Search form

Login - Register | FOLLOW US ON

Logo of Phnom Penh Post newspaper Phnom Penh Post - TRC សម្រេច​ឲ្យ​ក្រុមហ៊ុន​ទូរគមនាគមន៍​ដាក់​ពាក្យ​មុន​ផ្សព្វផ្សាយ ​ប្រូម៉ូសិន​ថ្មី

TRC សម្រេច​ឲ្យ​ក្រុមហ៊ុន​ទូរគមនាគមន៍​ដាក់​ពាក្យ​មុន​ផ្សព្វផ្សាយ ​ប្រូម៉ូសិន​ថ្មី

ភ្នំពេញៈ និយតករ​ទូរគមនាគមន៍​កម្ពុជា (TRC) តម្រូវ​ឲ្យ​ក្រុមហ៊ុន​ទូរគមនាគមន៍​ទាំងអស់​ត្រូវ​សុំ​ការ​អនុញ្ញាត​ជា​មុន​ពី TRC នូវ​រាល់​ការ​ផ្សព្វផ្សាយ​ប្រូម៉ូសិន​ថ្មី។ នេះ​បើ​តាម​សេចក្តី​ប្រកាស​ព័ត៌មាន​របស់ TRC ចេញ​ផ្សាយ​កាលពី​ថ្ងៃ​ម្សិលមិញ។

សេចក្តី​សម្រេច​នេះ​ធ្វើ​ក្រោយ​ពី​កោះ​ប្រជុំ​បន្ទាន់​ជាមួយ​បណ្ដា​ប្រតិបត្តិករ​ទូរស័ព្ទ​ចល័ត​កាលពី​ដើម​សប្ដាហ៍​ដោយ TRC បាន​សម្រេច​គ្រប់គ្រង​សកម្មភាព​ឃោសនា​របស់​ក្រុមហ៊ុន​ទូរស័ព្ទ​ចល័ត ដើម្បី​ទប់ស្កាត់​ការ​ប្រកួត​ប្រជែង​មិន​ស្មោះត្រង់។

យោង​តាម​សេចក្តី​សម្រេច​ក្រុមហ៊ុន​ត្រូវ​ដាក់​ពាក្យ​ស្នើសុំ​មក TRC ជាមុន​នូវ​រាល់​ការ​ផ្សព្វផ្សាយ​ប្រម៉ូសិន​ថ្មីៗ​ហើយ TRC នឹង​ពិនិត្យ​សម្រេច​ក្នុង​រយៈពេល ១០ ថ្ងៃ។

និយតករ​ទូរគមនាគមន៍​កម្ពុជា​នឹង​បញ្ឈប់​ជា​បន្ទាន់​នូវ​ប្រូម៉ូសិន​ដែល​លក់​ក្រោម​ថ្លៃ​ដើម និង​មាន​លក្ខណៈ​ភូត​កុហក​អតិថិជន។ សេចក្តី​សម្រេច​ដដែល​តម្រូវ​ឲ្យ​ប្រតិបត្តិករ​ផ្ញើ​តារាង​ថ្លៃ​ដើម​នៃ​សេវា​ជា​សំឡេង (voice) គិត​ជា សេន/នាទី និង​សេវា​ជា​ទិន្នន័យ (Data) គិតជា សេន/មេហ្គាបៃ មកTRC ជា​រៀងរាល់ ៦ ខែ​ម្ដង​នេះ​បើ​តាម​សេចក្តី​ជូន​ដំណឹង។

បច្ចុប្បន្ន​នេះ​មាន​ក្រុមហ៊ុន​ទូរគមនាគមន៍​ធំៗ​ពីរ គឺ Cellcard និង Smart កំពុង​ដាក់​ចេញ​គម្រោង​ប្រូម៉ូសិន​ប្តូរ​ប្រាក់​យ៉ាង​ច្រើន​ដល់​អតិថិជន​ដែល​មើល​ទៅ​ក្រុមហ៊ុន​ទាំង​នេះ​ហាក់​កំពុង​ធ្លាក់​ទៅ​ក្នុង​សមរភូមិ​តម្លៃ រហូត​ធ្វើ​ឲ្យ​មាន​ការ​កោះ​ប្រជុំ​ពី​និយតករ​ទូរគមនាគមន៍​កម្ពុជា​ដែល​ជា​ស្ថានប័ន​គ្រប់គ្រង​វិស័យ​នេះ។

យោង​តាម​សេចក្តី​ប្រកាស​ព័ត៌មាន TRC នឹង​ចាត់​វិធានការ​ចំពោះ​ប្រតិបត្តិករ​ទាំង​ឡាយ​ណា​ដែល​មិន​គោរព​តាម​ការ​ណែនាំ​នេះ​យោង​តាម​ច្បាប់​ទូរគមនាគមន៍៕

0

Comments

Please, login or register to post a comment