រដ្ឋហ្វ្លរីដាៈ ស្នងការប៉ូលិសនៅក្នុងតំបន់ម្នាក់បានថ្លែងដោយបានចាត់ទុកហេតុការណ៍នោះ «គួរឲ្យរន្ធត់» មួយថា មនុស្ស ១៧ នាក់ត្រូវបានសម្លាប់ កាលពីថ្ងៃពុធ ខណៈអតីតសិស្សម្នាក់អាយុ ១៩ ឆ្នាំបានបាញ់កាំភ្លើងវែងពាក់កណ្តាលស្វ័យប្រវត្តិនៅវិទ្យាល័យមួយស្ថិតក្នុងរដ្ឋហ្វ្លរីដា។
នាយប៉ូលិសលោក SteveIsrael បានថ្លែងថា ជនរងគ្រោះមានទាំងសិស្សសាលា និងមនុស្សចាស់ ទោះបីជាលោកមិនទាន់អាចបញ្ជាក់ឲ្យប្រាកដថាមនុស្សចាស់ទាំងនោះជាគ្រូក្ដី។ លោកបានបន្ថែមថាជនរងគ្រោះ ១២ នាក់ស្ថិតនៅខាងក្នុងអគារនៃសាលានោះ។
លោកបានធ្វើការកំណត់អត្តសញ្ញាណជនដៃដល់ដែលមានឈ្មោះ Nikolas Cruz អតីតសិស្សនៅវិទ្យាល័យ MarjoryStoneman Douglas ហើយជនដៃដល់រូបនេះត្រូវបានបណ្ដេញចេញពីសាលា ដោយសារតែបញ្ហាក្នុងការគោរពបទបញ្ជាផ្ទៃក្នុង។
នាយប៉ូលិសដដែលបានថ្លែងថា Cruz ត្រូវបានចាប់ខ្លួនដោយមិនមានការប៉ះទង្គិចគ្នានោះទេនៅក្នុងក្រុង CoralSpring បន្ទាប់ពីការបាញ់ប្រហារនៅថ្ងៃបុណ្យនៃក្ដីស្រឡាញ់នោះ ហើយជនសង្ស័យនេះត្រូវបានបញ្ជូនទៅមន្ទីរពេទ្យដោយសារតែមានរបួសបន្តិចបន្តួច។
លោក Israel បានថ្លែងថា៖ «យើងបានចាប់ផ្ដើមចូលមើលវេបសាយជាច្រើន និងបណ្ដាញសង្គមរបស់គាត់ដែលគាត់ប្រើប្រាស់។ រឿងជាច្រើននៅក្នុងវេបសាយ និងបណ្ដាញសង្គមរបស់គាត់គឺមានសភាពរំខាន និងសាហាវខ្លាំង»។
នាយប៉ូលិសរូបនោះបានបន្ថែមថា៖ «គាត់មានបង់គ្រាប់កាំភ្លើងរាប់មិនអស់ និងច្រើនមែនទែនហើយនាពេលនេះយើងជឿថា គាត់មានកាំភ្លើងវែងមួយដើមម៉ាក AR-15»។
លោក Israel ថ្លែងថា លោកក៏មិនប្រាកដអំពីចំនួននៃជនរងរបួសឡើយ ប៉ុន្តែលោកថាយ៉ាងហោចណាស់មានជនរងគ្រោះ ១៤ នាក់ត្រូវបានបញ្ជូនទៅកាន់មន្ទីរពេទ្យហើយមានជនរងគ្រោះ ២ នាក់ផ្សេងទៀតបានស្លាប់នៅនឹងកន្លែងដោយសាររបួសពួកគេ។
ឧប្បត្តិហេតុនៃការបាញ់ប្រហារជាហេតុការណ៍មួយក្នុងចំណោមហេតុការណ៍ជាច្រើនដែលបានកើតឡើងនៅក្នុងទឹកដីសហរដ្ឋអាមេរិកចាប់តាំងពីដើមឆ្នាំ ជាថ្មីម្តងទៀតនឹងបានបង្កឲ្យមានការចាប់អារម្មណ៍ខ្លាំងអំពីការរីករាលដាលនៃអំពើហិង្សានៅក្នុងប្រទេសនេះ និងលទ្ធភាពនៃការហូរចូលនៃគ្រឿងអាវុធសព្វបែបយ៉ាងដោយអត្រាការស្លាប់ពាក់ព័ន្ធការប្រើប្រាស់អាវុធដល់ទៅ ៣៣០០០ នាក់ក្នុងមួយឆ្នាំ។
លោក Israel បានថ្លែងថា៖ «នេះគឺជាថ្ងៃដ៏គួរឲ្យរន្ធត់បំផុតសម្រាប់ទីក្រុងផាកលិន (Parkland» ដោយបានថ្លែងអំពីទីក្រុងដែលមានពលរដ្ឋរស់នៅប្រហែល ៣ ម៉ឺននាក់ចម្ងាយប្រហែល ៨០ គីឡូម៉ែត្រនៅខាងជើងទីក្រុងម៉ៃអាមី។
គ្រូបង្រៀនម្នាក់នៅសាលារៀនបានថ្លែងថា Cruz ត្រូវបានកំណត់ភិនភាគពីមុនមកជាមនុស្សដែលអាចបង្កគ្រោះថ្នាក់ខ្លាំងដល់ក្រុមមិត្តភក្តិរួមថ្នាក់របស់ខ្លួន។
គ្រូគណិតវិទ្យាម្នាក់ឈ្មោះ Jim Gard បានថ្លែងប្រាប់កាសែត Miami Herald ថា៖ «យើងដឹងថាពីឆ្នាំទៅម្នាក់នេះគេមិនឲ្យចូលកាន់ទីធ្លាសាលារៀនទាំងនាំសាក់កាដូទៅជាមួយឡើយ»។
«មានបញ្ហាជាច្រើនកើតមានចំពោះបុរសម្នាក់នេះកាលពីឆ្នាំទៅដោយគំរាមដល់ក្រុមសិស្ស ហើយខ្ញុំទាយថា បុរសម្នាក់នោះត្រូវបានគេបណ្តេញពីទីធ្លាសាលារៀន»។
Cruz តាមដឹងថាកំពុងសិក្សានៅក្នុងកម្មវិធីហ្វឹកហ្វឺនមន្ត្រីកម្រិតទាបសម្រាប់មន្ត្រីបម្រុង ខណៈបុរសនេះកំពុងនៅក្នុងសាលា៕ SN