ក្រុងអារប៊ីល: ការវាយប្រហារផ្លូវអាកាសពីកងទ័ពស៊ីរី និងរុស្ស៊ី កាលពីថ្ងៃអង្គារ បានធ្វើការវាយប្រហារលើដែនដី Ghouta ភាគខាងកើតត្រួតត្រាដោយក្រុមឧទ្ទាម ដោយបានបង្កឲ្យជនស៊ីវិលជាង ១០០ នាក់ស្លាប់នៅថ្ងៃទី ២ ទៀត និងបានបណ្តាលឲ្យមន្ទីរពេទ្យមួយកន្លែងផ្អាកដំណើរការ។
អំឡុងការប្រែប្រួលដ៏សំខាន់មួយសម្រាប់សង្គ្រាមរយៈពេល ៧ ឆ្នាំ ដ៏ស្មុគស្មាញនៅស៊ីរី ក្រុងដាម៉ាស ក៏បានបញ្ជូនក្រុមយុទ្ធជនគាំទ្ររបបស៊ីរីទៅតំបន់អាហ្រ្វីនភាគខាងជើង ជាទីដែលពួកគេ រងការវាយប្រហារពីកងទ័ពតួកគី ធ្វើការវាយប្រហារលើដែនដីត្រួតត្រាដោយក្រុមឧទ្ទាម។
នៅតំបន់ជាយក្រុងដាម៉ាស ការវាយប្រហារផ្លូវអាកាស គ្រាប់រ៉ុក្កែត និងការវាយប្រហារ ដោយកាំភ្លើងធំបានធ្វើការវាយប្រហារយ៉ាងសន្ធឹកសន្ធាប់លើដែនដី Ghouta ភាគខាងកើតជាការត្រៀមសម្រាប់ការវាយប្រហារដែនគោកពីសំណាក់កងទ័ពរដ្ឋាភិបាល។
ក្រុមឃ្លាំមើលសិទ្ធិមនុស្សស៊ីរី (SOHR) បានឲ្យដឹងថា ជនស៊ីវិលយ៉ាងតិច ២៥០ នាក់ ត្រូវបានសម្លាប់តាំងពីភាពតានតឹង បានកើនឡើងកាលពីថ្ងៃអាទិត្យ ដែលក្នុងចំណោមពួកគេមានក្មេងៗរាប់សិបនាក់នៅក្នុងនោះផងដែរ។
ក្រុមឃ្លាំមើលសិទ្ធិមនុស្សដែល មានមូលដ្ឋាននៅអង់គ្លេស បានឲ្យដឹងថា ការវាយប្រហារដោយទម្លាក់គ្រាប់បែក កាលពីថ្ងៃអង្គារ បានសម្លាប់ជនស៊ីវិល ១០៦ នាក់ រួមទាំងក្មេង ១៩ នាក់។
ឈានដល់ថ្ងៃទី ២ ទៀត ចំនួនអ្នកស្លាប់ជាជនស៊ីវិល បានកើនដល់ ១០០ នាក់ បន្ទាប់ពី ១២៧ នាក់ត្រូវបានសម្លាប់កាលពីថ្ងៃចន្ទក្នុងរយៈពេលមួយថ្ងៃ ដែលបង្កការបង្ហូរឈាមជាងគេបំផុតនៅ Ghouta ភាគខាងកើតអំឡុងរយៈពេល ៤ ឆ្នាំមកនេះ។
ការវាយប្រហារផ្លូវអាកាស បានធ្វើឲ្យមន្ទីរពេទ្យសំខាន់មួយបិទទ្វារ កាលពីថ្ងៃអង្គារ ដោយដាក់កម្រិតលើការផ្តល់ជំនួយសុខាភិបាល៕