ក្រុងសេអ៊ូលៈគណៈប្រតិភូកូរ៉េខាងត្បូងមួយក្រុម បានឆ្លងចូលទៅទឹកដីកូរ៉េខាងជើង កាលពីថ្ងៃអង្គារ ដើម្បីពិនិត្យមើលផ្លូវនានាក្នុងគោលបំណងរៀបចំព្រឹត្តិការណ៍ផ្សេងៗ ទាក់ទងនឹងការប្រកួតកីឡាអូឡាំពិកខណៈភាពចម្រូងចម្រាស់ជុំវិញការផ្សះផ្សាបានកើនឡើង និងក្រុងព្យុងយ៉ាងបានថ្កោលទោសក្រុមអ្នកតវ៉ាដែលបានដុតរូបថតរបស់លោកគីមជុងអ៊ុនថាជាក្រុមជនក្បត់ជាតិ។
កូរ៉េខាងទាំងពីរ បានព្រមព្រៀងគ្នាកាលពីដើមខែថា ក្រុមអត្តពលិករកូរ៉េខាងជើង នឹងចូលរួមការប្រកួតកីឡារដូវរងានៅក្រុង Pyeongchang នៅខែក្រោយ រួមមានក្រុមកីឡាវាយកូនហ្គោល លើទឹកកក (Ice hockey) ស្ត្រីនិងដើរហែរក្បួនរួមគ្នានៅពេលបើកការប្រកួតនោះ។
ប្រទេសទាំងពីរ ក៏បានឯកភាពគ្នាថា ក្រុមអ្នកជិះស្គីរបស់កូរ៉េខាងត្បូង នឹងហ្វឹកហាត់ជាមួយសមភាគីកូរ៉េខាងជើងនៅរមណីយដ្ឋានជិះស្គី Masikryong និងរៀបចំព្រឹត្តិការណ៍វប្បធម៌រួមគ្នា៕ PSA