Search form

Login - Register | FOLLOW US ON

Logo of Phnom Penh Post newspaper Phnom Penh Post - RDB នឹង​បង្វែរ​ថវិកា​ទៅ​ឲ្យ​រដ្ឋាភិបាល​វិញ ខណៈ​ការ​ប្រើ​បាន​តែ​ជាង $៣ លាន

Content image - Phnom Penh Post
កម្មករ​កំពុង​លី​ការុង​ស្រូវ​ដាក់​លើ​ឡាន​ពេល​ប្រមូល​ទិញ​ស្រូវ​ពី​កសិករ​នៅ​ខេត្ត​តាកែវ​កន្លង​មក។ ហុង មិនា

RDB នឹង​បង្វែរ​ថវិកា​ទៅ​ឲ្យ​រដ្ឋាភិបាល​វិញ ខណៈ​ការ​ប្រើ​បាន​តែ​ជាង $៣ លាន

ភ្នំពេញៈ គិត​មក​ដល់​ពេល​នេះ​មាន​តែ ១២ ភាគរយ​នៃ​កញ្ចប់​ថវិកា ២៧ លាន​ដុល្លារ​របស់​រដ្ឋាភិបាល​ប៉ុណ្ណោះ​ត្រូវ​បាន​ផ្តល់​កម្ចី​ដល់​រោង​ម៉ាស៊ីន​កិន​ស្រូវ​យក​ទៅ​ប្រមូល​ទិញ​ស្រូវ​ពី​កសិករ ខណៈ​រដូវ​ប្រមូលផល​ស្រូវ​វស្សា​នៅ​កម្ពុជា​ស្ទើរ​តែ​រួចរាល់​ទៅ​ហើយ​នោះ។ នេះ​បើ​តាម​លោក កៅ ថាច អគ្គនាយក​ធនាគារ​អភិវឌ្ឍន៍​ជនបទ (RDB) បាន​ឲ្យ​ដឹង​កាលពី​ម្សិលមិញ។

កាលពី​ខែ​កញ្ញា​រដ្ឋាភិបាល​បាន​បញ្ចេញ​កញ្ចប់​ប្រាក់​របស់​ខ្លួន ២៧ លាន​ដុល្លារ​ឲ្យ RDB ដើម្បី​ឲ្យ​ធនាគារ​នេះ​អាច​ផ្ដល់​កម្ចី​ដល់​ម្ចាស់​រោង​ម៉ាស៊ីន​កិន​ស្រូវ​ឲ្យ​ពួកគេ​ទិញ​ស្រូវ​ពី​កសិករ​ក្នុង​អត្រាការ​ប្រាក់​ប្រចាំ​ឆ្នាំ ៧ ភាគរយ។

លោក កៅ ថាច បាន​ឲ្យ​ដឹង​ថា​រដូវ​ប្រមូលផល​ជិត​ចប់​ហើយ​ ប៉ុន្តែ​ការ​ផ្តល់​កម្ចី​បាន​តែ ៣,៥ លាន​ដុល្លារ​ប៉ុណ្ណោះ ពី​ម្ចាស់​រោង​ម៉ាស៊ីន​កិន​ស្រូវ​ចំនួន ៥។

លោក​បន្ថែម​ថា​ ឧស្សាហកម្ម​ស្រូវ​អង្ករ​តែងតែ​ត្រូវ​បាន​អះអាង​ពី​កង្វះ​ហិរញ្ញវត្ថុ ប៉ុន្តែ​និន្នាការ​នៃ​ការ​ប្រើប្រាស់​កម្ចី​មាន​តិច​ណាស់​មិន​ដូច​អ្វី​ដែល​ពួកគេ​អះអាង​នោះ​ទេ។

លោក​ថ្លែង​ថា៖ «យើង​ឃ្លាំ​មើល ថា​តើ​កម្ចី​នេះ​ត្រូវ​បាន​ប្រើប្រាស់​ដោយ​ម្ចាស់​រោងម៉ាស៊ីន​កិន​ស្រូវ​សម្រាប់​ការ​ធ្វើ​ឲ្យ​ឧស្សាហកម្ម​ស្រូវ​អង្ករ​រស់​ឡើង​វិញ​ឬ​ទេ? ប៉ុន្តែ​វា​មាន​តែ​ ១២ ភាគរយ​ប៉ុណ្ណោះ​នៃ​ថវិកា​សរុប ដែល​ហាក់​ដូចជា​មិន​សម​ហេតុផល​ទៅ​នឹង​អ្វី​ដែល​ម្ចាស់​រោង​ម៉ាស៊ីន​កិន​ស្រូវ​បាន​អះអាង​ពី​កង្វះ​ប្រាក់​នោះ​ទេ»។

លោក​បន្ថែម​ថា៖ «យើង​មិន​ដឹង​ថា​អ្វី​កំពុង​កើតឡើង​ពិតប្រាកដ​នៅ​ពី​ក្រោយ​ពួកគេ​នោះ​ទេ»។

