.jpg)
នាយករដ្ឋមន្ត្រីអូស្ត្រាលីលោក Malcolm Turnbull (ទីពីរឆ្វេង) ថតរូបជាមួយនាយករដ្ឋមន្ត្រីជប៉ុនលោកស៊ីនហ្សូ អាបេ (កណ្តាល) នៅមុខរថយន្តកងទ័ពជើងគោក ម៉ាក Bushmaster ផលិតនៅអូស្ត្រាលី អំឡុងដំណើរទស្សនកិច្ចជំរំ Narashino របស់កងទ័ពស្វ័យការពារជើងគោកជប៉ុនក្នុងក្រុង Funabashi។ AFP
ក្រុងតូក្យូ: នាយករដ្ឋមន្ត្រីជប៉ុន និងអូស្ត្រាលី បានធ្វើដំណើរទស្សនកិច្ច ជំរំហ្វឹកហ្វឺនយោធាមួយនៅខាងក្រៅទីក្រុងតូក្យូ កាលពីថ្ងៃព្រហស្បតិ៍ ខណៈប្រទេសទាំង ២ ស្វះស្វែងរកការរឹតបន្តឹងចំណងទាក់ទងការពារជាតិ ស្របពេលកំពុងប្រឈមជាមួយវិបត្តិនៅកូរ៉េខាងជើង។
លោក Malcolm Turnbull និង នាយករដ្ឋមន្ត្រីជប៉ុនលោក ស៊ីនហ្សូ អាបេ នឹងធ្វើការចុះកិច្ចព្រមព្រៀងសន្តិសុខមួយ ស្តីអំពីកិច្ចប្រតិបត្តិការការពាររួម និងសមយុទ្ធយោធា ដោយបានផ្តោតការចាប់អារម្មណ៍មួយផ្នែកផងដែរទៅលើចិន ខណៈប្រទេសមហាអំណាចនៅទ្វីបអាស៊ីមួយនេះកំពុងព្យាយាមធ្វើការពង្រីកមហិច្ឆតាដែនសមត្ថភាពកងទ័ពជើងទឹករបស់ខ្លួននោះ។
ក្រុមអ្នកការទូត កំពុងព្យាយាមធ្វើការចុះកិច្ចព្រមព្រៀងការពារជាតិដែលត្រូវបានស្នើឡើងនេះ ជាប្រភេទកិច្ចព្រមព្រៀងដំបូងមួយ សម្រាប់ជប៉ុន ហើយវានឹងធ្វើឲ្យ អូស្ត្រាលី ក្លាយជាដៃគូប្រតិបត្តិការយោធាដ៏ជិតស្និទ្ធបំផុតរបស់ក្រុងតូក្យូ បន្ទាប់ពីមហាអំណាចយោធា និងសេដ្ឋកិច្ច គឺសហរដ្ឋអាមេរិក។
កិច្ចព្រមព្រៀងនេះ តាមការឲ្យដឹង នឹងអាចធ្វើមូលដ្ឋានមួយសម្រាប់បង្កលក្ខណ:ងាយស្រួលដល់ការធ្វើសមយុទ្ធយោធារបស់ជប៉ុន នៅក្បែរឆ្នេរដារវីន (Darwin) ជាទីក្រុងអូស្ត្រាលីមួយនៅភាគខាងជើង ដែលបានរងការវាយប្រហារពីការទម្លាក់គ្រាប់បែកដ៏ធ្ងន់ធ្ងរបំផុតពីសំណាក់កងទ័ពជប៉ុនអំឡុងសង្គ្រាមលោកលើកទី ២ (WWII)។
អ្នកការទូតជប៉ុនម្នាក់ បានថ្លែងនៅមុនបើកកិច្ចចរចានោះថា៖ «កិច្ចព្រមព្រៀង (ខាងផ្នែកយោធា) នៅពេលដែលត្រូវបានសម្រេចធ្វើឡើងនោះនឹងក្លាយជាសសរទ្រូងដ៏រឹងមាំមួយនៃកិច្ចសហប្រតិបត្តិការសន្តិសុខរវាងជប៉ុន និងអូស្ត្រាលី»។
រដ្ឋមូលធននិយមទាំង ២ នេះ បានលើកឡើងថា ការលើកស្ទួយកិច្ចសហប្រតិបត្តិការយោធាមានសារៈសំខាន់ខ្លាំង ដោយបានធ្វើឲ្យស្ថានភាពតានតឹងនៅក្នុងតំបន់ជាមួយកម្មវិធីផលិតកាំជ្រួចមីស៊ីលរបស់កូរ៉េខាងជើង ដោយធ្វើឲ្យពិភពលោកកាន់តែមានការចាប់អារម្មណ៍កាន់តែច្បាស់អំពីជម្លោះនុយក្លេអ៊ែរ ជាងនៅពេលណាមួយ ចាប់តាំងពីយុគសម័យសង្គ្រាមត្រជាក់មកម្ល៉េះ។
ការពង្រីកឥទ្ធិពលយោធានិងសេដ្ឋកិច្ចដ៏រឹងមាំរបស់ចិន នៅក្នុងតំបន់អាស៊ីប៉ាស៊ីហ្វិក ក៏បានជំរុញឲ្យជប៉ុននិងអូស្ត្រាលីធ្វើការសហប្រតិបត្តិការផ្នែកយោធាកាន់តែជិតស្និទ្ធ។ នៅមុនពេលដំណើរទស្សនកិច្ចរបស់លោកនោះ លោក Turnbull បានជំរុញឲ្យសហគមន៍អន្តរជាតិបន្តបន្ថែមសម្ពាធលើកូរ៉េខាងជើង។
លោកបានបន្ថែមថា៖ «ជប៉ុន និង អូស្ត្រាលីមានការបង្រួបបង្រួមគ្នាយ៉ាងស្អិតល្មួតបំផុតនៅក្នុងការប្តេជ្ញាចិត្តរបស់យើងធ្វើការធានាថា សហគមន៍អន្តរជាតិ ដាក់សម្ពាធដ៏ខ្លាំងក្លាបំផុតលើកូរ៉េខាងជើង ដើម្បីធានាថា របបនេះ ភ្ញាក់ខ្លួន និងបញ្ឈប់ការគំរាមនិងទង្វើឥតកោតក្រែងរបស់ខ្លួន»។
អំឡុងទស្សនកិច្ចរយៈពេលមួយថ្ងៃរបស់លោក លោក Turnbull នឹងចូលរួមកិច្ចប្រជុំពិសេសមួយរបស់ក្រុមប្រឹក្សាសន្តិសុខជាតិជប៉ុន និងធ្វើដំណើរទស្សនកិច្ចទៅកាន់ស្ថានីយ រថភ្លើងក្នុងតូក្យូ ជាស្ថានីយមួយមានភាពមមាញឹកជាងគេបំផុតនៅក្នុ្ងសាកលលោក។
មន្ត្រីជប៉ុនម្នាក់ថ្លែងថា៖ «យើងដឹងថា លោកនាយករដ្ឋមន្ត្រី គាំទ្រវិស័យនេះ» ៕
