Search form

Login - Register | FOLLOW US ON

Logo of Phnom Penh Post newspaper Phnom Penh Post - កូរ៉េខាងជើង ​បេ្តជ្ញា​បង្កើន​កម្មវិធី​ផលិត​អាវុធ ​បន្ទាប់​ពី​រង​ទណ្ឌកម្ម​ថ្មី

Content image - Phnom Penh Post
លោកគីម ជុងអ៊ុន (កណ្តាល) ថត​រូបជា​មួយក្រុម​គ្រូបង្រៀន​ដែលស្ម័​គ្រចិត្ត​ធ្វើការ​នៅ​តាម​សាលា​នៅ​លើ​កោះ។ AFP

កូរ៉េខាងជើង ​បេ្តជ្ញា​បង្កើន​កម្មវិធី​ផលិត​អាវុធ ​បន្ទាប់​ពី​រង​ទណ្ឌកម្ម​ថ្មី

ក្រុងសេអ៊ូលៈ កូរ៉េខាងជើង​បាន​បេ្តជ្ញា​នឹង​បង្កើន​ល្បឿន​កម្មវិធី​សព្វាវុធ​របស់​ខ្លួន​ជាការ​ឆ្លើយតប​និង​ទណ្ឌកម្ម «ដ៏​អាក្រក់» ដែល​ត្រូវ​បាន​បោះឆ្នោត​អនុម័ត ដោយ​ក្រុម​ប្រឹក្សា​សនិ្តសុខ​អង្គការ​សហប្រជាជាតិ បន្ទាប់​ពី​ធ្វើតេស្ត​នុយក្លេអ៊ែរ​ដ៏មាន​អានុភាព​ចុងក្រោយ​របស់​ខ្លួន​នោះ។

បើតាម​គេហទំព័រ (38 North) ស្ថិត​ក្នុង​អាមេរិក បាន​ធ្វើការ​ប៉ាន់ស្មាន​ពី​អានុភាព​នៃការ​ធ្វើតេស្ត​បំផ្ទុះ​ដែល​ក្រុង​ព្យុងយ៉ាង បាន​អះអាង​ថា វា​គឺជា​គ្រាប់បែក​អ៊ី ដ្រូ ហ្ស៊ែន ដែល​មាន​ទំហំ​តូច​ល្មម​អាច​បំពាក់​លើ​មីស៊ីល​បាន មាន​កម្លាំង​ផ្ទុះ​ប្រហែល​ជា ២៥០ គីឡូ​តោន។ បើ​យើង​ធ្វើការ​ប្រៀប​ធៀប​វា​ជាមួយ​នឹង​គ្រាប់បែក​ដែល​ត្រូវ​បាន​ទម្លាក់​លើ​ក្រុង ហ៊ីរ៉ូស៊ីម៉ា វា​មាន​កម្លាំង​ផ្ទុះ​ខ្លាំង​ជាង ១៦ ដង។

ដូច​សព្វ​មួយ​ដង ការ​បំផ្ទុះ​ធ្វើតេស្ត​នុយក្លេអ៊ែរ​លើក​ទី ៦ របស់​ក្រុង​ព្យុងយ៉ាង ក៏ត្រូវ​ទទួល​រងការ​រិះគន់​យ៉ាង​ចាស់​ដៃ​ពី​សំណាក់​សហគមន៍​អន្តរជាតិ​ផងដែរ។

ការ​បំផ្ទុះ ត្រូវបាន​ធ្វើ​ឡើង បន្ទាប់ពី​ក្រុង​ព្យុងយ៉ាង បាន​បាញ់​សាកល្បង​មីស៊ីល​បាលីស្ទិក​អន្តរទី្វប​ចំនួន​ពីរដង​កាល​ពីខែ​កក្កដា​កន្លង​ទៅ​នេះ ដែល​បង្ហាញ​ពី​សមត្ថភាព​របស់​មីស៊ីល​កូរ៉េខាងជើង​ថា អាច​បាញ់​ដល់​ទឹកដី​របស់​អាមេរិក​បាន។

