ក្រុងបាហ្សារៈ ជនភៀសខ្លួនរ៉ូហ៊ីងយ៉ា ដែលកំពុងតែរស់នៅតំបន់ស បានបដិសេធកាលពីថ្ងៃអង្គារក្នុងការវិលត្រឡប់ទៅកាន់ប្រទេសមីយ៉ាន់ម៉ា បើគ្មានការធានាពីការទទួលបានសញ្ជាតិ និងសន្តិសុខបន្ទាប់ពីមន្ត្រីបង់ក្លាដែស និងមីយ៉ាន់ម៉ាបានជួបពិភាក្សាគ្នាអំពីការបញ្ជូនជនភៀសខ្លួនត្រឡប់មកមីយ៉ាន់ម៉ាវិញ។
ជនជាតិភាគតិចរ៉ូហ៊ីងយ៉ា ៦០០០ នាក់ក្នុងចំណោមជនជាតិរ៉ូហ៊ីងយ៉ា ដែលបានរត់គេចខ្លួនពីប្រទេសមីយ៉ាន់ម៉ាដំបូងគេបង្អស់ ដោយសារតែការបង្ក្រាបយ៉ាងហិង្សាពីសំណាក់កងទ័ពមីយ៉ាន់ម៉ាទៅលើជនជាតិភាគតិចមូស្លីមនៅចុងខែសីហា។ ពួកគេបានរស់នៅក្នុងជំរំបណ្ដោះអាសន្ន ដែលស្ថិតនៅក្នុងតំបន់សចន្លោះប្រទេសទាំង ២។
នៅប៉ុន្មានសប្ដាហ៍ថ្មីៗនេះពួកគេបានទទួលរងសម្ពាធដែលជំរុញឲ្យពួកគេវិលត្រឡប់ទៅប្រទេសមីយ៉ាន់ម៉ាវិញហើយរដ្ឋមន្ត្រីរបស់មីយ៉ាន់ម៉ា ក៏បានព្រមានអំពី «ផលវិបាក ជាច្រើន» ប្រសិនបើពួកគេនៅតែបន្តរស់នៅលើតំបន់គ្មានអ្នកកាន់កាប់ទៅទៀត។
ប៉ុន្តែ ប្រធានសហគមន៍លោក DilMohammad បានប្រាប់សារព័ត៌មានបារាំង AFP ថា ពួកគេនឹងមិនវិលត្រឡប់ទៅកាន់ប្រទេសមីយ៉ាន់ម៉ាវិញទេ ប្រសិនបើពួកគេមិនទទួលបានការធានាចំពោះសន្តិសុខសញ្ជាតិ និងសំណងសម្រាប់ការខូចខាតទ្រព្យសម្បត្តិរបស់ពួកគេនៅអំឡុងពេលបង្ក្រាបរបស់កងទ័ពឡើយ។
លោកបានថ្លែងថា៖ «យើងនឹងមិនវិលត្រឡប់ទៅកាន់ផ្ទះសំបែង និងភូមិឋានរបស់យើងនៅមីយ៉ាន់ម៉ាវិញទេ បើគ្មានការធានាត្រឹមត្រូវ។ យើងចង់បានសញ្ជាតិ សិទ្ធិទាំងអស់ សន្តិសុខសម្រាប់ជីវិតរបស់ពួកយើង និងទ្រព្យសម្បតិ្ត និងសំណង»។
ប្រជាជនមីយ៉ាន់ម៉ាកាន់ព្រះពុទ្ធសាសនាភាគច្រើនបដិសេធការប្រគល់សញ្ជាតិទៅ ឲ្យជនរ៉ូហ៊ីងយ៉ា៕