ក្រុងសេអ៊ូលៈ កូរ៉េទាំង ២ បានព្រមព្រៀងគ្នាដើរហែក្បួនរួមគ្នាក្រោមទង់តែមួយនៅក្នុងពេលបើកកម្មវិធីកីឡាអូឡាំពិករដូវរងា ដែលនេះគឺជាសញ្ញាចុងក្រោយបង្អស់បង្ហាញថាភាពតានតឹងនៃវិបតិ្តនៅឧបទ្វីបកូរ៉េ បានថយចុះ។
ការសម្រេចចិត្តនោះ បានធ្វើឡើង បន្ទាប់ពីប៉ុន្មានខែនៃភាពតានតឹងលើកម្មវិធីមីស៊ីលបាលីស្ទិកអន្តរទ្វីប និងនុយក្លេអ៊ែររបស់ក្រុងព្យុងយ៉ាង។ តទៅនេះ គឺជាកំណត់ហេតុពេលវេលានៃទំនាក់ទំនងរបស់កូរ៉េទាំង ២ ហើយបើតាមបច្ចេកទេស គឺនៅតែស្ថិតក្នុងសង្គ្រាមជាមួយគ្នានៅឡើយ។
នៅខែមិថុនា ឆ្នាំ ១៩៥០ សង្គ្រាមបានផ្ទុះឡើងរវាងកូរ៉េខាងជើង (កុម្មុយនីស្ត) និងកូរ៉េខាងត្បូង (សេរី)។ សង្គ្រាមប្រយុទ្ធគ្នានេះបានសម្លាប់មនុស្សអស់រវាងពី ២ ទៅ ៤ លាននាក់។
ក្រុងប៉េកាំងជាអ្នកគាំទ្រក្រុង ព្យុងយ៉ាង ក្នុងអំឡុងពេលសង្គ្រាម ៣ ឆ្នាំ ខណៈក្រុង វ៉ាស៊ីនតោន ជាអ្នកនៅពីក្រោយកូរ៉េខាងត្បូងដែលជាសម្ព័ន្ធមិត្តនោះ នៅតែបន្តរឹងមាំ។
កូរ៉េទាំង ២ ត្រូវស្ថិតក្នុងស្ថានភាពដ៏គ្រោះថ្នាក់មួយចាប់តាំងពីពេលដែលជម្លោះបានបិទបញ្ចប់នៅឆ្នាំ ១៩៥៣ ដោយការចុះហត្ថលេខាលើយុទ្ធនាការសន្តិភាព មិនមែនជាសន្ធិសញ្ញាសន្តិភាពផ្លូវការ ដោយសារតែមូលហេតុនេះហើយទើបកូរ៉េទាំង ២ នៅតែស្ថិតនៅក្នុងសង្គ្រាម នេះបើតាមលក្ខណៈ បច្ចេកទេស។
ក្រុងព្យុងយ៉ាងបានធ្វើតេស្តបទឈប់បាញ់ដ៏ផុយស្រួយនេះ ជាមួយនឹងការវាយប្រហារជាច្រើនលើក។ កូរ៉េខាងជើង បានបញ្ជូនកម្លាំងពិសេស ៣១ នាក់ទៅក្រុងសេអ៊ូល ដើម្បីរៀបគម្រោងធ្វើឃាតលោកប្រធានាធិបតី Park Chung-Hee នៅឆ្នាំ ១៩៦៨។
ក្រុងព្យុងយ៉ាងបានចាប់ផ្តើមធ្វើការប៉ុនប៉ងសម្លាប់យ៉ាងសាហាវនៅមីយ៉ាន់ម៉ាក្នុងឆ្នាំ ១៩៨៣ នៅពេលគ្រាប់បែក ១ គ្រាប់បានផ្ទុះឡើងនៅក្រុងយ៉ាំងហ្គោនក្នុងអំឡុងទស្សនកិច្ចរបស់ប្រធានាធិបតីកូរ៉េខាងត្បូងលោក Chun Doo-Hwan នោះ៕