Search form

Login - Register | FOLLOW US ON

Logo of Phnom Penh Post newspaper Phnom Penh Post - SAP នឹង​ធ្វើ​ការ​ស្ទាបស្ទង់​តម្លៃ​ភាគ​ហ៊ុន នៅ​សប្តាហ៍​ក្រោយ

Content image - Phnom Penh Post
កំពង់ផែ​ស្វយ័ត​ក្រុង​ព្រះសីហនុ (SAP)។

SAP នឹង​ធ្វើ​ការ​ស្ទាបស្ទង់​តម្លៃ​ភាគ​ហ៊ុន នៅ​សប្តាហ៍​ក្រោយ

ភ្នំពេញៈ កំពង់ផែ​ស្វយ័ត​ក្រុង​ព្រះសីហនុ (SAP) នឹង​ចាប់​ផ្តើម​ធ្វើ​ការ​ស្ទាបស្ទង់​ថ្លៃ​ភាគ​ហ៊ុន​របស់​ខ្លួន​ជា​សាធារណៈ​នៅ​សប្តាហ៍​ក្រោយ ដោយ​បើក​ឲ្យ​សាធារណជន​បញ្ជា​ទិញ​ភាគហ៊ុន​ក្នុង​តម្លៃ​ផ្សេងៗ​គ្នា តាម​តម្លៃ​កំណត់​ចន្លោះ​ពី​០,៨៨ ដុល្លារ ទៅ ១,២៩ ដុល្លារ​ក្នុង​មួយ​ហ៊ុន​។ នេះ​បើ​យោង​តាម​សេចក្ដី​ជូន​ដំណឹង​របស់ SAP ដែល​បាន​ចេញ​ផ្សាយ​កាល​ពី​ថ្ងៃ​ម្សិលមិញ​។

ការ​ធ្វើ​ការ​ស្ទាបស្ទង់​ថ្លៃ​មាន​រយៈពេល ៦​ថ្ងៃ ដោយ​ចាប់​ផ្តើម​ពី​ថ្ងៃ​អង្គារ ទី​២៥ មេសា តទៅ​ដែល​ចំនួន​ភាគ​ហ៊ុន​សរុប​ដែល​នឹងដាក់​លក់​មាន​ចំនួន​ជាង ២១,៤៤ លាន​ហ៊ុន ស្មើ​នឹង ២៥ ភាគរយ​នៃ​ភាគហ៊ុន​មាន​សិទ្ធិ​បោះឆ្នោត​សរុប​ជាង ៨៥,៧៧ លាន​ហ៊ុន​។

SAP គ្រោង​ដាក់​ធ្វើ​បរិវិសកម្ម​នៅ​អំឡុង​ថ្ងៃទី ​១៧ ដល់​ថ្ងៃទី ២២ ឧសភា ហើយ​ចាប់ផ្តើម​ធ្វើ​ការ​បោះផ្សាយ​លក់​ភាគហ៊ុន​ជា​សាធារណៈ​លើកដំបូង (IPO) នៅ​ផ្សារ​ហ៊ុន​កម្ពុ​ជានា​ថ្ងៃទី​៣១ ខែ​ឧសភា ហើយ​រំពឹងថា​នឹង​ប្រមូលបាន​ទុន​ពី IPO ចំនួន ២៧ លាន​ដុល្លារ​។

លោក សេង ចាន់​ធឿន ប្រធាន​ផ្នែក​ហិរញ្ញវត្ថុ​សាជីវកម្ម​របស់​ក្រុមហ៊ុន SBI Royal Securities ដែល​ជា​ក្រុមហ៊ុន​ធានា​ទិញ​មូល​ប​ត្រ​របស់ SAP បាន​ឲ្យ​ដឹង​កាលពី​ម្សិលមិញ​ថា SAP នឹង​ប្រើប្រាស់​ទុន​ពី IPO ដើម្បី​ទិញ​ដី​ទំហំ​ ៥២​ ហិកតា​ដើម្បី​សាង​សង់​ផែស្ងួត​ផ្ទុក​កុងតឺន័រ​ថ្មី​មួយ ហើយ​ប្រើប្រាស់​ចំណែក​ខ្លះ​នៃ​មូលនិធិ​នេះ​ក្នុង​ការ​ពង្រីក​ទីធ្លា​ទុក​កុងតឺន័រ​របស់​កំពង់​ផែ​នា​ពេល​បច្ចុប្បន្ន​។

