.jpg)
កំសៀវដាំទឹកអគ្គិសនីម៉ាក KitchenAid។ រូបថត សហការី
ក្រុងប៉ារីសៈ ក្រុមហ៊ុន Whirlpool ដែលជាក្រុមហ៊ុនផលិតសម្ភារប្រើប្រាស់ក្នុងផ្ទះរបស់អាមេរិកបានប្រកាសកាលពីថ្ងៃអង្គារថា ក្រុមហ៊ុនរបស់ខ្លួនកំពុងប្រមូលកំសៀវដាំទឹកចំនួន ៣១ ម៉ឺនគ្រឿងនៅទូទាំងពិភពលោកយកមកវិញ ដែលកំសៀវដាំទឹកទាំងនោះអាចបង្កគ្រោះថ្នាក់ដោយសារបញ្ហាដៃកំសៀវ។
ក្រុមហ៊ុន Whirlpool បានឲ្យដឹងក្នុងសេចក្តីថ្លែងការណ៍មួយថា ការប្រមូលយកផលិតផលមកវិញនេះនឹងប៉ះពាល់ដល់កំសៀវដាំទឹកម៉ាក KitchenAid ចំណុះ ១,៧ លីត្រ ដែលត្រូវបានផលិតនៅចន្លោះខែមករាឆ្នាំ ២០១៣ ដល់ខែមិថុនា ឆ្នាំ ២០១៧ និងត្រូវបានដាក់លក់នៅតំបន់អឺរ៉ុប មជ្ឈិមបូព៌ា និងអាហ្វ្រិក។
ក្រុមហ៊ុននេះបានសម្រេចចាត់វិធានការប្រមូលយកផលិតផលរបស់ខ្លួនមកវិញ បន្ទាប់ពីមានការត្អូញត្អែរពីអតិថិជនថា ដៃកំសៀវបានប្រេះបែក ដោយអាចធ្វើឲ្យអ្នកប្រើប្រាស់ប្រឈមហានិភ័យរលាកទឹកដែលកំពុងពុះ។
ក្រុមហ៊ុន Whirlpool បានរៀបរាប់ថា៖ «យើងចាត់វិធានការប្រមូលយកផលិតផលមកវិញនេះដោយស្ម័គ្រចិត្ត ដើម្បីរក្សាសុវត្ថិភាពរបស់អតិថិជន តាមរយៈការស្នើសុំឲ្យអតិថិជនយកកំសៀវខូចនេះមកក្រុមហ៊ុន Whirlpool ដើម្បីប្តូរយកកំសៀវថ្មីដោយឥតគិតថ្លៃ»។
ក្រុមហ៊ុនអន្តរជាតិរបស់អាមេរិកមួយនេះបានរងការរិះគន់នាពេលថ្មីៗនេះពីសំណាក់សមាជិកសភារបស់ចក្រភពអង់គ្លេស ចំពោះការឆ្លើយតប «មិនល្អ» របស់ខ្លួនចំពោះបញ្ហាមួយចំនួនដែលបានរកឃើញចំពោះឧបករណ៍ផ្លុំសក់ ដែលត្រូវបានផលិតក្រោមម៉ាកយីហោ Hotpoint ម៉ាក Creda និងម៉ាក Indesit ដែលអាចបង្កជាគ្រោះអគ្គិភ័យ។
ទូទឹកកកដែលផលិតដោយក្រុមហ៊ុន Whirlpool ក៏ត្រូវបានរកឃើញថាជាប្រភពបង្កជាគ្រោះអគ្គិភ័យផងដែរនៅក្នុងតំបន់អគារនាទីក្រុងឡុងដ៍មួយកាលពីឆ្នាំមុនដែលបានធ្វើឲ្យមនុស្សចំនួន ៧១ នាក់បាត់បង់ជីវិត៕ BP
