero Group «នឹងមានទំហំកាន់តែធំផ្តល់ផលិតផលដែលមានគុណភាពខ្ពស់កាន់តែច្រើនដល់អតិថិជន» នៅសហរដ្ឋអាមេរិកដែលជាទីផ្សារស្ករគ្រាប់ធំជាងគេរបស់ពិភពលោក។
លោក Mark Schneider នាយកប្រតិបត្តិក្រុមហ៊ុន Nestle ថ្លែងថា កិច្ចព្រមព្រៀងនេះ «នឹងផ្តល់លទ្ធភាពឲ្យក្រុមហ៊ុន Nestle វិនិយោគ និងបង្កើតថ្មីនូវប្រភពផលិតផលជាច្រើនដែលយើងមើលឃើញពីកំណើនខ្ពស់នាពេលអនាគត និងរក្សាស្ថានភាពជាអ្នកនាំមុខគេខាងផ្នែកការថែទាំសត្វចិញ្ចឹម ទឹកពិសា កាហ្វេ អាហារកក និងអាហារបំប៉នទារក។
អាជីវកម្មផលិតស្ករគ្រាប់នៅសហរដ្ឋអាមេរិករបស់ក្រុមហ៊ុន Nestle បានចុះបញ្ជីការលក់ចំនួន ៩០០ លាន ហ្វ្រង់ស្វ៊ីសកាលពីឆ្នាំ ២០១៦ នៅក្នុងទីផ្សារមួយដែលមានតម្លៃសរុប ៨ ពាន់លានដុល្លារនេះបើយោងតាមក្រុមហ៊ុន Ibis World។
ក្រុមហ៊ុន Nestle បានបន្តឲ្យដឹងថាតួលេខនេះមានចំនួនតែប្រមាណ ៣ ភាគរយនៃការលក់សរុបរបស់ក្រុមហ៊ុននៅសហរដ្ឋអាមេរិកប៉ុណ្ណោះ។
ក្រុមហ៊ុន Ferrero មានរោងចក្រផលិតកម្ម ២២ កន្លែង និងបុគ្គលិក ៣ ម៉ឺននាក់។
ក្នុងរយៈពេល ១០ ឆ្នាំមកនេះក្រុមហ៊ុន Ferrero បានបង្កើនប្រាក់ចំណូលជាង ២ ដងដល់ជាង ១០ ពាន់លានអឺរ៉ូ។
ក្រុមហ៊ុន Nestle បានបន្តថាកិច្ចព្រមព្រៀងនេះត្រូវបានរំពឹងថានឹងបញ្ចប់នៅចុងខែមីនាខាងមុខនេះ៕ BP