ក្រុមហ៊ុន​ក៏​នឹង​ប្រើប្រាស់​លុយ​នេះ​ដើម្បី​ទិញ​ឧបករណ៍​ទំនើបៗ​បន្ថែម​ទៀត​ដើម្បី​បង្កើន​ផលិតភាព​របស់​ខ្លួន ដែល​តម្លៃ​សរុប​នៃ​ផែនការ​អភិវឌ្ឍន៍​របស់ SAP នេះ​ត្រូវ​បាន​ប៉ាន់​ប្រមាណ​ថា​មាន​តម្លៃ​ប្រហែល​ ២៦,៦​ លាន​ដុល្លារ​។

លោក​ថ្លែងថា​៖ «SAP គឺជា​ក្រុមហ៊ុន​ចុះ​បញ្ជី​ដ៏​មាន​សក្ដានុពល​ជាង​គេ​គិត​មក​ដល់​ពេល​នេះ​ដោយ​សារ​តែ​វា​ជា​កំពង់ផែ​សមុទ្រ​របស់​កម្ពុជា​ដែល​អាច​តភ្ជាប់​ដោយ​ផ្ទាល់​ជាមួយ​កំពង់ផែ​របស់​អាមេរិក និង​កំពង់ផែ​សំខាន់ៗ​ផ្សេង​ទៀត​ក្នុង​តំបន់ និង​ពិភពលោក​»​។

លោក​បន្ត​ថា​៖ «​មាន​ការ​ព្យាករ​ថា ការ​ចរាចរ​កុងតឺន័រ​នៅ​កំពង់ផែ​នេះ​នឹង​កើន​ឡើង​ខ្លាំង​ពេល​អនាគត ដែល​ជា​មូលហេតុ​កំពង់ផែ​នេះ ចាំបាច់​ក្នុង​ការ​បង្កើន​ផលិតភាព​នា​ពេល​នេះ ដើម្បី​ឆ្លើយតប​នឹង​តម្រូវ​ការ​ដែល​រំពឹង​ថា នឹង​កើន​ឡើង​ខ្លាំង​នា​ពេល​អនាគត​»​។

លោក ធឿន បន្ថែម​ថា ក្រុមហ៊ុន SBI Royal បាន​ធ្វើ​ការ​ផ្សព្វផ្សាយ​ទីផ្សារ​ជាច្រើន​នៅ​បរទេស​ដែល​រួមមាន​ទីក្រុង​ហុងកុង ទីក្រុង​ បាងកក ព្រម​ទាំង​ប្រទេស​ជប៉ុន អំពី​ការបោះ​ផ្សាយ​លក់​មូល​បត្រ​ជា​សាធារណៈ​របស់ SAP ហើយ​ក្រុម​វិនិយោគិន​ជាច្រើន​បាន​ចាប់​អារម្មណ៍​ពី​សក្ដានុពល​ក្រុមហ៊ុន​។

ការ​ប្រមូល​ទុន​២៧ លាន​ដុល្លារ​ពី IPO របស់​ក្រុមហ៊ុន SAP នឹង​ធ្វើ​ឲ្យ​ក្រុមហ៊ុន​នេះ​ក្លាយ​ជា​ក្រុមហ៊ុន​ដែល​បោះ IPO ច្រើន​ជាង​គេ​នៅ​ផ្សារ​ហ៊ុន​កម្ពុជា គឺ​ច្រើន​ជាង​ក្រុមហ៊ុន​រដ្ឋាករ​ទឹក​ស្វយ័ត​ក្រុង​ភ្នំពេញ​ដែល​ចុះ​បញ្ជី​ក្នុង​ផ្សារ​ហ៊ុន​កាលពី​ឆ្នាំ ២០១២ ដោយ​លក់​ភាគ​ហ៊ុន ២៥ ភាគរយ​ហើយ​ប្រមូល​បាន​ទឹក​ប្រាក់ ២០ លាន​ដុល្លារ ខណៈ​កំពង់ផែ​ក្រុង​ភ្នំពេញ ដែល​ចុះ​បញ្ជី​កាលពី​ឆ្នាំ ២០១៥ បោះ​លក់​ ២០ ភាគរយ​ហើយ​ទទួល​បាន​ដើម​ទុន ៥,២ លាន​ដុល្លារ​។

យោង​តាម​សេចក្ដី​ប្រកាស​របស់ SAP ភាគហ៊ុន​ថ្មី​៥៤​ភាគរយ​នឹង​ត្រូវ​បាន​លៃ​ទុក​សម្រាប់​ក្រុម​វិនិយោគិន​មាន​សក្ដានុពល​គឺ​ទីភ្នាក់ងារ​អភិវឌ្ឍន៍​ជប៉ុន JICA និង ២៥,២ ភាគរយ​នឹង​លក់​ជូន​ក្រុម​វិនិយោគិន​ប៊ុក​បៀល​ឌីង​។ SAP នឹង​លក់​ភាគហ៊ុន​១០​ភាគរយ​សម្រាប់​បុគ្គលិក​របស់​ខ្លួន ខណៈ​ដែល​ភាគ​ហ៊ុន​ ១០,៨​ ភាគរយ​ ផ្សេង​ទៀត​សម្រាប់​ការ​ទិញ​របស់​ក្រុម​វិនិយោគិន​ផ្សេង​ទៀត​ក្នុង​ពេល​ធ្វើ​បរិវិសកម្ម​។

