.jpg)
ប្រធានាធិបតី ស៊ីរី លោក បាសារ អាល់-អាសាដ (កណ្តាល-ស្តាំ) ជួបជាមួយ រដ្ឋមន្ត្រីការបរទេសអុីរ៉ង់ លោក Kamal Kharazi (កណ្តាល-ឆ្វេង) ក្នុងទីក្រុង ដាម៉ាស។ AFP
ក្រុងបេរូត: ក្រុមបក្សប្រឆាំងដ៏សំខាន់មួយ នៅស៊ីរី បានឲ្យដឹងថា ពួកគេ នឹងបញ្ជូនគណៈប្រតិភូមួយក្រុម នៅថ្ងៃចន្ទ ទៅកាន់ប្រទេសរុស្ស៊ី ដើម្បីចូលរួម ធ្វើការពិភាក្សាជាមួយ ក្រុមមន្ត្រី នៅទីនោះអំពី «គោលជំហរពិតប្រាកដរបស់ក្រុងម៉ូស្គូ» ស្តីអំពី ដំណើរការនយោបាយនៅស៊ីរី ។
ដំណើរទស្សនកិច្ចនេះ ធ្វើឡើងដោយក្រុមគណៈកម្មការបើកកិច្ចចរចាស៊ីរី (SNC) ធ្វើឡើងខណៈក្រុងម៉ូស្គូត្រៀមខ្លួននឹងទទួលផ្តួចផ្តើមកិច្ចចរចាស្វែងរកសន្តិភាពនៅក្នុងរមណីយដ្ឋានឆ្នេរសមុទ្រខ្មៅក្នុងទីក្រុងសូជីនៅថ្ងៃទី ៣០ ខែមករា ឆ្នាំ ២០១៨ នេះ រួមជាមួយ អ្នកគាំទ្រ របបស៊ីរី គឺអុីរ៉ង់ និង អ្នកគាំទ្រក្រុមឧទ្ទាម គឺ តួកគី។
ក្រុម SNC បានលើកឡើងថា ក្រុមខ្លួននឹងចូលរួមបើកកិច្ចចរចាផ្តួចផ្តើមដោយអង្គការសហប្រជាជាតិថ្មីៗមួយមុនពេលនោះ ប៉ុន្តែ មិនទាន់បានប្រកាសអំពីបញ្ហានេះនៅឡើយនៅពេលនេះថា ក្រុមខ្លួននឹងចូលរួមបើកកិច្ចចរចាស្វែងរកសន្តិភាពក្នុងក្រុងសូជី ដែលក្រុមសមភាគីជាច្រើនក្រុមបានធ្វើការទាត់រួចជាស្រេចនោះ។
យោងតាមប្រភពព័ត៌មានពីសេចក្តីថ្លែងការណ៍មួយចេញដោយក្រុម SNC បានឲ្យដឹងថា ដំណើរទស្សនកិច្ចនៅថ្ងៃចន្ទគឺជាការឆ្លើយតបទៅនឹងការអញ្ជើញមួយដោយក្រសួងការបរទេសរុស្ស៊ី» ហើយដែលគណៈប្រតិភូរបស់ខ្លួននឹងចូលរួមបើកកិច្ចចរចានេះជាមួយរដ្ឋមន្ត្រីការបរទេសនិងការពារជាតិ ក៏ដូចជាក្រុមសមាជិកសភាផងដែរ។
កងរថពាសដែក និងរថយន្តយោធាជើងគោក របស់កងទ័ពតួកគី ធ្វើដំណើរឆ្លងកាត់ ចំណុចឆ្លងកាត់ ព្រំដែន Bab al-Salamah នៅចន្លោះ ស៊ីរី និង តួកគី នៅភាគខាងជើង ខេត្ត អាឡិបប៉ូ នៅថ្ងៃទី២១ មករា ២០១៨។ AFP