ក្រុម​ប្រឹក្សា​សន្តិសុខ​អង្គការ​សហប្រជាជាតិ បាន​សម្រេច​ជា​ឯកច្ឆន្ទ​លើ​កញ្ចប់​ទណ្ឌកម្ម​ទី ៨ ដាក់​លើ​កូរ៉េខាងជើង​កាល​ពីថ្ងៃ​ចន្ទ ដែល​ទណ្ឌកម្ម​នោះ ផ្ដោត​សំខាន់​លើ​បម្រាម​នៃ​ជំនួញ​សម្លៀក​បំពាក់ និងការ​រឹតបន្តឹង​លើការ​នាំចូល​ប្រេង ហើយ​ប្រធានាធិបតី​អាមេរិក​លោក​ដូណាល់ ត្រាំ វិញ បាន​ថ្លែង​ថា នេះ​គ្រាន់តែ​ជាការ​ចាប់ផ្ដើម​នៃ​វិធានការ​តឹងរ៊ឹង​ប៉ុណ្ណោះ។

Content image - Phnom Penh Post
លោកស្រី​ហាលី​ ចាប់ដៃ​ជាមួយ​អគ្គរដ្ឋ​ទូត​ចិន​ប្រចាំ​អស.ប.លោក Liu។ AFP

សេចក្ដីសម្រេច ដែល​ត្រូវ​បាន​បោះឆ្នោត​អនុម័ត បន្ទាប់​ពី​ទីក្រុង​វ៉ាស៊ីនតោន បាន​បន្ទន់​ឥរិយាបថ​ទម្លាក់​ចោល​ការស្នើសុំ​ដំបូង​របស់​ខ្លួន ដើម្បី​ធ្វើយ៉ាង​ណា​ឲ្យ​ទទួល​បាន​ការគាំទ្រ​ពីចិន និង​រុស្ស៊ី​នោះ ត្រូវបាន​រៀបចំ​មួយ​ខែ​បន្ទាប់​ពី​ក្រុម​ប្រឹក្សា​សន្តិសុខ បាន​ដាក់​បម្រាម​លើ​ការ​នាំចេញ​ធ្យូងថ្ម សំណ និង​អាហារ​សមុទ្រ ដែល​ជាការ​ឆ្លើយតប​ទៅ​នឹង​ការបាញ់​សាកល្បង​មីស៊ីល​បាលីស្ទិក​អន្តរទ្វីប​របស់​ព្យុងយ៉ាង។

រដ្ឋមន្ត្រី​ការបរទេស​កូរ៉េខាងជើង បាន​ថ្លែង​រិះគន់​វិធានការ​ថ្មី​ខ្លាំងៗ ដោយ​បាន​ហៅ​ទណ្ឌកម្ម​ទាំង​នោះ​ជា «ការ​បង្ខាំង​សេដ្ឋកិច្ច​យ៉ាង​ពេញ​ទំហឹង» ដែល​ដឹកនាំ​ដោយ​អាមេរិក និង​មាន​បំណង​ចង់​ខ្ទប់​ដង្ហើម​រដ្ឋ និង​ប្រជាជន​កូរ៉េខាងជើង។

ក្រសួង​ការបរទេស​កូរ៉េខាងជើង បាន​ថ្លែង​ដោយ​ប្រើ​ឈ្មោះ​កូរ៉េខាងជើង​ជា​អក្សរ​កាត់​ថា៖ «កូរ៉េខាងជើង «DPRK» នឹង​ធ្វើការ​ខិតខំ​ប្រឹង​ប្រែង​ទ្វេដង ដើម្បី​បង្កើន​កម្លាំង​សម្រាប់​ការពារ​អធិបតេយ្យភាព​និង​សិទ្ធិ​ក្នុងភាព​ជា​រដ្ឋ​មួយ​របស់​ប្រទេស​ខ្លួន»។

ប៉ុន្តែ​ក្រសួង​រួបរួម​ជាតិ​កូរ៉េខាងត្បូង​បាន​ថ្លែង​ថា សេចក្ដី​ថ្លែងការណ៍​នោះ គឺជា​ការឆ្លើយតប​ដែល​មាន​កម្រិត​ទាប​បំផុត​របស់​កូរ៉េខាងជើង ចំពោះ​សេចក្ដី​សម្រេច​នោះ៕

0

Comments

Please, login or register to post a comment

ព័ត៌មានពាក់ព័ន្ធ