ប្រតិបត្តិ​ករ​កំពង់ផែ​មួយ​នេះ​បាន​ប្រកាស​ជា​លើក​ដំបូង​ពី​គោល​បំណង​របស់​ខ្លួន​ក្នុង​ការ​ចុះ​បញ្ជី​នៅ​ផ្សារ​មូល​បត្រ​កម្ពុជា​(CSX) កាល​ឆ្នាំ​២០១២ ប៉ុន្តែ​ផែនការ​នេះ​បាន​ប្រឈម​នឹង​ឧបសគ្គ​ជាច្រើន​។

លោក ល្មុន សូឡី ប្រធាន​នាយកដ្ឋាន​ប្រតិបត្តិការ​ទីផ្សារ​របស់ CSX បាន​ឲ្យ​ដឹង​កាល​ពី​ម្សិលមិញ​ថា វា​ជា​ដំណឹង​ដ៏​ល្អ​ដែល​ឮថា SAP នឹង​ចាប់​ផ្ដើម​ការ​ធ្វើ​ទីផ្សារ​នៅ​សប្ដាហ៍​ក្រោយ បន្ទាប់ពី​រយៈពេល​ជាច្រើន​ឆ្នាំ​នៃ​កិច្ច​ខិតខំ​ប្រឹងប្រែង​របស់​ក្រុមហ៊ុន និង​រដ្ឋាភិបាល​ព្រម​ទាំង​ភាគី​ពាក់ព័ន្ធ​ផង​ដែរ​។ ជា​បទពិសោធ នៅ​ពេល​មាន​ក្រុមហ៊ុន​ថ្មី​ចូល​ក្នុង CSX សកម្មភាព​ជួញ​ដូរ​នឹង​កើន​ឡើង​។

លោក​ថ្លែងថា​៖ «SAP គឺជា​សហគ្រាស​គ្រប់គ្រង​ដោយ​រដ្ឋ ដែលមាន​ទំនាក់ទំនង​ដោយ​ផ្ទាល់​នឹង​កំណើន​ដ៏​រឹងមាំ​នៃ​សេដ្ឋកិច្ច​របស់​កម្ពុជា​»​។

លោក​ថា​៖«​សេដ្ឋកិច្ច​កម្ពុជា​កាន់តែ​រីកចម្រើន ការនាំ​ចូល និង​ការ​នាំ​ចេញ​ក៏​កើនឡើង​ផងដែរ ហើយ​សកម្មភាព​ពាណិជ្ជ​កម្ម​របស់ SAP នឹង​កាន់តែ​កើនឡើង​»​។

​លោក ស្វាយ ហៃ អគ្គនាយក​ក្រុមហ៊ុន​មូល​បត្រ Acleda Securities Plc បាន​ប្រាប់​ភ្នំពេញ​ប៉ុស្ដិ៍​នៅ​ពេល​ថ្មីៗ​នេះ​ថា ការ​ចុះ​បញ្ជី​របស់ SAP នៅ CSX នឹង​ជាការ​រួម​ចំណែក​គួរ​ឲ្យ​ចាប់​អារម្មណ៍​ដល់​ទីផ្សារ​ដែល​ចេះ​តែ​មាន​បញ្ហា​ដោយ​សារ​សកម្មភាព​ការ​ជួញ​ដូរ​កម្រិត​ទាប​។

លោក​ថ្លែងថា​៖ «​នៅ​ពេល​មាន​ក្រុមហ៊ុន​ជាច្រើន​នៅ​លើ​ផ្សារ​ហ៊ុន វា​ផ្ដល់​អត្ថ​ប្រយោជន៍​កាន់​តែ​ច្រើន​ក្នុង​ការ​នាំ​ឲ្យ​មាន​អ្នក​ទិញ និង​អ្នក​លក់​»​។

លោក​បន្ត​ថា​៖ «​ទីផ្សារ​មួយ​ដែល​មាន​ជម្រើស​កាន់​តែ​ច្រើន​អាច​ទាក់ទាញ​ក្រុម​វិនិយោគិន​កាន់​តែ​ច្រើន​»៕ LA

0

Comments

Please, login or register to post a comment