ជំរំជនភៀសខ្លួន ZAATARI: អគ្គរដ្ឋទូតសុឆន្ទៈរបស់អង្គការសហប្រជាជាតិ (អ.ស.ប.)នាងអេនជេលីណា ជោលី បានជំរុញឲ្យក្រុមប្រឹក្សាសន្តិសុខរបស់អង្គការ សហប្រជាជាតិ ស្វែងរកមធ្យាណាមួយដើម្បីដោះស្រាយវិបត្តិសង្គ្រាមនៅស៊ីរីដែលបានអូសបន្លាយជិត៨ឆ្នាំនេះ អំឡុងទស្សនកិច្ចនៅជំរំជនភៀសខ្លួនស៊ីរីនៅក្នុងទឹកដីប្រទេសហ្ស៊កដង់។
តារាភាពយន្តហោះ ហូលីវូដ រូបនេះបានថ្លែងនៅជំរំ Zaatari ថា ៖ «វាជារឿងគួរឲ្យរកាំចិត្តខ្លាំងណាស់ក្នុងការវិលត្រឡប់ទៅ ហ្ស៊កដង់ វិញនិងបានឃើញផ្ទាល់ភ្នែកនូវកម្រិតនៃទុក្ខលំបាកនិងវិបត្តិផ្លូវចិត្ត គឺជំងឺបាក់ស្បាតនៅក្នុងចំណោមក្រុមជនភៀសខ្លួននៅស៊ីរី ខណៈសង្គ្រាមនេះបានឈានចូលដល់ឆ្នាំទី ៨ របស់ខ្លួននោះ»។
នាង ជោលី ប្រេសិតពិសេសតំណាងឲ្យឧត្តមស្នងការរបស់អង្គការសហប្រជាជាតិទទួលបន្ទុកផ្នែកជនភៀសខ្លួន (UNHCR) បានថ្លែងថា ក្រុមប្រទេសនៅជិតខាងស៊ីរីមានដូចជា ហ្ស៊កដង់ លីបង់ តួកគី និង អុីរ៉ាក់ ពេលនេះ បានទទួលក្រុមជនភៀសខ្លួនមកពីតំបន់មានជម្លោះនេះប្រហែល ៥,៥ លាននាក់។
នាងបានថ្លែងប្រាប់ក្រុមអ្នកយកព័ត៌មាន បន្ទាប់ពីកិច្ចប្រជុំជាមួយក្រុមគ្រួសារដែលកំពុងរស់នៅក្នុងជំរំដែលទទួលក្រុមជនភៀសខ្លួនប្រហែល ៨ ម៉ឺននាក់ថា៖«ពួកគេពិតជាគំរូមួយចំពោះពិភពលោកនាពេលមួយដែលថា ជំនួយឧបត្ថម្ភដែលមានជាមួយក្រុមជនភៀសខ្លួនមានចំនួនបន្តិចបន្តួច»។
នាងបានថ្លែងថា៖ «ជំនួយមនុស្សធម៌មិនមែនជាដំណោះស្រាយសម្រាប់រយៈពេលយូរអ្វែងនោះទេ» ដោយបានជំរុញឲ្យគ្រប់សមាជិកក្រុមប្រឹក្សាសន្តិសុខ ទាំងអស់ចាត់វិធានការនិងដោះស្រាយបញ្ហាពីវិបត្តិនៃសង្គ្រាមនេះដែលបានផ្ទុះឡើងក្នុងខែមីនា ឆ្នាំ ២០១១។
នាងបានថ្លែងថា៖«នេះគឺជាវិបត្តិមួយដែលមិនអាចដោះស្រាយបានអស់រយៈពេលជាច្រើនឆ្នាំកន្លងមក។ ទីភ្នាក់ងារ UNHCR មិនមានថវិកាគ្រប់គ្រាន់ដើម្បីផ្តល់ជូនដោយពេញលេញទាំងស្រុងឡើយ សូម្បីស្បៀងនិងឧបត្ថម្ភចាំបាច់បំផុតដទៃទៀត»។
នាងបានថ្លែងថា ការឆ្លើយតបពី UNHCR ចំពោះជម្លោះនៅស៊ីរី «មានតែ ៥០ ភាគរយតែប៉ុណ្ណោះដែលត្រូវបានឧបត្ថម្ភជាថវិកាបាន»កាលពីឆ្នាំមុន ហើយតែ ៧ ភាគរយប៉ុណ្ណោះ គិតចាប់តាំងឆ្នាំ ២០១៨៕ AFP/ ប្រែសម្រួលដោយ សុឹម សានិត