ក្រុមគណៈប្រតិភូនេះដដែលបានឲ្យដឹងថា ដំណើរទស្សនកិច្ចនោះមានគោលដៅ «ស្វែងយល់ពីគោលជំហរពិតប្រាកដរបស់ក្រុងរុស្ស៊ីចំពោះដំណើរការនយោបាយនៅស៊ីរី ដោយហេតុ រុស្ស៊ីគឺជាដៃគូមួយនៅក្នុងជម្លោះ ឬសង្គ្រាមនៅស៊ីរី ជាអ្នកផ្តួចផ្តើមបើកកិច្ចចរចាដ៏សំខាន់ជាមួយស៊ីរីនិងជាអ្នកធានានូវការអនុវត្តគោលនយោបាយ «តំបន់សុវត្ថិភាព»នានាផងដែរ»។
អ្នកនាំពាក្យ SNC លោក Yahya al-Aridi បានថ្លែងប្រាប់ AFP ថា ក្រុមបក្សប្រឆាំងចង់«បញ្ជាក់ឲ្យបានច្បាស់ថារុស្ស៊ីមានភាពច្បាស់លាស់និងហ្មត់ចត់លើបញ្ហានៃដំណើរស្វែងរកដំណោះស្រាយនយោបាយដើម្បីស្វែងរកសន្តិភាពនៅស៊ីរី»និងជាពិសេសកិច្ចចរចាស្វែងរកសន្តិភាពដឹកនាំដោយអង្គការសហប្រជាជាតិ។
កិច្ចចរចាស្វែងរកសន្តិភាពផ្តួចផ្តើមដោយអង្គការសហប្រជាជាតិជាច្រើនជុំត្រូវបានប្រារព្ធបើកឡើងនៅក្នុងទីក្រុងហ្សឺណែវ ហើយដែល កិច្ចចរចាជុំចុងក្រោយដែលបានធ្វើឡើងក្នុងពាក់កណ្តាលខែធ្នូមិនមានការរីកលូតលាស់ទៅមុខឆ្ពោះទៅរកការបញ្ចប់សង្គ្រាមនៅស៊ីរីគួរឲ្យកត់សម្គាល់ឡើយ។
ពួកគេនឹងចាប់បន្តបើកកិច្ចចរចានេះជាថ្មីទៀតនៅថ្ងៃទី២៥-២៦ ខែមករា ដែលពេលនេះធ្វើឡើងក្នុងទីក្រុងវីយែន (Vienna) មុនពេលប្រារព្ធបើកកិច្ចចរចាក្នុងទីក្រុងសូជី។
ក្រុមអ្នកដើរតួសំខាន់ៗមានដូចជារុស្ស៊ី អុីរ៉ង់ និងតួកគីបានចូលរួមធ្វើការផ្តួចផ្តើមបើកកិច្ចចរចាស្វែងរកសន្តិភាពស្រដៀងៗគ្នាជាច្រើនចាប់តាំងពីដើមឆ្នាំមុនដែលបានប៉ុនប៉ង់ដើម្បីផ្តោតលើបញ្ហាសង្គ្រាមនេះ។
សង្គ្រាមនៅ ស៊ីរី ដែលបានអូសបន្លាយជិត ៧ ឆ្នាំ ដែលបានចាប់ផ្តើមខណៈរបបស៊ីរីបានបង្ក្រាបយ៉ាងយ៉ាងសាហាវលើក្រុមអ្នកប្រឆាំងតវ៉ាបានបណ្តាលឲ្យពលរដ្ឋជាង ៣៤០ ០០០ នាក់បានបាត់បង់ជីវិតនិងបានបង្ខំឲ្យក្រុមពលរដ្ឋជាច្រើនលាននាក់ទៀតរត់ភៀសខ្លួនគេចចេញពីផ្ទះសម្បែងរបស់ពួកគេនិងបានបង្កមហាវិនាសកម្មដល់ប្រទេសជាតិ៕ AFP/ ប្រែសម្រួលដោយ សុឹម សានិត
