ក្រុងស៊េអូលៈក្រុមហ៊ុន Samsung Electronics នឹងបង្ហាញស្មាតហ្វូន Galaxy S9 និង Galaxy S9+ ជំនាន់ក្រោយរបស់ខ្លួននៅថ្ងៃអាទិត្យខាងមុខនេះ បន្ទាប់ពីក្រុមហ៊ុននេះបានរាយការណ៍ប្រាក់ចំណេញខ្ពស់នៅក្នុងរយៈពេលជាច្រើនសប្ដាហ៍ថ្មីៗនេះ ហើយអនុប្រធានរបស់ក្រុមហ៊ុននេះត្រូវបានដោះលែងពីគុក។
Samsung ជាក្រុមហ៊ុនបុត្រសម្ព័ន្ធដ៏សំខាន់របស់ក្រុមហ៊ុនពាណិជ្ជកម្មធំជាងគេរបស់ប្រទេសកូរ៉េខាងត្បូងមួយនេះបានទទួលរងប៉ះពាល់ ដោយសារការប្រមូលយកវិញដ៏អាម៉ាស់នៃទូរស័ព្ទ Galaxy Note 7 របស់ខ្លួនកាលពីឆ្នាំ ២០១៦ ហើយបន្ទាប់មកត្រូវបានជួបបញ្ហាដ៏ស្មុគស្មាញ ដោយសារការរីករាលដាលរឿងអាស្រូវពុករលួយដែលបានធ្វើឲ្យលោកស្រីប្រធានាធិបតី Park Guen-hye ត្រូវបានបណ្ដេញចេញពីតំណែង។
ប៉ុន្តែទូរស័ព្ទស្មាតហ្វូន Galaxy S8 របស់ខ្លួនទទួលបានជោគជ័យយ៉ាងខ្លាំង និងបានទទួលប្រាក់ចំណេញកាន់តែច្រើនឡើងៗ។
ក្រុមហ៊ុនបានទទួលប្រាក់ចំណេញសុទ្ធជាង ៤២ ពាន់ពាន់លានវ៉ុន (៣៩ ពាន់លានដុល្លារ) កាលពីឆ្នាំ ២០១៧ ហើយនៅខែនេះលោក Lee Jae-yong ជាទាយាទគ្រួសារស្ថាបនិក ក្រុមហ៊ុននេះត្រូវបានដោះលែងពីគុក បន្ទាប់ពីភាគច្រើននៃការកាត់ទោសរឿងសូកប៉ាន់របស់លោកត្រូវបានលើកលែងនៅពេលប្ដឹងឧទ្ធរណ៍។
ទូរស័ព្ទចុងក្រោយរបស់ក្រុមហ៊ុននេះនឹងត្រូវដាក់លក់នៅសាលតាំងពិព័រណ៍ Mobile World Congress នៅទីក្រុង Barcelona ប្រទេសអេស្ប៉ាញ។
តាមការមើលឃើញផ្ទាល់ ទូរស័ព្ទនេះស្រដៀងគ្នានឹងទូរស័ព្ទជំនាន់មុនរបស់ខ្លួនដែរ។
ទាំងទូរស័ព្ទ Galaxy S9 និង Galax y S9+ បានអភិវឌ្ឍនម៉ាស៊ីនថតកាន់តែប្រសើរឡើងជាមួយកម្រិតចាប់រូបភាពរហូតដល់ ៩៦០ ហ្វ្រេមក្នុងមួយវិនាទី មុខងារវីដេអូ super slow-motion និងមានឧបករណ៍បំពងសំឡេង stereo ផងដែរ៕ LA