លោក​បាន​ឲ្យ​ដឹង​ថា​ លក្ខខណ្ឌ​ដើម្បី​ទទួល​បាន​កម្ចី​នេះ​មាន​ភាព​ងាយស្រួល ព្រោះ​វា​ផ្ដោត​តែ​លើ​ស្រូវ​នៅ​ក្នុង​ស្ដុក​សម្រាប់​ដាក់​ធានា​តែ​ប៉ុណ្ណោះ ហើយ​វា​មិន​ស្មុគស្មាញ​ដូច​ធនាគារ ឬ MFI ដែល​បាន​តម្រូវ​ឲ្យ​មាន​លក្ខខណ្ឌ​ច្រើន​នោះ​ទេ។ លោក​បន្ត​ថា៖ «ខ្ញុំ​សង្ស័យ​ថា​ម្ចាស់​រោង​ម៉ាស៊ីន​កិនស្រូវ​មិន​មែន​កំពុង​ប្រឈម​នឹង​កង្វះ​ប្រាក់​នោះ​ទេ»។

លោក​បន្ត​កញ្ចប់​ថវិកា​នេះ​នឹង​បង្វែរ​ទៅ​រដ្ឋាភិបាល​វិញ​ខែ​មិថុនា​ហើយ​ប្រសិន​បើ​រដ្ឋាភិបាល​អនុម័ត​កញ្ចប់​ថវិកា​នេះ​ជា​ថ្មី​ទៀត វា​នឹង​ចាប់​ផ្ដើម​នៅ​រដូវ​បន្ទាប់​នៅ​ខែ​កញ្ញា។

លោក​ឲ្យ​ដឹង​ថា៖ «នៅ​ពេល​នេះ​មិន​មាន​ការ​ដាក់​ពាក្យ​ស្នើសុំ​កម្ចី​ច្រើន​ទេ​ដោយសារ​តែ​រដូវ​ប្រមូលផល​ស្ទើរតែ​បញ្ចប់​ទៅ​ហើយ យើង​នឹង​ប្រគល់​ថវិកា​នេះ​ត្រឡប់​ទៅ​រដ្ឋាភិបាល​វិញ​ខែ​មិថុនា ខ្ញុំ​មិន​ដឹង​ថា​ តើ​រដ្ឋាភិបាល​នឹង​អនុម័ត​សម្រាប់​កញ្ចប់​ថវិកា​ដូច​គ្នា​សម្រាប់​ឧស្សាហកម្ម​ស្រូវ​អង្ករ​ទៀត​ឬ​យ៉ាង​ណា​នោះ​ទេ ដោយសារ​តែ​វា​មើល​ទៅ​ដូចជា​មិន​ចាំបាច់​សម្រាប់​ឧស្សាហកម្ម​ស្រូវ​អង្ករ»។

លោក ហ៊ុន ឡាក់ អនុប្រធាន​សហព័ន្ធ​ស្រូវ​អង្ករ​កម្ពុជា​បាន​ឲ្យ​ដឹង​ថា​ទោះបី​ជា​ចំនួន​នៃ​ការ​ប្រើប្រាស់​កម្ចី​នៅ​តែ​មាន​ចំនួន​បន្តិចបន្តួច​ក៏ដោយ​វា​មាន​ប្រយោជន៍​ដល់​វិស័យ​ស្រូវ​អង្ករ​រួច​ហើយ ហើយ​វា​នឹង​ចាំបាច់​សម្រាប់​គ្រប់​រដូវ​ប្រមូលផល​ដើម្បី​សម្រេច​បាន​ការ​កំណត់​ទិសដៅ​នាំ​ចេញ​អង្ករ ១ លាន​តោន។

លោក​លើក​ឡើង​ថា៖ «កម្ចី​សង្គ្រោះ​បន្ទាន់​គឺ​យឺត​បន្តិច ហើយ​កម្ចី​នេះ​មិន​ស្ថិត​លើ​ពេលវេលា​ត្រឹមត្រូវ​សម្រាប់​វិស័យ​នេះ​ទាំង​មូល​នោះ​ទេ ទន្ទឹម​នឹង​នេះ​ឧស្សាហកម្ម​ស្រូវ​អង្ករ​ប្រឈម​នឹង​តម្លៃ​អង្ករ​ទាប និង​ការ​ធ្លាក់​ចុះ​ការ​ទិញ»។

លោក​បន្ត​ថា៖ «ប្រសិន​បើ​មិន​មាន​អ្នក​ទិញ ម្ចាស់​រោង​ម៉ាស៊ីន​កិន​ស្រូវ​នឹង​មិន​អាច​ខ្ចី​ប្រាក់​បាន​ទេ ដោយសារ​តែ​ប្រឈម​នឹង​ការ​សង​ប្រាក់​ត្រឡប់​ជាមួយ​នឹង​ការ​ទូទាត់​អត្រា​ការប្រាក់»៕ LA

0

Comments

Please, login or register to post a comment