.jpg)
ក្រុមជនចំណាកស្រុកខុសច្បាប់មកពីអារ៉ាប់ និង ទ្វីបអាហ្រ្វិក មកដល់ មូលដ្ឋានយោធាជើងទឹកនៅក្នុងទីក្រុង ទ្រីប៉ូលី នៅយប់ថ្ងៃទី១៥ ខែ មករា ឆ្នាំ ២០១៨ បន្ទាប់ពីត្រូវបានជួយសង្គ្រោះពីតំបន់ដែនសមុទ្រ ក្បែរឆ្នេរ Zuwara ចម្ងាយ ១៣០ គីឡូម៉ែត្រ នៅទិសខាង រដ្ឋធានីរបស់លីប៊ីនេះ ។ AFP
ក្រុងរ៉ូម: ក្រុមឆ្មាំឆ្នេរសមុទ្ររបស់អុីតាលី បានឲ្យដឹងថាក្រុមជនចំណាកស្រុកប្រហែល ១៤០០ នាក់ត្រូវបានជួយសង្គ្រោះពីសមុទ្រម៉េឌីទែរ៉ាណេ និងបញ្ជូនទៅកាន់តំបន់មានសុវត្ថិភាព កាលពីថ្ងៃអង្គារ ខណៈក្រុមអ្នកជួយសង្គ្រោះបានរកឃើញសាកសពជនរងគ្រោះចំនួនពីរនាក់ ចេញពីទូកដែលប៉ុនប៉ងធ្វើដំណើរដ៏សែនគ្រោះថ្នាក់ឆ្លងកាត់ដែនសុទ្រនេះ។
អង្គការសប្បុរសធម៌អេស្ប៉ាញ់ Proactiva OpenArms បានថ្លែងថា ក្រុមខ្លួនបានទៅជួយសង្គ្រោះទូកមួយដែលផ្ទុកចំណុះច្រើនលើសលប់កំពុងដឹកជញ្ជូនមនុស្សប្រហែល ៤០០ នាក់នៅក្នុងស្ថានភាពដែលកំពុងមានគ្រោះថ្នាក់ខ្លាំងហើយដែលម្នាក់ក្នុងចំណោមជនរងគ្រោះដែលបានស្លាប់គឺជាកុមារម្នាក់។
ទូករបស់ក្រុមប៉ូលិសអុីតាលីជាច្រើនគ្រឿងនិងក្រុមល្បាតឆ្នេរសមុទ្រ ក្រុមបេសកកម្មប្រឆាំងការជួញដូរមនុស្ស របស់ EU ឈ្មោះ Sophia និង Proactiva បានបើកប្រតិបត្តិការជួយសង្គ្រោះដាច់ដោយឡែកពីគ្នា ចំនួន ១១ ដង ដើម្បីជួយក្រុមជនរងគ្រោះពីទូកទាំង៧ ដែល៣គ្រឿងជាទូកតូចៗសាងពីឈើ និង ទូកធំមួយគ្រឿង។
ក្រុម Proactiva បានលើកឡើងថាស្ត្រី ១៧៥ នាក់និងក្មេង ៧៥ នាក់ស្ថិតក្នុងចំណោមក្រុមជនរងគ្រោះដែលក្រុមខ្លួនបានជួយសង្គ្រោះដោយបានបន្ថែមថាពួកគេបានចំណាយ «ពេលជាច្រើនម៉ោងដឹកជញ្ជូនជាពីរថ្នាក់នៅក្នុងស្ថានភាពដែលលក្ខខណ្ឌគ្រោះថ្នាក់ខ្លាំង។ ទូកនោះអាចលិចលង់នៅពេលណាមួយ»។
ក្រុមនោះដដែលបានថ្លែងថា ក្រុមជនដែលត្រូវបានជួយសង្គ្រោះទាំងនោះ «ស្ថិតក្នុងស្ថានភាពធ្ងន់ធ្ងរស្ទើរតែស្លាប់»។
យោងតាមប្រភពព័ត៌មាន ពីក្រសួងការបរទេស អុីតាលី បានឲ្យដឹងថា ក្រុមជនរងគ្រោះជិត ១ ០០០ នាក់ត្រូវបានជួយសង្គ្រោះនិងដឹកជញ្ជូនទៅកាន់អុីតាលី ចាប់តាំងពីដើមឆ្នាំដោយក្រុមជនចំណាកស្រុកដែលត្រូវបានចុះក្នុងបញ្ជីបានធ្លាក់ចុះ ៦០ ភាគរយ ក្នុងដំណាក់កាលតែមួយកាលពីឆ្នាំទៅ។
តួលេខនៃចំនួនក្រុមជនចំណាកស្រុកដែលជួយសង្គ្រោះចេញពីទូកចាស់ៗគ្មានសុវត្ថិភាពបានធ្លាក់ចុះយ៉ាងខ្លាំងចាប់តាំងពីអុីតាលីបានចុះកិច្ចព្រមព្រៀងគាំទ្រដោយក្រុង ប្រ៊ុចសែល ដ៏ចម្រូងចម្រាសមួយកាលពីរដូវក្តៅឆ្នាំមុន ដោយតម្រូវដាក់កងកម្លាំងនៅក្នុងទឹកដី លីប៊ី ដើម្បីទប់ស្កាត់ក្រុមជនចំណាកស្រុកមិនឲ្យធ្វើដំណើរទៅកាន់ទ្វីបអឺរ៉ុប។
ទីភ្នាក់ងារជនភៀសខ្លួន របស់អង្គការសហប្រជាជាតិ បានឲ្យដឹងថា ក្រុមជនរងគ្រោះ ១៧៣ នាក់បានស្លាប់ ខណៈកំពុងព្យាយាមធ្វើដំណើរឆ្លងកាត់ចេញពីទ្វីប អាហ្រ្វិកខាងជើង នៅក្នុងឆ្នាំ ២០១៨ នេះ៕ AFP/ប្រែសម្រួលដោយសុឹម សានិត
