ក្រុងយ៉ាំងហ្គោនៈ មន្ត្រីបានថ្លែងថា មនុស្ស ២ នាក់ បានស្លាប់ និង ១១ នាក់ផ្សេងទៀត រងរបួសនៅក្នុងការផ្ទុះគ្រាប់បែកមួយនៅក្បែរធនាគារកាលពីថ្ងៃពុធនៅភាគខាងជើង នៃប្រទេសមីយ៉ាន់ម៉ា ខណៈអំពើហិង្សានៅតែបន្តកើតឡើង ទោះបីជាស្ថិតនៅក្នុងដំណើរការស្វែងរកសន្តិភាពក្តី។
គ្រាប់បែកមួយគ្រាប់ បានផ្ទុះនៅក្នុងក្រុង Lashio ដែលស្ថិតក្នុងរដ្ឋសានគឺជារដ្ឋដែលសម្បូរដោយក្រុមសកម្មប្រយុទ្ធជនជាតិភាគតិចក្នុងអំឡុងពេលជាច្រើនទសវត្សរ៍មកហើយទោះបីជាគោលដៅនៃការវាយប្រហារនៅក្នុងទីប្រជុំជន ត្រូវបានគេមើលឃើញថា នៅតិចតួចហើយក្តី។
បុគ្គលិកសន្តិសុខ បានថ្លែងប្រាប់ AFP ក្នុងលក្ខខណ្ឌកំបាំងមុខថាបុគ្គលិកស្រី ២ នាក់របស់ធនាគារ Yoma បានស្លាប់និងមនុស្សចំនួន ១១ នាក់ផ្សេង ទៀតត្រូវរងរបួស។
បុគ្គលិកសន្តិសុខថ្លែងថា៖ «អគារដែលនៅក្បែរខាងនោះត្រូវបានបំផ្លាញផងដែរ។ ការផ្ទុះនោះពិតជាមានសភាពខ្លាំងក្លា។ ក្រុមសន្តិសុខនៅតែបន្តសម្អាតនៅតំបន់នោះ»។
រូបថតជាច្រើនសន្លឹក បានបង្ហាញពីកម្ទេចកម្ទីនៃបំណែកបង្អួចរបស់ធនាគាររថយន្តនៅលើវិថី ដែលរងការខូចខាត និងគេក៏ឃើញក្រុមសង្គ្រោះក៏បានមកដល់។ កងទ័ពក៏បានដាក់ពង្រាយនៅកន្លែងកើតហេតុផងដែរ។
មួយផ្នែកនៃធនាគារក៏រងការខូចខាតផងដែរដោយសារការផ្ទុះគ្រាប់បែកនេះ។ មកទល់ពេលនេះមិនទាន់មានការចេញមុខអះអាងទទួលខុសត្រូវភ្លាមៗនៅឡើយ។
អ្នកនាំពាក្យរដ្ឋាភិបាលលោក ZawHtay បានសរសេរនៅលើទំព័រហ្វេសប៊ុករបស់លោកថា ស្ត្រី ២ រូបដែលគ្មានកំហុសបានស្លាប់ និងប្រជាជនស៊ីវិល ១១ នាក់ផ្សេងទៀតក៏បានរងរបួសដោយសារការផ្ទុះគ្រាប់បែកនោះដែរ៕